我們怎麼了？: 57
「點解會咁？」謝宣諾很驚喜的雙手握著屏幕大叫，這一叫，把隔壁的諾媽也吵醒了。
「諾仔，做乜嘢事呀？嚇死媽咪呀！」諾媽傳來大叫
「冇事冇事呀媽咪，妳起身喇？」謝宣諾跑到諾媽面前，第一時間將她扶起來。諾媽：「訓得好舒服，俾你個衰仔一叫就嚇醒咗我，咩事咁大反應？」
「哦……冇呀，咦，媽咪妳條喉要洗喇，不如我幫妳好冇？」謝宣諾還未搞清楚事情之前不想讓諾媽想得太多，所以沒有把電腦上的事告訴她。
諾媽：「你識幫我整咩？」
「試下咪得囉。」謝宣諾看著她說
「我知你錫媽咪，但換呢個喉要除咗件衫，你咁大個仔點幫媽咪換呀哈哈，等阿爸返嚟幫我就得喇。」諾媽很滿足的各謝宣諾報以一個微笑，因為這種關心正是所有媽媽都夢寐以求的一種需要。
謝宣諾：「係咩？我都醒唔起，咁冇辦法喇，幫唔到妳解決呢個問題。」
「咁又唔係解決唔到喎。」諾媽突然鬼馬的說
「咁即係乜呀？」
諾媽：「你搵個人返嚟服侍我咪得囉。」
「咁我下個月請個外傭返嚟好冇？妳想要菲律賓定係印尼？」不解諾媽意思的謝宣諾繼續問
「乜你咁蠢？我要泰國呀。」諾媽笑著說。
「哦……冇啦，我明妳講咩，冇啦，我同Sandy冇可能喇，其實我同佢一齊果時佢仲有一個舊情人，拖拖拉拉幾年，我地以為生咗家寶之後大家感情會好啲，最後都係要分開。」謝宣諾幫諾媽邊弄好衣領邊說
「咁你成三十歲人，唔通唔再搵女朋友呀？」
謝宣諾明白諾媽意思，為人父母的，都很想兒女可以有一個完整的家。只是感情這東西就像白頭髮一樣，
你永遠不會知道它會在什麼時候出現。
「我都唔知…」謝宣諾糊弄地說
「詠莉呢？」諾媽突然說
「詠莉？人地有男朋友喎！」謝宣諾被諾媽的一句嚇得停住動作，但很快他又轉出一個念頭來。
諾媽可能會知道一點點詠莉這麼多年來的事。
「咁有男朋友係事實，但你同佢未分手呢個都係事實喎。」諾媽不以為然的說。
「媽咪，妳個仔我自己走咗去咁多年，仲邊敢諗呢啲呀？」
「咁多年嚟，佢對我同阿爸真係好照顧，呢份恩情，你估係無端端出現？世上每樣嘢都有因果呀仔，既然見到個果，就自己去搵下個恩啦。」
聽到母親的說話，謝宣諾幾乎已肯定她是知道某一些事情，正在為她整理褲子的他，抬起頭回答說：「媽咪，其實詠莉呢幾年過成點，佢有冇同妳講過？」
只是抬起頭那一剎那，謝宣諾卻看到，諾媽的兩眼已經有淚光。
「媽咪做乜嘢？妳唔舒服呀？」謝宣諾很緊張的問
「冇事，冇事……詠莉係一個好女仔，你自己諗清楚。媽咪身體唔好，真係唔知睇到你幾耐。」諾媽邊擦眼淚邊說
謝宣諾：「媽咪唔好亂講嘢啦，我知妳講嘅意思，但我準備帶家寶返香港同妳住，帶住個仔仲要難為人咩。」
「詠莉唔會介意，佢一定唔會介意。」諾媽肯定的說
謝宣諾：「點解媽咪妳今日會講呢啲嘢？妳知詠莉嘅事？」
「媽咪唔知，媽咪只想為你好。好喇，我想訓多陣，阿爸係咪出咗去？等佢返嚟我地就去食飯啦。」
「哦……咁妳休息多一陣。」
離開諾媽房間，謝宣諾又回到大廳，但腦內一直只是想著兩個人。
阿斌和詠莉。
謝宣諾再回到電腦前，打開那個朋友列表觀察，發覺剛才阿斌的那個上線已經消失了，人名又變回灰灰的一個顏色。
「點解會咁…阿斌仲未死？」謝宣諾極力的想分析整件事，但這個只是區區來去一秒的上線畫面，在十多年根深柢固的概念之前，又的確顯得有點蒼白無力。畢竟只是一個電腦程式，天曉得在另一邊的人會是誰？
「如果阿斌冇死，佢點會唔返嚟搵我地？」謝宣諾這樣想著，但他自己也許忘記了，他自己也不是消失了很多年嘛？
每個人與生俱來都有兩把尺，一把是量人家的；另一把是量自己的，不過從來不會拿出來。
第二天，謝宣諾忍不住約了詠莉出來，詠莉爽快的答應，二人到餐廳坐下後，謝宣諾以Msn上阿斌出現的事件來作開場白。
「咩話？阿斌上線？」詠莉跟謝宣諾看見阿斌上線時的第一個反應一樣。
「喂，細聲小小丫，公眾地方嚟呀。」謝宣諾拍拍詠莉的手說
「哦哦，但邊有可能呀？如果阿斌仲在生，點解十幾年都冇消息？就算佢嬲你唔搵你，咁佢點都會搵建倫佢地呀。」詠莉開始在分析
「我都係咁諗，所以我覺得可能係佢屋企人開咗佢部電腦。」謝宣諾附和說
「不過，如果係佢屋企人開，但又點解會十幾年後仲有用佢戶口？正常十幾年電腦都搵幾部啦。」詠莉又跟著說
「不如同簡仁佢地講？」謝宣諾建議
「好呀，你去講啦。」詠莉連隨說，但很快她又看到謝宣諾的表情有點為難：「做乜？你同簡仁又嘈交咩？」
「邊有，係佢成日都俾面色我睇，仲要係無定向。」謝宣諾答
「佢人好好，你咪當佢有原因囉。」詠莉這時望望窗外，輕鬆的說
「我就係想知，佢有乜嘢原因？」謝宣諾打算進攻了
「我點知？」詠莉看了看他，又很快的避開眼神交接的一剎
「祈詠莉。」
「無端端做乜叫人全名？」
「話俾我知，呢十幾年妳為我做過啲乜？」