我們怎麼了？: 5

看見一個端坐著的爸爸，這刻，我的腦袋有點停頓，那是一種徘徊於開心與憤怒、釋懷和被騙的投射。 

爸爸看著我，也沒有說話。視線，很快就回到他手上的雜誌上面。 

「點解會咁嘅？伯母明明打電話去我屋企話…」詠莉在我身後說著，但其實我已經心裡有數。 

此時霜姐的房門也打開了，有兩個熟悉的人在裡面走出來，是霜姐跟媽咪。 

「大官，你去咗邊呀？電話又冇開嘅？」霜姐緊張的過來拉著我，但我的眼只是一直看著媽咪。 





「爸爸，算你個仔都幾生性。」媽咪邊走向爸爸的身邊，一邊在玩弄她最拿手的調侃。 

詠莉：「伯母，妳又打俾我話世伯唔舒服…」 

「唔好意思詠莉，我搵極都搵唔到謝宣諾，所以要麻煩妳幫伯母搵。」媽咪繼續用她那一派自以為很聰明的態度說著自己的好事，當然，她每句話都會先經過語言藝術包裝。

「咁即係爸爸冇事？」我打破沉默，問了一句廢話。 

爸爸：「咁係咪我有事你先會返屋企？媽咪咁急搵你係因為我地幫你託朋友喺美國搵到一間好學校，要盡快幫你搞手續。」 





我：「唔係話等我放咗榜先咩？」 

媽咪：「乜你覺得你真係入到香港大學咩？」 

我：「點解妳地總係鐘意踩低妳地個仔？」 

爸爸：「冇人要踩你，咳咳…我地係為你好，咳咳…我都費事同你講，自己諗清楚。 

仲有，唔好再走出去唔聽電話，下次我就叫我做警察嘅朋友叫佢嘅伙記去搵你。」 





媽咪：「爸爸夜喇，返房訓啦。」 

爸爸和媽咪沒有跟上次那樣要和我不死不休，我覺得有點奇怪，但沒關係，反正我也不想吵。只要多撐幾天，他們又出去工作後這問題就解決了。 

「大官呀，你乖啦，你真係要乖呀。」霜姐仍是一臉淚水的拉著我右手不停說著同一番話。 

我：「我知喇，妳訓啦夜喇。」 

「霜姐，去訓覺，唔使理。」媽咪突然再探頭出來，吩咐霜姐回房間。 

「哦哦……咁大官你都早啲休息…」霜姐轉身想離開同時，我看看媽咪已經回了房間，便拉著霜姐的手問：「霜姐，阿叔呢？」 

霜姐：「二叔佢返咗房喇。」 

「哦，知道喇，妳訓啦。」 





所有人都走光了，只剩下我和詠莉。 

「妳今晚喺度訓啦。」 
「唔喇，媽咪頭先唔係好舒服，我都係同佢講出一出去搵你。」 
「陪下我啦。」 
「我要陪媽咪呀，你都知架。」 
「但妳都知我唔開心，一次都唔得？」 
「唔使講，一陣媽咪有唔舒服我趕唔切返去點算？我Call的士啦自己。」 
「好啦好啦，我幫你Call。」 

大半個小時之後，我一個人坐在大廳收到詠莉給我說回到家的訊息，然後又感覺到這間屋內那種讓人無助的壓迫感，我又回到了這個令我不開心的地方。 

我開始有點明白蔡卓妍和阿力他們的那種追求。





我把自己關了在房間兩天，每天都只是霜姐把早晚飯拿進來給我，除了如廁之外，我一步也沒有離開過自己房間。偶爾我會聽到爸媽在房外走過，又或者是在聊天，但我沒有興趣去理，直接帶上聽筒在玩遊戲。 

