[粵][RPG][粗口慎入]Gladys－迪詩娜之泉: Ch5. 劫商
Ch5.
我叫雷米返旅館先，然後去左第5區。
問左睇舖個女仔之後，得知永言原來係一間大商會，係天藍城都有分部。
行左幾條橫街之後，終於比我搵到。
永言大商會，有個牌橫掛左係到，仲有個商會標誌。
我行入去，又係有個櫃檯，又係有條女，不過今次依個個樣睇落成熟好多，都接近三十歲。
我上前問：「依度係咪永言大商會？」
女職員答：「係，請問有咩幫到你呢？」
「就係咁既，我就有啲野…」我靜雞雞拎左千夜比我張證出黎，比個女職員睇，「想買，但唔知價錢，唔知有冇咩職員可以幫我介紹下。」
女職員見到張證，立刻意會，「係既係既，我搵人帶你去入面間房坐一陣。」
跟住佢叫左遠處另外一個女職員過黎，帶領我入房。
間房有啲似外國人啲辦公室咁，燈光黃黃地色好舒服，牆上掛住啲壁畫，房間中央係兩張大沙發同一個茶几，茶几上放左幾個空酒杯係到，應該係拎黎應酬客人用。
「請你係到等一陣，分部長好快就會過黎。」女職員有禮貌咁講。
「唔該。」
過左唔夠5分鐘，一個體形肥胖既中年男人入左黎，佢臉上兩撇鬍成八字形，有啲似某薯片公司個logo咁，都幾長下，應該係故意留長。佢手上拎住支酒，好似意猶未盡咁。
日光日白就飲酒，都難怪你咁大個肚腩既。
中年男人一黎自我介紹先：「我叫鬍子，啲人通常叫我鬍子老闆。」
宜家有事要求人，都係恭敬少少好啲。「鬍子老闆你好，小弟方言。」為左安全起見，都係用住假名先。
「坐。」佢左手指示左邊果張沙發，自己就坐左係右邊果張。
我同雷米都坐低左，鬍子問我：「方小弟，你飲唔飲酒架？」然後就拎起茶几既其中一個空酒杯，開始倒酒。
「唔，辦事期間，都係唔好飲好啲。」我求其9up拒絕佢。
「都岩既，哈哈哈哈。」
「咁，講返正題，我有啲野想同你買，」我又拎返張證出黎，「用依個名義。」
「只要你比得起錢，絕大部分既野我永言大商會都可以搵到。」
「就係咁既，我有兩個朋友，一男一女，男既叫寧風，女既叫雷米，佢地都係由外地黎，想要一個身分係帝國，方便辦事，唔知永言幫唔幫到我依個忙呢？」
「依層…」鬍子思考左一陣，之後答：「應該唔係大問題，只不過特定姓名既身分證明需要幾日時間準備，而且可能要由天臻城果邊運過黎，可能要半個月左右，唔知方小弟趕唔趕住要呢？」
「唔，咁呀…」半個月時間，話短唔短，而且隨時有變數都話唔定。
「咁不如咁啦，聽日我地商會有一團商品會係天藍城出發去天臻城，本身聘請左一隊傭兵，你都扮埋係傭兵，同佢地一齊護送我地商隊，到天臻城果陣就可以即刻叫啲下屬出黎交貨比你。」
唔，聽落都好似唔錯，而且本身都有隊傭兵既話，應該唔會太危險。
「ok，就一於咁做。」我答應依個提案。
「好，咁跟住落黎就係價錢問題…」鬍子陰陰嘴咁笑，成個奸商咁樣。
……
比人屠左10個金幣做訂金，我一個人係第5區閒逛。
但係行下行下，硬係有種唔自在既感覺，好似比人一直望住咁。
為左確認我既諗法，我故意行左入去一條小路，然後用瞬移一下去左高處。
由高處俯瞰，一眼就發現一個人，依個人我見過，係睇舖果個女仔。
