我們怎麼了？: 36
謝宣諾聽見有人向他呼喚，立即轉身。他看見一個穿著保安制服的男人，笑臉迎迎的向他走過來。
就在那男人走過來的兩三秒時間，謝宣諾看著他的臉，腦內就好像啟動了配對系統一樣，不停的搜尋腦內記憶，找出跟眼前這張臉吻合的數據。
終於，謝宣諾記起了，這個男人是以前在停車場負責巡邏的一個職員，也是當日他最後一次看見叔叔謝景晨的時候，在停車場門口跟叔叔聊天的那個人。
謝宣諾記得，他叫雄叔。
雄叔：「你咪係以前果個諾仔？我有冇認錯呀？」
謝宣諾：「係呀…你冇認錯，我係諾仔。」
雄叔：「咁多年冇見，你大隻咗好多喎，讀完書返嚟喇？」
謝宣諾：「係呀，返嚟冇幾耐。」
雄叔：「你去咗美國讀書都十幾年，宜家做乜嘢呀？」
謝宣諾：「啱啱返，遲小小先算…係呢，我想問，你又知我去讀書嘅？」
雄叔：「果時你爸爸媽咪講嘛，佢地去美國果時話你早小小去開學先，跟住過咗一年左右你爸爸媽咪又搬返咗嚟住喇。」
謝宣諾聽到雄叔這樣說，非常高興，因為他一直害怕雙親會一直住在美國。
雄叔：「不過自從佢地搬走之後，都好耐冇見過佢地。」
「佢地搬咗？」謝宣諾大驚
雄叔：「唏，乜你屋企嘅嘢你都唔知咩？」
謝宣諾：「我去咗美國，佢地冇同我講，佢地幾時搬？」
「幾時呀…？等我諗諗先，係喇…我記得喇，都有十年喇，果年係沙士，係喇係喇，就係沙士之後呀冇耐就搬走咗喇。」雄叔愈說愈起勁，相反謝宣諾則愈聽愈心寒。
他們已經不在舊居，我可以怎麼尋回他們？
「咁…佢地有冇返過嚟？」謝宣諾硬著頭皮問。
雄叔：「冇啦，冇見過你爸爸媽咪喇，就連你細謝生都冇見好多年。果陣時，耐唔耐都會見佢渣住架車喺呢度附近出現下，但近呢幾年都唔見喇。」
謝宣諾：「好…咁唔該哂你。」
謝宣諾轉身走，雄叔卻叫停他。
「諾仔，咁你返嚟搵乜嘢架？」雄叔問
謝宣諾看看他，最後也沒有什麼心情隱瞞，所以無奈的吐出一句：「早幾年同佢地有小小問題，好多年冇見過佢地。所以，我返嚟係搵返佢地。」
雄叔：「你走咗好多年？」
謝宣諾點點頭。
雄叔：「我地以前成班伙記都有講過，自從你爸爸媽咪話你去咗美國讀書之後，直到佢地再返香港搬返嚟呢度住，再去到你地成家搬走。無論係你爸爸媽咪，定係你細謝生同霜姨都好，唉…都唔知點講…」
「乜嘢事呀雄叔？」謝宣諾急問
雄叔：「我一次都冇見佢地笑過呀，就算係過時過節都好，我地見到你地一家人都係苦口苦面。我地有幾個伙記果時真係諗，會唔會你喺外國出咗事。」
「哦…」怎麼了，到底是怎麼了，謝宣諾開始覺得，原來自己離開了這十二年，對家人應該有翻天覆地的影響。
他一直認為，就算是不辭而別也好，以他和父母的關係來說，也絕對不會做成個體影響個體生活的事情出現。簡單說，他一直認為，自己離開了，父母會不開心，但絕對不會影響到自身的正常生活。
他所持的理由很強悍，因為從小他們就不太親密，很多時間也不能見面，所以基本上兩代之間的溝通也是很小很小。
謝宣諾一直以這樣認為，才模糊得了那個焦點，但祖正跟雄叔所帶來的事實告訴他，他錯得一塌糊塗。
「唔該哂雄叔，我走先喇，再見。」謝宣諾跟雄叔道別。
「你一見到我都仲識得叫我雄叔，都仲証明你幾好記性。
諾仔，雄叔贈你兩句，喇，做人，記得要思舊，唔好忘本呀，知嘛…？」雄叔拍拍謝宣諾說，然後又走回那個警衛室。
「我知喇…不過我宜家先知。」
謝宣諾回到酒店，躺在大床上，什麼也想不出來。才剛回來，本來打算先到處逛逛，先熱一下身拿點感覺，才開始計劃自己回港的事，誰知一開始，事情便來得這麼急。
他翻身轉到床尾，打開其中一個行李包，拿出一本記事本來。
打開，原來是謝宣諾的日記，以外表來看，都已經有一段日子。
「二零零一年，十二月，三十一日
嚟到呢邊已經三個月有多，泰國嘅日子真係好好玩，由曼谷玩到芭堤雅，然後蔡卓妍兩個細佬又送我地返華欣。食好住好，遲小小蔡卓妍仲叫我幫佢打理佢阿爸留低嘅渡假村，佢個人真係幾好，我嚟咁耐佢就照顧我咁耐，睇嚟我第時都要好好幫佢手報答佢。
果日同蔡卓妍兩個細佬傾開，先知原來喺呢邊，用錢就可以搞掂住嘅問題，以後我可以換張相就用其他人嘅身份証，連坐車都可以有優惠，哈哈，呢個世界真係有錢就點都得。
不過呢邊嘅人踢波好勁，個個都可以求其跳起就打倒掛，果日我俾個泰仔唔小心踢到一腳，到宜家都仲瘀緊，下次見到面一定要踢返佢。
香港宜家已經冬天，但泰國仲係好熱，唔知爸爸去咗美國之後個病點呢？
阿斌，唔知你宜家去咗邊呢？」
謝宣諾翻過自己的這篇日記，臉上一直苦笑著，這時他的手提電話響起。
謝宣諾：「喂？」
「喂，諾仔呀，祖正呀，冇呀我放咗學，想問你聽晚有冇時間食飯呀？」
「好呀，好呀。」
「我頭先打咗電話俾阿哥，佢好驚訝，仲話一定要見你，咁好啦，聽晚八點，雅蘭商場門口等啦。」
「好，再見。」
掛線，謝宣諾對祖正所說，祖立很想見他的說法覺得很緊張，我們的關係，十多年沒見，再見的第一句，我應該對你說什麼？