我們怎麼了？: 63
「妳好…妳係霜姐嘅……？」謝宣諾想不到會遇到霜姐的朋友，立即收起哀傷，抖擻一下精神的問。
「我叫阿嫦呀，你叫我嫦姨，我係阿霜好多年嘅姊妹。」那婆婆微彎著腰，笑臉迎迎的說。
「嫦姐妳好。」謝宣諾對她完全沒有印象。
「你係阿霜邊個世侄？我有冇見過你呀？」嫦姐打個招呼後便蹲到地上，整理好自己帶來的鮮花。謝宣諾看著她的姿勢有點狼狽，便打算幫她一把。
「唔使唔使，啲花有刺，等我嚟。」嫦姐把他的手推開，像生怕把他弄傷一樣。不過嫦姐的動作有點大，令場面有點尷尬。
「唔好意思呀小朋友，我地做開馬姐嘅乜都慣咗自己做。你知啦，喺事頭屋企我地就乜嘢都要負責，洗衫、煮飯、打掃乜嘢都要自己一手一腳，所以唔慣人幫咁解。」嫦姐看見謝宣諾的表情，然後吃力的在解釋。
「冇嘢，冇嘢…係呢，妳係霜姐好多年朋友？」謝宣諾沒有介意，立即還嫦姐一個笑臉。他認不出嫦姐的樣子，所以有點好奇這個霜姐的多年姊妹的身份，和她們之間的事。
「好多年囉…不過我地打住家工嘅，邊有得成日見，係喎，你都未話俾我知你係阿霜邊個？」嫦姐說
「妳叫我肥仔啦，我爸爸媽咪同霜姐係朋友。」謝宣諾不表露身份，因為他有自己的打算，他想從嫦姐口中知道霜姐的事。
「肥仔呀？未見過你拜阿霜嘅？」嫦姐人很老派，雙手拿著剪刀有如摩打一樣修剪著鮮花的刺，嘴巴一邊悠閒地說。
「係呀，以前係阿爸媽咪拜，我今日經過呢度咪嚟拜下霜姐。」謝宣諾說
「不過你都算有心，有幾多後生仔肯望下老人家丫，生又好死又好，都冇乜人會理。」嫦姐看看霜姐的照片，
「係呀係呀…」面對一般老人家的嘮叨，只可以用這個方法糊弄過去。
「係喎，你有三十歲未？」嫦姐突然問
「我？差唔多啦。」謝宣諾不以為然的答道
「咁你識唔識阿霜以前事頭果家人呀？」嫦姐再問，但這個問題卻要謝宣諾認真起來。他想了想再答：「識識地，做乜？」
「冇，想你幫我睇下，果家人個細路仔搵返未，如果搵返嘅，就叫佢嚟拜拜阿霜囉。」嫦姐搖搖頭，將鮮花放好後再說：「一個人好人好姐，又會無端端唔見咗人，係生係死都得個知字丫嘛，搞到阿霜真係死都唔眼閉。」
「妳都知道果家人嘅事？」謝宣諾有點不忍，但也繼續的試探。因為他不再選擇逃避，他要堂堂正正的面對，那些曾發生過的過去。
「話得阿霜係我姊妹，點會唔知？不過我冇見過佢地，只係喺阿霜個口度知道佢地嘅事。」嫦姐拿出香燭準備著，那手法純熟得看得出是經常來拜祭霜姐。
「霜姐有冇怪個細路仔？」謝宣諾問，不過情緒上已經離開了試探的範圍，那是基於他開始覺得難受。
「個細路係佢湊大，半個老母一樣，仲邊有怪定唔怪？自從個細路仔唔見咗之後，阿霜就日日問神問佛，食又唔安坐又唔樂，最後仲搞到自己病埋。」嫦姐放好東西，坐在旁邊的那個石階上說。
「佢真係好錫個細路……」謝宣諾把話停住，因為劇本來說，他在這個時候不能哭。
「由個細路仔唔見咗開始，到阿霜自己過身果日為止，佢差唔多日日都喺舊屋果度附近去等佢返嚟。無論係佢病，又或者佢兩個事頭阻止佢，佢偷都要偷出去，希望有一日可以見返個個細路仔。」嫦姐看著霜姐的照片，微微笑的說著。畢竟年紀都過了一把，人生在世，老來無仇，還有什麼要需要放不下的？
「佢…點解要去等佢？」謝宣諾說得很慢，因為忍淚很辛苦。
「佢話個細路仔唔知發生乜嘢事，怕佢唔識返屋企。阿霜又唔識咁多路，佢最熟就係屋企行去中環街市果條路，咪日日行嚟行去幾個鐘。