「咦…去左邊呢…」個女仔行左入小路，喃喃道。
「瞬。」我閃去佢背後，輕拍佢膊頭。
「哇！」比我拍一拍，佢嚇左一跳。
佢見到我，捂住胸口講：「哇，大佬，整啲腳步聲黎聽下都好呀，哇，嚇死我。」
我等佢抖順條氣之後，問佢：「搵我咩事？」
聽到我既問題，紅玥諗返起岩岩既對話。
……
「你話佢地救返我，而且仲送金幣比我地？」諾黑問亦寒。
「係呀黑大哥，果個好似叫寧風既少年，比左幾十個金幣我。」答道。
「幾十個金幣呢，我未見過，我真係咁大個女都未見過。」紅玥興奮道。
「佢仲有冇講啲咩？」諾黑冇理佢，追問亦寒。
「佢講左啲咩資金對一個組織好重要呀，過幾年可能搵我地玩下呀之類。」
「嘿，係咩…」諾黑合起雙手，蓋住口鼻，指尖掂到鼻尖，依個係佢思考果陣既小動作。
深知依一點既紅玥和亦寒，唔敢出聲。
沉默左一陣 ，諾黑思考完畢：「既然係咁，應該真係同貴族無關，不過，宜家都唔知佢地去左邊。」
紅玥依個時候插話：「我知呀，我應該知佢大概會去邊。」
諾黑望住紅玥，知道佢係認真。「咁你代我走一趟。」
……
「點呀？做乜諗野姐你，唔講我走架喇。」我見紅玥諗野諗左好耐，提醒道。
「喔對唔住，」紅玥回憶完，「黑個傻仔叫我同你講，」紅玥扮諾黑既語調：『下次見面果陣，我會將上次輸既連本帶利贏返返黎！』
我微笑：「嘿，我都好期待。」
「依個係黑比你既。」跟住紅玥拎左個胸針出黎，我拎左黎睇，基本構造係一個弧形，兩端分別向兩邊彎起，中間有一根針穿過，將圖案分成兩半，拎起手都有啲重量。
依個圖案我係佢雜貨舖同地下室都冇見過，咁個胸針就有兩個可能，一係係佢好重要既物品，或者係佢想用既團體標誌。
諾黑留左兩個提示，第一個係「下次見面」，第二個就係依個胸針。
照咁睇，基本上，佢已經係准許左我再黎搵佢地，甚至係承認左我可以做佢地既一份子。
真係有啲期待呢，對諾黑佢地。如果可以，我都想留係佢地度。
不過可惜，我對千夜間學院更加有興趣，難得黎到依度，點可以唔入學院讀下魔法！？
「嗯，你返去同諾黑講，佢既好意我已經收到。」
見紅玥呆左咁企係度，我轉身打算走。
「等…陣。」紅玥。
「做咩？」我又轉返身。
紅玥深吸一口氣，好嚴肅咁問：「點解你要幫我地？」
「唔…乜你又問埋同一個問題，亦寒冇講咩？」
「冇。」
「咁呀，」我若有所思咁望住天空，「唔知呢，或者係覺得你地好有趣掛。總之我一見到你地，就覺得你地好熟悉。」
紅玥耷低頭，若有所思。
「我好快就會離開依度，係下次見面之前，我都會一直期待。」我轉身離開，舉起右手：「bye～」
「好熟悉…嗎？」紅玥淡淡道。
……
官道（天藍城段）
所 在：天藍城
所 屬：天藍城
等級限制：1
進入限制：無限制
天藍城城門外，聚集左一大班人馬。
除左鬍子既商隊，仲有第二隊人馬，隊人既首領同鬍子係到密密針，應該就係護送隊伍。
鬍子見我同雷米黎左，停止左對話，向我地走過黎。
「方小弟，黎左喇？」鬍子向我打招呼。
「嗯，一切妥當？」
「護送上，應該冇咩大問題。仲有，你拜託既事，一定能夠順利完成。」我望過去護送商隊既小隊，足有二，三十人，首領一副成熟面孔，大約三十歲上下。
