【特工】《虔誠者》: ──黎明騎士團篇──(171)

當我找到個空檔靠近黑袍男之時，他又好像聽到我的步伐聲，而猛地攻擊住我躲藏中的掩護物。

「吼……！入嚟之後真係諸多不順！！」黑袍男憤怒地大喊。

「鏗鏗鏗鏗鏗鏗鏗──！！！！！！！」我藏在後面的鐵櫃子被子彈打得鏗鏗作響，相信捱多不久便會被子彈破穿。

唯有用毒霧解決他吧…

隨即，我右手運起毒素到掌心之中凝聚毒力……





就在我準備要撲出放毒之時，我赤灼之眼留意到有個人以非比尋常的潛行步法，無聲無息地溜了進來，乍然拔出一把太刀衝向黑袍男！

一聲嚎叫，手起刀落一分為二；緊接的一聲哀叫，黑袍男倒斃於地。

而我則慢慢化解回掌心的毒霧，問：「你…係……忍…」


「出嚟再講。」這把聲，的確是忍蛋。

黑袍男一伙人已經死光的關係，所以我都不防有詐的離開，與他在工廠外面碰頭，但我沒想過會在九龍寨這種地方重遇他。





「忍蛋你點會喺到…。」我問。

「聽講「死靈飛盜團」行蹤落過嚟呢到？」忍蛋不以為然地說：「所以我落咗嚟九龍寨，咁啱聽講依班人有佢哋情報……不過似乎佢哋都已經死哂。」

「唔好意思…」我把繃帶包紮回到手上：「依班人對赤兵隊有不軌企圖……我順手嚟收拾佢哋。」

「你又點會喺到出現？」忍蛋問。

「講起上嚟都幾長……」





「就去一邊浸浴一邊飲酒講！」忍蛋淺笑著說。

九龍寨西部，歡樂街４５號店──快樂浴堂。

熱騰騰的蒸氣於浴場中漫延，忍蛋熱水池中享受得不易樂乎，而我最多只能坐在外面一部按摩椅上喝喝熱牛奶，因為我一進去浴場應該會死不少人。

「客人，請問仲要唔要添啲熱牛奶呢？」一位穿住和服的年輕小姐問。

我搖頭：「唔。」一杯熱牛奶也費去我不少盤串了。

原來從亞歷山大‧費耳房中搶來的地圖，是他們赤兵隊明天要去交易的地點……某程度上我幫助了他們化解危機吧？那群黑袍商人好像早就預備要把赤兵隊幹掉。

假若他們明天一到交易地點，發現那些黑袍男都死去的話，會懷疑那些神經毒素貨品是我偷的嗎？雖然……是墨龍在剛進入九龍寨時弄不見的。





說起上來…忍蛋也挺花得起錢，在九龍寨泡一次熱水浴大概要這裡的人平均一個月工資。

像眼前這些服侍著客人的小姐，差不多都是在上面的世界欠人錢而被迫下來工作還債，當然……應該一輩子也不會還清就是了。

「呼～舒服哂。」忍蛋按住頸背，走到我旁邊一部按摩椅坐下：「講番正題，你點解落嚟？」

之後，我便把自己與赤兵隊的事情一切全都告知他。

「原來係咁…惜日嘅戰友，如今都變成敵人。」忍蛋感嘆地說。

「如果我見到輓歌之後講清楚件事都唔得…咁我就算。」

「算？」

「即係…就唔再糾纏落去。」我合上了眼，繼續說：「不過……我越嚟越發現好多赤兵隊不為人知嘅秘密，包括一份睇唔明嘅機密文件…我推測赤兵隊訂咗一批神經毒素，不過唔知用途。」上一次跟墨龍運著貨品入九龍寨的時候，就感覺到內含住毒素。





「上次見你喺古家，都冇乜同你點講過就走咗。」忍蛋喝起桌上的橙汁。

「嗯…」他的說話讓我忽然記起，老爺子跟我說過的一宗交易。

只要把古薇艾兒利益上的敵方勢力全都滅去，便會把霞轉交給我，但卻使她好像變了一件貨品一樣。

「忍蛋…我問你一個意見。」我說。

「問～」

「如果你係個小混混…鐘意咗大黑道家族大哥一個妻子，而個嗰家族嘅龍頭大佬同你講，只要你殺死所有同佢哋有利益衝突嘅競爭幫派，就會將個妻子俾咗我，咁我仲應唔應該……」

忍蛋稍為望了我一眼，語重心腸地說：「首先，你要知道……人永遠無可能殺得完，你殺完一個人…個嗰人可能就有三個朋友幫佢報仇，幫佢報仇個三嗰再俾你殺死…個三嗰人又有可能有朋友幫佢哋報仇，怨怨相報何事了？」





「…」我點點頭。

「不過，你都識講人哋係個黑道家族……小混混，都應該唔會咁唔自量諗住自己一個人嘅實力，就可以搶完人哋妻子再走佬。」

「所以話，我應該壯大自己勢力先？」我恍然大悟。

「喔？乜個嗰小混混係你咩。」忍蛋暗笑道。

「…講下笑，只係睇到有套電視劇咁講先問下你。」