「侯裕文系列」（1）《向港女說不》----------口語文: 第十二章：飛機場的作用

 「喂！」
這時家欣傳送給我的whatsapp內容，但礙於工作關係，我沒有即時回覆她。
當下班後，我再翻閱手機，看見家欣的另一個whatsapp短訊，佢問：「上次你個老友抄左我牌，點解佢唔打俾我？」
我心想：「佢唔打俾你關我叉事咩？你咁掛住佢不如你自己打俾佢。」
我給她的回覆也不算是友善，我把這句「咁你想點？」傳送給她。
接著，手機響起，明顯是家欣的來電，我接聽後說：「喂，講喇！」
「無咩特別，我只係好奇姐。其實你個friend係咪宅男黎架？」
「邊個先？」
「梗係抄我牌果個喇！」
「聰明仔嘛，佢梗係唔係宅男喇，佢似咩？」




「只不過我想講明宅男唔arm我姐。係呢，幾時出黎食飯？」
「星期六喇不如。」
「咁好喇，到時見。」
說罷，她剛好掛線。接著，我立刻致電聰明仔，他也很快接聽了電話：「喂，咩事？」
「無呀，想問下你唸住幾時搵家欣？佢向我投訴丫。」
「下？投訴咩？」
「佢話你抄左佢牌之後做咩唔打俾佢？」
「我都唸唔到有咩同佢講？大不了星期六我約佢出黎食飯囉！」
「星期六？佢約左我喎，不如一齊喇！」
「都好，我有D騰雞，有你係度可能會好D！」




「咁我同佢講聲先，不過我唸佢應該唔會介意。」
「好喇，咁到時見。」當掛線後，我立即用whatsapp問家欣：「星期六晚聰明仔都出黎，你無意見嗎？」
「下？點解約埋佢？」
「佢話想了解你多D嘛！」我邊笑著邊打這個訊息。
「佢真係咁講？」
我略為遲疑後才回應她：「佢係呢個意思。」
接著，她已經沒有回覆我，而我也沒有理會她便開始睡覺。距離約會前一晚，家欣致電給我，她開口便問：「點解佢唔自己約我？」
「佢想約你，不過我地撞左期，我唸一齊你唔會介意卦？」
「哦．．．咁．．．無野喇！」她的語氣像是不情願似的。
「無野？你好似有D野喎。」




「真係無野呀，我想訓陣先，今晚要開工。」
「咁早D訓喇，聽晚見。」
說罷，我立刻掛線。當日下午，她致電給我問：「今晚幾點？食咩？」
「七點，裕華國貨等。唸住去廟街食煲仔飯。」
「八點得唔得？」
「好，到時見。」
說罷，她先行掛線。但看她的聲線很不耐煩，不知道是否不喜歡吃煲仔飯的關係？但吃甚麼東西也有商榷餘地，只怕是沒有這個機會而已。晚上七時五十分，我率先到達裕華國貨，當我致電給她時，第一次她cut我線，但我只是想是否她正在忙於化妝換衫？最多只是遲到而已。但當我再次致電給她時，電話卻是長響，連續三次也是這種情況後，我才意識到她是否「放飛機」？此時收到聰明仔來電，我接聽後說：「喂，你去到邊？」
「我就到，你呢？」
「我已經到左。」
「得喇，我應該就見到你。」
說著，他已從對面馬路急步迎著我的方向而來，我們也同時收線。
「咦？家欣呢？」聰明仔未停定已經問。
「我唸你要有心理準備，佢可能放飛機。」
「下！唔係卦，搵下佢喇！」
「我已經打左幾次，都係長響，你打喇！」




結果，無論我們輪流打了多少次，電話仍然未有人接聽，接著我發晦氣說：「唔好打喇，我地食野先。」
結果，呢餐只有我和聰明仔二人，我們也嘗試分析家欣甩底的原因。其中一個疑點就是她cut線的時間跟whatsapp所顯示的最後上線時間是一致，所以我會覺得她在家裡睡了。而其他原因也許是她根本對聰明仔沒有興趣，從現實角度想也許她覺得這頓飯需要自掏腰包，所以唔想出來應酬我們。但無論甚麼原因都好，放飛機絕對係一種不負責任的行為，基本上她已經一鋪清袋，只是我仍未宣佈她死刑而已。晚飯過後，我和聰明仔由佐敦步行至旺角，我們坐在朗豪坊後面個公園的長椅上，此時也差不多十一時，而她whatsapp的最後上線時間也是一直停留，可能她睡了吧！結果，我們差不多十二時便離開旺角，而離開後即使我再whatsapp給她，就算是她有重新上線也好，她也沒有回應，大抵是怕我怪責她吧。（續）