「嗯，咁就好，咁幾時起程？」出發前我一早check好晒啲裝備，亦都將飾物隱藏好。
「做緊最後既出發準備，年輕人唔好太心急唷。」鬍子。
……
一行人走係官道上，旁邊既緣風林吹起一陣熟悉既味道。
「各位，我地係前面抖陣先。」鬍子對住大隊喊。
商隊陸陸續續都停低，我同雷米坐左係一棵樹底歇息。
依個時候，小隊首領行左埋黎，放低兩瓶飲料：「方小哥，請你地飲。」
？？？
消耗品－飲料
製作者：池目
？？？
等級需求：1
回復效果：？？？
使用次數：10／10
重 量：1
「多謝。」我瞥左一眼之後收下，放左入背包。飲品依啲野，蒙汗藥條橋都用到爛晒，同佢三唔識七都係小心啲好。
反而雷米拎左黎飲，淺嘗一口之後，就係度大啖大啖飲。
「依個你自己整既嗎？幾好飲呢～亦都解渴，多謝晒。」雷米感謝道。
「呵呵，係呀，得閒果陣咪整啲小飲品試下，小妹妹你鍾意就好喇，係喎，我仲整左好多架你仲要唔要多支。」池目。
「唔洗喇，池先生，你太不客氣喇。」雷米。
「唔會唔會，」首領池目將一樽一樣樣既飲料塞比雷米，「去天臻既路都未到一半，跟住落黎都要多多指教呢。」
「也請你多多指教！」雷米推搪不果，只好收左佢。
池目走開之後，雷米問：「嗯，主人，你唔試下呀？」
我細細聲咁答佢：「係戶外人地比既野如非必要都係唔好食唔好飲好啲，雖然係官道，但都難保會有咩事發生。」
「唔會掛，池目先生都唔似係咩壞人呀，而且樽野狀態睇落都冇乜野。」雷米拎佢岩岩飲過果支飲料比我睇：
試作雜果汁III號
消耗品－飲料
製作者：池目
美味香甜的雜果汁，好味又解渴，夏日十大必備飲料第三名！
等級需求：1
回復效果：無
使用次數：9／10
重 量：1
「個首領係冇乜野既，但佢班人神色凝重咁，雖然可能只係將任務睇得比較重，但都有可能有伏。」
「下，係咩？」雷米後知後覺咁問。
就係佢問既同時，一發通訊號彈射往天空。
「邊個？係邊個放既？」池目拔劍備戰。
首領池目一拔劍，其他隊員都拎出自己既武器。
只係，同池目一樣戒備敵人既得幾個人。
其餘近二十人，通通將劍刃指向同伴。
「通通唔准郁，我地要帶走商品。」其中一人講，睇黎係叛軍大佬。
「喂喂，副隊長，你地唔係認真下話…」「我都懷疑過有叛徒，但係勢估唔到連副隊長都…」「隊長，宜家點算…」池目身邊既隊員，各自發話。
而池目都忍唔住向副隊長問一句：「點解？」
「點解？哈哈，係囉，點解呢？你認為我加入你小隊係為左乜野？」副隊稍作停頓，「賺錢？一齊努力奮鬥成為騎士團？唔好發夢啦你！總之，依幾車商品我就拎硬架喇，不過有人想死我唔介意殺幾個人。」副隊長語氣冰冷，隱約透出殺意。
而係佢地傾計既同時，我一早帶左雷米去樹上。
既然佢地放訊號彈，姐係代表仲有同黨係附近，如果唔解決佢地既話手尾仲長。
我係雷米耳邊講，「你準備定魔法，我嘗試搵佢地同黨出黎。」
……
另一邊廂，森林裡潛伏左一個小隊。
一名著住魔法袍既少年走係隊伍中心，右邊有一個老侍者。
係兩人周圍既係一隊聘請返黎既十人小隊，由三名弓使同七名近戰組成，等級係二十上下。
訊號彈放左冇耐，佢地就開始向目標移動。