我奇怪他們沒有再跟我糾纏往美國的事，但這樣也好，我也樂得清靜。坐了兩天，人也坐得腰酸背痛，就挑了個沒有人看得見我的時間溜了出外。 

打了個電話給簡仁，沒人聽。 
然後打給阿斌，又是沒有人接。 

之後的建倫、祖立、建偉等等也沒有人聽電話。 

「有冇搞錯呀？成班約埋唔聽我電話呀？」我一個人在路上發悶，這時收到祖立的回電。 

「喂，點呀諾少？」 
「唔聽電話？陪女呀？」 
「成班去哂游水點聽呀？叫你你又唔去。」 
「邊有人叫過我呀？」 




「建倫話打過電話俾你，問完你去唔去你唔講嘢就收左線。」 
「係咩？」 

祖立一說，我才想起建倫的確曾經邀約過我，但睡魔挾持之下我很快便把他的電話掛掉了。 

「咁你地去咗邊游？我宜家嚟搵你地。」 
「石澳呀。」 
「咁我過嚟。」 

我隨手揚揚，便跳上一架計程車往石澳去，想著想著，我也好像很久沒有跟他們去石澳玩樂，之前一次好像是阿斌的生日。 

到達後，一眾兄弟到門口接我，在場的除了祖立、簡仁、阿斌和建倫昆仲之外，還有秋凝。 

秋凝，是阿斌的現任女朋友，但同時也是我五年前的初戀女朋友。 





說是女朋友，其實只不過是中二時的荳芽夢，我只是拖過她的手，大家閒來在旺角無聊逛下，然後兩個星期後就在電話說分手了。 

分手的原因，我也不知道，只知道她說了分手之後就開始避開我，前後三個星期，沒有人知道我們曾經一起過。有一段時間我們沒有見面，升中三時分開班後更不相往來，直到她兩年前變成了阿斌的女朋友。

成為了阿斌的女朋友後，她經常出席我們兄弟間的聚會，阿斌從第一次帶她出來已沒有什麼異樣，我意思說，他好像不知道我們曾經一起過。 

這一種好像是偷了人家東西的感覺一直圍繞著我，我很想找機會問秋凝到底她有沒有告訴阿斌，但我沒有這個機會。 

應該是說，我沒有為自己製造這個機會，因為我知道自己一直渴望知道當日她說分開的原因，如果一旦開始糾纏下去，會影響我跟阿斌的感情。 

所以我每一次看見阿斌跟秋凝一起都會有一種混身不自在的感覺，我很怕有天我們三個一起坐著的時間阿斌會突然拍拍我的肩膊，當我面向著他時，他會把臉貼近著我，然後用很詭異的表情問我： 

「諾仔，你有冇錫過秋凝？」 

多恐怖的感覺。 

我：「喂你地玩完喇？」 
祖立：「玩完喇差唔多，幾多點呀大哥？」
建倫：「我打俾你你又收我線，關人咩事？」 
簡仁：「一齊去食飯啦。」 
秋凝：「喂，好耐冇見呀諾仔，一齊去啦。」 

秋凝每次叫我，也令我內心覺得很尷尬。 

「好好，去囉去囉。」

「我同建偉唔去喇，要返舖頭幫手。」建倫的家族生意是旺角一間火鍋店，平常倆兄弟在課餘時間也會到那裡幫手，和我這個算是富二代相比，他們倆兄弟算是孝義得多。 

簡仁：「咁我地去啦。」 

我們隨便到銅鑼灣隨便找了一間大家樂坐下，席間，我跟他們說了跟爸媽吵架的事，祖立和簡仁的意見都跟我一致，只有阿斌還是有他自己那一套想法。 

阿斌：「有乜謂？去三幾年就返啦，唔好影響屋企人感情。」 

簡仁：「係喎諾，你走咗詠莉點呀？」 

「點呀？咪散咗九成囉，所以我一定唔會走。」我邊吃邊說 

祖立：「係啦，啲阿媽阿爸都唔理我地諗乜，去到英文都唔識講，你屋企有錢唔使半工讀都好小小，好似我表姐咁，返餐館連屎坑都要洗埋呀！」 

我：「咪係囉，我喺香港不知幾好，但之前媽咪其實都有講過可以供埋詠莉過去讀，只係詠莉因為屋企問題唔想去。如果佢陪我去，或者我都會去一兩年。」 

祖立：「其實真係咁大影響咩？我見好多人去咗外國讀書，都同喺香港嘅男女朋友感情幾好呀，加上宜家又有Msn，真係要見都好易之嘛。」 

簡仁：「廢話！Msn係乜嘢？要呃你嘅住埋同一間屋都可以呃呀！你見果啲感情就當然好啦，各有各玩，食住等架！」 

我：「簡仁知我心意，所以我話祖立你個人傻下傻下，比著你你女朋友去到九里咁遠，你日日唔使報到唔使陪佢行街睇戲，你仲唔晚晚落100Feel？我切！你晚晚唔同女呀你話我話啦。」 

祖立：「喂，咁係又唔錯呀！」 

我：「咁所以你話我點可以離開詠莉？我點可以離開我一生人嘅最愛丫？」 

「好喇好喇，唔好講喇。」簡仁突然煞有介事的說。 

我立即反應過來，望望阿斌，他已經面如玄壇的看著我，靠著他肩膀的秋凝兩眼已經通紅，一副準備開始抽泣的樣子。 

阿斌拿出紙巾為秋凝擦眼淚，秋凝兩眼定定的看著阿斌，有如白燕反@的表情喊出那一句： 

「斌，你聽唔聽到阿諾講？你真係捨得我去咁遠咩？」 

那一刻，我心頭好像感覺一酸，然後就很自然的別過頭。