一場十年的夢。: 其實你......

如常地放學，六點左右。
地鐵車廂人好多，一開車廂門，D人就衝出去。
我斯斯然咁離開車廂，望住D人。
平日我點都唔撘LIFT離開月台，
因為覺得好逼人，
今日突然想去撘一撘。
 
戴住耳機，低住頭入LIFT。
LIFT除咗地板係全玻璃，
似個透明箱咁。




抬起頭，我見到一副熟識又陌生嘅面孔──呀倩。
 
佢又清減咗，身形同初初識嘅佢差別太大。
著住白色短袖T，長牛仔褲，黑色頭髮。
我望住佢，呆住，腦筋發麻。
 
然後佢亦發現我，
佢當刻呆咗一呆，然後微笑。
 
呢程LIFT係我成世人撘過最長嘅一程，亦係最短嘅一程。




最長，因為我幾乎連呼吸都停住，腦海一片空白；
最短，因為到我回神返嚟佢已經出LIFT離我而去。
 
望住佢嘅背影，我無勇氣去追，
無勇氣去追一句：
｢其實你，到底有冇一刻鍾意過我。｣