訊號彈釋放出黎既魔法流動逃唔過魔法使既追蹤，佢地愈黎愈接近訊號。
「葵大人，今次既商品可能性高唔高？」老侍者問魔法使。
「好有可能。我覺得佢地講得冇錯，因為身處係依度，我已經可以感應到附近果股流動。」
「恩，搵左咁多年，終於都要到果一日喇…」老侍者輕撫鬍子，比人一種經歷過無數風雨既滄桑感。
「喂喂，拜託，係我面前就唔好扮晒野喇好冇，好難忍笑架…」葵邊掩嘴邊講。
就係葵仲竊笑緊果陣，突然感覺到有啲異常。
而佢身旁既老侍者反應更快，佢瞬間去左葵既另一邊，拔劍擋住由左側射過黎既魔法箭，整套動作行雲流水，令人無法相信佢係一個老人。
「碰碰！」劍身擋住箭頭，水晶繼而破碎，從接觸處發生爆炸，而且箭並非得一支，另外兩支正中外圍的既近戰隊員，兩名隊員直接昏迷，而且仲牽連到一名企得較埋既弓使，受左輕傷。
「竟然有偷襲？」老侍者有啲不可置信。
「葵！有冇事？」係一片黑煙和燒焦味之中，侍者問。
「嘿嘿…」葵一直企係原地，冇因為小型火系魔法既爆炸而移動過分毫，不過髮端同半邊面龐就比黑煙熏黑。
葵無視侍者既問題，喃喃道：「我愈黎愈覺得今次翹課係翹得冇錯。」
「防禦陣型！防禦陣型！」葵仲係果邊懶型，但係小隊既隊員們就非常焦急，兩名隊員被秒，隊長受傷，敵人仍然不明，情況十分嚴峻。
敵人冇比太多時間佢地，就係所謂既防禦陣型組好之前，已經多三名隊員中箭倒下。
剩低既四名都係近戰隊員，組成一個正方形背靠相站，每人望住一個方向，將隊長守護係中心。
依個陣型成功守住由唔同方向射過黎既木箭同魔法箭，而侍者為左保護葵，冇特登將偷襲者揪出黎。
「洗唔洗搵佢出黎？」葵問侍者。
「但係…」侍者猶豫，擔心離開果陣葵會受傷。
「我可以食到三箭，冇事。」葵。
侍者一聽到之後雙腳一蹬，跳左上其中一棵樹，又即刻跳去附近一棵樹，速度奇快。
破甲箭！
「小心！」侍者大喊，同時依箭既軌跡移動去源頭。
破甲箭穿越林木，直達葵既背後。
葵轉身舉起火盾，但都係太慢，威力不足既火盾抵擋唔住破甲箭既穿透力。
葵腰部中箭，一下子扣左三份一血，即刻拎藥水出黎飲。
侍者跳到去放箭既源頭，一個身影及時閃走左。
「屌，空間魔法，都估到。」侍者見到對方識用空間魔法，即刻想跳返去葵身邊。
但同一時間，身影出現左係葵既身後，一個空間魔法同時使出，直擊葵既背後。
次元炸彈！
次元炸彈開始撕裂附近既空間，對葵造成極大傷害。
係寧風又再閃走既一刻，侍者已經追上，劍鋒劃過寧風右手。
葵倒地不起，侍者守係原地，冇再追擊寧風。
寧風右手流緊血，岩岩一劍令未完全康復既右手再度裂開。
一個［流血］既狀態係寧風身上出現，寧風捂住手腕，企係棵樹上。
侍者勸告寧風：「你宜家有血液，我唔會搵唔到你，再唔走既話，我就送你一程。」
寧風心知，侍者因為等級關係速度極快，比諾黑更快。
但侍者要追到瞬移都唔係一下可以達成既事，如果考慮到葵既安全，只能咁樣勸寧風撤退。
而寧風認為已經比對方發現，而且已經取得一定成果，再進攻落去都得唔到啲乜，於是離開戰場。
寧風走左之後，侍者將葵帶離剛剛既戰鬥範圍。
處於［昏迷］狀態既葵，好難講幾時先會醒返，所以基本上已經冇辦法會合商隊果邊。
