一場十年的夢。: 我愛你。

｢好呀～｣橦桐睇完好爽快咁答我。
係對方面前睇信係我地嘅習慣，雖然好奇怪。
｢但係你知我有個男朋友架可……｣
｢我等你。｣

自此我地關係再進一步，我更了解佢。
原來橦桐係個星座控。
我同佢都係十一月出世，大家都係天蠍座。
據說天蠍座嘅人有好強佔有慾，咁啱我係。
據說天蠍座嘅人好憎人背叛，咁啱我係。(屌，有咩人唔憎比人背叛呀！)




據說天蠍座嘅人好專一，我好似唔係……

我地距離變近，每個小息我都會同佢一齊，仲有呀晞。
但如果你無記錯，佢係同去搵佢位男友。
每次落到小食部，都係我同呀晞坐，橦桐同條友坐。
但其實橦桐同條友都無乜幾句，
好多時都只係食下野，講下無聊野。
當時我無內疚感，因為我知道橦桐根本唔係鍾意佢。

不論小息定放飯，我都同橦桐一齊。




一齊，係美其名。
實際，係我痴住佢、跟住佢。
依家睇返，我似係一隻狗，乖乖咁跟住主人。

等左一個月左右，佢地終於散。
每日望住自己鍾意嘅人同另一個人一齊，好虐心。
終於都捱過咗。
我以為幸福就從此開始，只係以為。
有上次同呀倩嘅無疾而終嘅經驗，
我以為只要唔好重覆犯錯為得。




愛一個上一課係我嘅愛情觀……曾經。

有時放學我地會上佢屋企HEA下。
那些年我們還很天真，所以無做D咩。
就算有一次佢訓咗張床上面，我都唔敢同佢同床。

｢過嚟啦！｣佢著住校服，訓左係張床上面。
我學校嘅夏季校服係分開兩件，
上身係白色過頭粒嘅衫，恤衫料所以好透，
下身係格字裙。
佢慵懶咁訓係張床度，上身衫扯起小小露出蠻腰，
見到咁嘅景況，連帶小清持都扯起埋，
所以我唔敢過去。

｢過嚟啦！怕咩呀！｣




……
我先好不情願咁過去……坐係床邊。
雖然係扯到行，但當時連少少想扑野嘅感覺都無。
只係心跳得好快，身好熱，尷尬咁坐係床邊。
｢妖！訓低啦衰人！｣佢小小嬲。
然後我就伸手去抱住佢，
右手伸過去途中HI到下佢個波，
我即刻縮手，雖然其實佢只係A級波。
錫咗幾啖，我就話要返屋企。

同橦桐一齊嘅初期的確幾開心，直至佢生日。

佢生日嗰日佢帶咗我去學校附近屋村嘅遊樂場，
介紹咗幾個人比我識。
其中一個我永世都唔忘記：呀鬼。




呀鬼係個廿零歲、有少少肚腩、厚唇、頭髮兩邊剷青嘅飛仔。
嗰日，我睇一次見到橦桐食煙，而支煙係由呀鬼比佢。

睇橦桐嘅手勢，佢唔係初初食。
｢你食唔食支呀！｣呀鬼遞支煙過嚟。
｢佢乖乖仔嚟架，咪撚搞尻佢啦！｣
我第一次聽佢講粗口，仲要流利過我。
結果，嗰日我就做咗個流動空氣清新機，專責吸二手煙。
嗰一晚橦桐SMS我，
｢你會唔會因為咁唔鍾意我？｣
｢唔會。｣
｢我記得你話過你唔會鍾意食煙嘅女仔。｣
｢但唔鍾意都鍾意咗啦，無得返轉頭架喎。｣

或者你會覺得我以為自己係情聖，




至少我當刻真心唔介意，
因為我愛佢。