百份百工作: Episode.7

8點9。
 
火仔同Peter一出行人隧道，就點住口煙，同時望住Cable行入麵包鋪。
 
Peter擔住口煙，問：「Cable條友朝朝食腸仔包，唔悶既咩？」
 
火仔指一指麵包鋪：「我話Cable想溝女多過想食腸仔包…」跟住，見到Cable係麵包架前揀來揀去又反來反去，煎牛扒咁樣，見到一個女仔走埋收銀處，Cable先拿拿林夾起個麵包比錢。
 
「拿！我都話架啦！」火仔得戚到丫。
 




「係喎！呢D微絲細眼野真係唔夠你叻！」當然，同樣賤格既Peter，只係諗緊點樣係公司唱Cable食麵包妹。
 
「屈Cable食早餐！」火仔講。
 
「早餐？屈佢請食全餐啦！」Peter又講。
 
「全餐？早晨全餐呀？」
 
「凌晨全餐好D喎…嘻嘻嘻…」兩條友既死賤樣，正常人都真係想煎佢地兩巴。
 




究竟Cable係唔係真係想溝女？Cable自己都唔係好知…不過佢確係好鍾意見到呢個麵包妹…暫且叫佢麵包妹…點解？因為麵包妹每日都笑得好開心，好幸福，係返到公司食屎之前見到呢D笑容，係會開心D。
 
之但係……
 
事隔三日。
 
9點，公司門口，Cable拎住袋腸粉。
 
「哇，Cable，乜你今朝唔食腸仔包呀？」Peter一臉驚奇。
 




「喂，Cable 你好病喎，腸粉同腸仔包兩樣野0黎架喎，咩呀，唔見左麵包妹呀？」火仔無心插柳。
 
偏偏一矢中的，Cable窒左一窒，講：「乜食腸粉唔得0架咩？」確實，連續兩日，都唔見麵包妹，今朝，終於鼓起勇氣問一問，原來麵包妹辭左職。
 
「噢！無麵包食。」火仔見到Cable個樣都估到係咩事。
 
「噢，無戲睇，咁去食煙啦。」Peter捉走左火仔。
 
就係咁，一日又開始。
 
做呀做，其實日復日都係咁，不過Cable今日硬係覺得差少少，結果，十二點，Cable唔係好頂得住，落左去買咖啡。
 
點知，係樓下星巴克，就見到麵包妹，變左咖啡妹，除左套制服唔同左之外，一樣，臉上掛住幸福既笑容。
 
「唔該…要杯Cappuccino……依，你咪係街口麵包鋪做既？」哇，Cable都撘訕得幾……硬夾…




 
「係呀，先生，我都認得你，你好鍾意食麵包架嘛。」麵包妹一邊找錢，一邊講。
 
Cable講：「你又知？」
 
「係呀，你朝朝揀麵包揀到好似煎牛扒咁，你一定對麵包好有要求。」哇…Cable滴一滴汗…好應棍…而麵包妹繼續充滿住幸福既笑容，走去沖咖啡。
 
「渣…」咖啡機既聲音響過不停，麵包妹好認真咁沖緊咖啡，比起幸福既笑容，認真既樣一樣好睇。咖啡已經沖好，麵包妹去到櫃面，拎比Cable。
 
「依，點解你唔做麵包鋪既？」見無乜人，幾悠閒，Cable繼續同麵包妹傾計。
 
麵包妹望一望四圍，見無乜人，又講：「嗯…因為我覺得係麵包鋪做已經唔幸福。」
 
「下，係麵包鋪做係幸福？」Cable心諗，麵包妹真知足。
 




「係呀，曾幾何時，我覺得每日都可以聞到最新鮮既麵包香，係件好幸福既事，所以我做麵包鋪…但久而久之，我每朝聞，去到某一日，我覺得麵包唔再香啦…而我又覺得咖啡好香，覺得日日可以聞咖啡，好幸福，咁，我咪轉工咯。」麵包妹繼續一臉幸福既笑容。
 
「咁依家咪幾好咯，搵到自己真係鍾意既。」Cable一邊飲住咖啡，一邊講。
 
「但係我係唔係真係覺得麵包唔再香？其實又唔係…呢幾朝無再聞到新鮮既麵包香…我又有D掛住…你知唔知，嗅覺係最呃人既感覺，你明明知佢香，偏偏過左一排，你就會習慣，你就會覺得唔再香…但其實，明明係聞緊同一種氣味…感覺一樣，感受卻不一樣，同樣的氣味，卻由幸福變不幸福…但離開後，又覺得從前好幸福…」
 
「嗯…你好似仲係好掛住麵包…咁你有無諗過，返去麵包鋪做？」
 
「如果返去做，咪否定左我既離開既決定？」
 
呢一句，Cable大有一言驚醒之感。
 
Cable同麵包傾得投契，旁若無人。咁唔好彩，火仔同Peter咁蛇落街，見到晒。
 
Peter擔住口煙講：「Cable條友仔，有料到，一係唔出手，一出手，傾咁耐。」隔住大廈既玻璃，都feel到兩人幾咁投契。




 
火仔一臉讚嘆：「真人不露相，露相非真人，原來係高手，失敬失敬。」
 
「凌晨全餐無走雞，嘻嘻。」

https://www.facebook.com/kofigarden
 
(待續)本故事全屬虛構~如有雷同~實屬巧合~