「唉，算數，反正今次見到一個好有趣既細路，都算值回票價。」
……
返返商隊果邊，戰鬥正上演得如火如荼。
雖然話叛軍有人數上既優勢，但係冇背叛既，都係池目最初成立小隊果陣已經有既隊員，等級平均高幾lv。
而果班叛徒，大多都係副隊長，也即係叛軍首領招黎既，等級係18～22lv左右。
所以池目方一直利用等級既優勢，勉強維持住平衡。
但平均三對一既戰鬥，隊員們都漸漸頂唔順。
「隊長，再咁落去唔掂喎。」最近池目既一個隊員道。
「切，我係唔會認輸！」池目。
「我諗都係乖乖投降比較化算啊，池目。」叛軍老大。
「啊！」其中一個池目方既隊員倒地，血量歸0，進入左［瀕死］狀態。
「喂！冇野呀嘛？喂！」池目對住佢大喊，但冇得到任何回應。「切！」
「再係咁落去，就有人要死喇喎。」叛軍老大挑釁池目。
「啊！十字連斬（註１）！」池目使出技能。
十字連斬係二連擊，先橫揮繼而直劈，而且大部分武器都可以用，係十分實用既戰技。
長劍好快咁揮動左幾下，將面前既敵人擊退。
趁住敵人退開既空檔，池目立即刻跑去倒地果個隊員身邊。
「喂，你醒下，快，飲左佢。」池目係背包入面拎左＜復活藥水＞出黎，灌果個隊員飲。
依個時候，我返到黎雷米身邊，見到情況緊急，即刻下指令。「雷米準備。」
叛軍老大見到池目咁樣即刻走左去佢背後，長劍一揮而下，「碎石斬！（註２）」
「Critical！」劍正面擊中池目背脊，而且打出左暴擊，池目被擊中後身體不受控制咁碌開。
暴擊比正常攻擊可以造成更高既傷害，發動機率唔高，當攻擊敵人背後時發動機率就會高少少。
叛軍老大大笑：「哈哈哈哈，池目，乜冇人教過你戰鬥果陣唔好背對敵人咩？」
話音剛落，雷米既魔法同時發出，一股鳳形火焰直捲而去，亦都係正面擊中叛軍老大既背脊，佢同池目一樣不受控咁係地上翻滾。
火焰朝周邊森林飛去，引起熊熊烈焰。
「瞬！」我瞬移去老大身邊，左手已經準備好果個魔法。
我踎低細細聲同佢講：「咁你又有冇教過你自己呀？」
無情既八等份魔法陣，將叛軍推去絕望。
次元轟炸！
「瞬！」我離開魔法既作用範圍，捂住受傷既右手，我feel到傷勢已經令我右手唔係好用到技能。
我望住自己岩岩出現既位置，一片範圍裡出現左好幾個扭曲點，將附近事物全部扭曲，人體同樹木抵受唔住元素既侵蝕，紛紛捲入混沌之中。我已經開始分唔到到底邊一部分係樹，邊一部分係人，所有野都扭曲埋一齊。
效果結束，森林既一角化成塵埃，就好似一個大球體既範圍憑空消失左一樣，而叛軍老大衣衫不整咁訓左係地，無法動彈，血肉模糊，有啲部分甚至見骨。
次元炸彈同次元轟炸依類魔法，利用空間既法則，將一切扭捏，就好似將所有野都拉扯去異次元一樣。
「空間魔法！」見到老大慘狀既叛軍大喊道，同時失去左戰意。
天耀帝國依個魔法使地位尊貴既國家，好少魔法使會特登走去做傭兵，通常都係一啲人數同力量都十分龐大既騎士團先會有。
所以會係細城市，或者依啲比較安全既護送任務入面出現既魔法使，係少之又少，而識空間魔法既魔法使就更稀少。
躲係一旁觀看戰鬥既商人同運送隊伍，依個時候都鎮定左。
