我們怎麼了？: 14

我：「遺…傳？」 

爸爸：「係，所有飲食果方面，到咗你三十五歲後最好留意下，其實宜家開始留意係最好，但我知道宜家講你係唔會聽。」 

我：「有乜唔食得？」 

爸爸：「遲啲先話你知，好喇，我入房打俾媽咪問佢今晚返唔返嚟食飯。」 

「哦。」 





我走回自己的房間，經過叔叔的房間時，我從虛掩的房門中，看見叔叔伏在電腦前打理公司的事務。其實這幾年來我已經習慣了跟叔叔一起生活，去了美國之後，不知道什麼時侯才可以跟他一起看球。 

由決定要去美國那日開始，我的生命已經慢慢的產生了微妙的變化，除了需要到另一個地方生活之外，我還跟秋凝重新接觸，我意思是指，重新的單獨接觸。 

在那天球場見面之後的三日，有一晚我收到秋凝的訊息，內容是關於她跟阿斌的事。我慣性地以一個旁觀者作出一些近乎廢話的意見，但據我了解三小時後的結論是：阿斌很堅決定要跟秋凝分手。

「咁妳點？」 

「可以點？呢排心情都唔係咁好，阿斌佢又未走，遲啲先算。」 





「點樣遲啲先算？」 

「咁佢都咁決絕可以點？最多咪搵第二個囉。」 

秋凝最後這一句，徘徊了在我的腦海中數天，我原本以為他們是親密的一對，但原來也抵不過一些現實的問題。 

我原來以為的問題，其實一直不像我以為的一樣，真複雜。 

就好似我一直以為當年我們分手是天大的事情，我一路追溯至今，到頭來，可能在秋凝心中只不過是一碟小菜。 





每個人一生中都只會愛人一次，初戀那次。 

當了秋凝的戀愛顧問幾天，一肚子納悶的我不想待在家裡，便獨自一個跑到了G4解悶。其實最大原因，是我那肚子的悶氣不能向建倫他們抒發，只有找其他渠道去解放。 

走進G4，自然會看見蔡卓妍和阿力在埋頭苦幹。 

「喂，上次唔好意思。」我故意走到蔡卓妍身邊，為上次的事再次道歉。 

蔡卓妍：「喂，諾嚟咗呀？又唔好意思？都話冇事囉。」 

「Hi諾仔。」 

我：「力，你好。 

唔係呀，咁我班老死真係串呀嘛。」 





蔡卓妍：「得喇得喇，今日做乜又得你一個呀？」 

我：「悶悶地咪走落嚟睇下你仲有咩新招殺人囉。」 

蔡卓妍：「呢排冇呀…我都打算賣咗個帳號佢。」 

我：「點解呀？玩新人呀？」 

阿力：「唔係呀，佢可能要走。」 

「走？」 

蔡卓妍：「係呀，其實我一直都冇講，我爸爸係泰國華僑，成家人都喺泰國生活，得我一個喺香港跟阿婆。 





兩年前阿爸過咗身，最近所有遺產都分好哂，我可能去華欣幫我爸爸打理佢生前開嘅渡假村。」 

我：「原來你唔係阿爸阿媽湊大？咁幾時走呀？」 

蔡卓妍：「可能九月，要我安排好哂香港嘅事先。」

我：「你唔係日日打機咋咩？有咩安排？」 

阿力：「佢有上網賣汽槍零件，邊係日日打機，唔鐘意返屋企就真，所以日日都留喺度，貪呢度有電腦可以做生意。」 

蔡卓妍：「咁大聲作死你呀。」 

「我以為你地係啲雙失青年……即係打開手板問阿媽拎三幾廿嚟呢度打機果啲……原來咁勁。」我驚訝的說。 

蔡卓妍：「有乜咁勁？阿婆死咗之後，我喺香港就得一個人過，果時十九歲，自己唔做唔搵就餓死，有咩唔得？做男人最基本係乜？肯做嘅一定有得食。」 





我：「肯做就一定有得食……」 

蔡卓妍：「喂，我賣堆Items喇，見係你送件俾你喇。」 

「唔使喇…」 

蔡卓妍：「做乜呀？好勁喎把把都。」 

「我都可能唔玩喇。」 

「點解呀？」 

我：「我要去美國讀書…」 





「原來係咁……」 

電話這時響起，我隨手接聽。 

「謝宣諾呀……嗚嗚嗚嗚嗚……我好辛苦呀……嗚嗚嗚…」 

是秋凝。