我地打住家工嘅，一打就打一世，事頭屋企嘅事就好似我地自己嘅事。阿霜佢好彩，事頭都對佢好好，所以佢成日同我講要仆心仆命咁湊大個細路，不過佢自己又好錫個細路，次次個細路同佢事頭嘈交，阿霜都會半夜打電話俾我喊。我叫佢唔好理，但次次佢會拎枕頭底一早準備好果幾千蚊俾個細路。
今次俾完，第二日又即時去銀行拎多幾千銀出嚟準備佢地下次再嘈。」
「嗯……」不用再看，謝宣諾的防線已開始守不住，能「嗯」出一句聲來已很了不起。
「個細路走咗，阿霜兩個事頭就開始頭頭碰著黑，一個病完又到一個，有一段短時間，阿霜仲要拎自己嘅私房出嚟幫佢地。果時我都有借咗小小錢俾佢，做人嘅嘢好簡單，你幫下我我又幫下你，所以後來阿霜過左身，佢事頭個弟弟都幫佢買咗宜家呢個位，都成廿幾萬銀，真係有心。」嫦姐看著謝宣諾一對紅眼，依然是那一個友善的笑臉。
「咁……霜姐走之前有冇嘢講低？」謝宣諾擦擦眼淚問
「佢走之前果兩日都唔係太清醒，嚟嚟去去都係講住果一兩句說話，一味問住個細路，問到都冇人答到佢，佢就自己收聲。可能佢知道，佢自己呢一世都見唔返呢個細路仔。所以我頭先問你，有冇見過果個細路，如果見到就即刻叫佢返嚟睇下阿霜，幫阿霜完成個心願。」嫦姐這時從褲內拿出手提電話，在找尋一些東西。
「我知……我知……我會叫佢嚟……探霜姐……」謝宣諾垂下頭，意圖消化掉那些壓住心頭的感覺。
「你睇下，呢張就係阿霜走之前冇幾耐影嘅相。」嫦姐遞上手機，那舊款的手機上一張像素不高的舊照片出現在謝宣諾的面前。
手機內是一張霜姐跟嫦姐在醫院內拍的照片，裡面的霜姐一頭白髮，跟謝宣諾腦內的印象完全是兩個模樣。可以想像得到，謝宣諾的不辭而別，的確把她長期折磨得不似人形。
「霜姐走之前就係咁嘅樣？」謝宣諾心裡想著，同時就像有一千根針刺向心頭。他沒有再看下去，立刻把頭轉向另一邊，兩滴眼淚很快流過他的臉頰。
「係咪好憔悴？人差唔多死，個個都差唔多。」嫦姐收起手機，又走到霜姐的靈位之前。她用布碎向靈位擦了擦來清潔，沒有理會謝宣諾的反應，然後又繼續說：「你想唔想知佢斷氣之前講果句說話係乜？」
「係乜……？」謝宣諾很想知，但他知道這話不會好聽。
「佢話成晚只係不停講一句嘢，就係「大官呢？搵大官返嚟俾我望佢一眼啦」。由佢清醒，到佢兩隻手冇哂力，都係講住呢一句嘢。」嫦姐看著已經蹲下的謝宣諾，又搖了搖頭繼續說：「所以你話，個細路對佢幾緊要，全世界嘅人都以為佢地只係工人同少爺，其實感情仲深過兩母子，可惜只有阿霜自己知。」
「我知……我知……」謝宣諾人蹲下，臉向著地下很輕聲的說，他終於知道，霜姐最後的日子是怎麼樣過的。可惜，都給他一個人毀了。
「喂，你拎住。」嫦姐這時走到謝宣諾的身旁，又拿出一個信封遞到他面前。謝宣諾抬起頭，看到那是一個已經微微發黃的舊信封。
「呢個係…？」
「阿霜走之前我成日去照顧佢，佢入咗醫院段時間成日都拎住一疊相睇，佢死咗之後，我就幫佢保管到宜家。然後我次次探阿霜，都會拎埋呢堆相嚟呢度，因為我都希望，有一日，可以將呢堆相物歸原主。」嫦姐將信封交到謝宣諾手上，然後看看霜姐的照片，便轉身慢慢離去。
謝宣諾把信封打開，內裡放著的，正是自己童年時跟霜姐的一些照片。由他一歲到離開香港之前的，而每一張，霜姐也會在背後寫上時間，還有拍攝的地方。
「霜姐……」謝宣諾很後悔，後悔得非筆墨可以形容。
嫦姐走到那出口之前，留低了最後一句說話：
「好好地同佢傾下偈，話俾佢知咁多年嘅事，佢真係好掛住你呀，細路。」