由一開始兩方戰鬥，佢地就喱左入兩旁既森林，留意住情況。
得寥寥幾個識得戰鬥既人員上前為池目助陣，不過都很快不敵撤退。
「原本仲叫左支援過黎，原來根本就冇必要。」鬍子老闆笑言。
我同雷米係長長既商隊中穿插移動，收拾殘局。
失去首領既叛徒一方戰意盡失，逃走既逃走，倒地既倒地，戰事好快就結束。
雷米幫池目同受重傷既人做應急治療，而商隊人員都開始出黎整理商品。
唔少物品都冧低左，有幾輪木頭車亦都有損毀，要重新整頓都要花一兩個鐘時間。
……
戰鬥結束後，我同池目其他隊員將十幾個叛徒綁係樹下，由池目親自看管。
其餘隊員同一啲運送工人暫時組成巡邏隊，守備四周。
「依次真係好多謝你，方小哥。」池目感激道。
我擰頭，「多得你們拖延左唔少時間，我先可以先將增援擊退。」
「…」池目有啲驚訝，可能估唔到我一個人就將佢地趕走。「你介唔介意話比我知你幾多lv？」
「應該25。」
「睇落你得十五、六歲，估唔到已經依個lv。」
我諗一諗，依個lv係寧風長期係緣風林獵殺魔獸先至有既等級，如果正常冇訓練既人應該絕對唔會升得咁快。
「唔知呢，可能我鍾意打獵掛，你都唔差啫。」
「點同呢，我已經三十歲，三十幾lv唔係啲咩咁犀利既事。」
「都岩既。」
依個時候，鬍子走左過黎。
「兩位辛苦喇，我已經叫左支援隊伍過黎，最快我諗都要半日先趕到，所以暫時仍然要拜託你地。」鬍子。
「鬍子老闆，今次既事，係我既疏忽，真係好對唔住！」池目向鬍子行鞠躬禮。
「唔係，今次既事，大家都唔想，損失亦都係可承擔範圍，唔洗太過擔心。」
「唔係，請比我為佢地既錯誤賠償。」池目誠懇咁講。
「你都識講錯既係佢地，賠償當然係由佢地黎賠，我地商會會帶佢地去天臻城既官府，再作處置。」
「嗯…」池目失落地道。
「講起上黎，損失最大既應該係你地先岩，池兄弟，唔好太難過喇。」鬍子輕拍池目既膊頭。
「有心。」池目。
「係咁，方小弟，我地就唔好打擾池兄弟喇。」鬍子老闆向我打左個眼色。
「嗯。」我跟住鬍子走埋左一邊。
「身分證明既事，我都有幫你聯絡埋，我諗應該沒大礙。」鬍子。
「唔。」
鬍子望住我包紮過既右手：「依件事上面你都出左唔少心力，我幫你打個七折，點睇。」
七折？唔係掛，條數就好似唔係好岩。「起碼都五折喇下話。」
鬍子聽到，諗左一諗。「好，就五折。」
「不過行程因為依單野，可能要耽誤半日以上，你冇問題呀嘛？」鬍子問。
我鬆一鬆膊，反正因為身份證明既關係，我都冇得揀。
「呵呵，咁跟住黎落請繼續多多指教。」
───────────────────────────
備註：
１）
技能名稱：十字連斬
技能類別：通用系武器技能
技能屬性：無
技能效果：武器隨十字形揮動連擊，造成875（+0.12*物攻）的物理傷害，技能可計算在普攻連擊。
冷卻時間：10秒（隨武器熟練度增加而縮短）
２）
技能名稱：碎石斬
技能類別：通用系武器技能
技能屬性：無
技能效果：從高處向敵人砍斬，造成1150（+0.15*物攻）點物理傷害，從敵人背後發動時，暴擊率增加20%、暴擊傷害提升25%。
冷卻時間：16秒（隨武器熟練度增加而縮短）