《高登獵殺遊戲》(情景題變講故 ): 被捉實驗 驚到甩肉

「魂！初弒之刃！」句號初弒佢只係細細聲咁大嗌。

之後就好似一陣風咁飛左過我度…

一時三刻間，我真係唔知發生左咩事…

但係…

我淨係知道自己已經暈左。





…
…
… (暈左既期間)

「呢度係邊度黎呀？」醒左之後例牌既第一句。

「我屋企。」回應我既係句號初弒。

「你想點呀？」我驚到鼻哥窿都冇肉咁大嗌。





因為我發覺我四肢都俾人綁住晒，仲訓左響張凍到鬼咁既手術床度。

「冇咩點，我想做個實驗。」

「實驗！？我唔要做人型蜈蚣呀！」

「邊個話你做人型蜈蚣啫，你係做不似人型蜈蚣呀。」

「仆…屌…」我好想鬧佢，但係而家我就連鬧佢都唔夠薑…





「你…我同你都算有一面之緣丫。」我最後只好咁講，希望佢乃念大家相識一場。

「所以我記得你咪捉你黎呢度做實驗囉。」佢咁回應。

「相逢何必曾相識」既感覺，我終於明白。

「你…你打得贏我朋友？！」我已經心知不妙，惟有講其他廢話…

希望拖多D時間，等人黎救我。

「你唔使諗住拖時間喇，你朋友已經打輸左俾我，呢度山卡拉咁遠，冇人會黎救你。」

「你…你條粉腸！夠撚膽同我正面打過！」我已經驚到失左控，所以咁樣大嗌。

我仲不斷咁爭扎。





而佢就好冷靜咁烏個頭埋黎我度講：

「第一，我有名你叫，第二，撚膽係乜黎？第三，我習慣同人地背面打過。」

「咁…咁…大佬，你究竟想點呀？」我再次驚到鼻哥窿都冇肉。

「都話做實驗囉，不過你放心，頭先係嚇你啫，我唔係想將你變成一條不似人型蜈蚣。」

「真既？」

「假架。」

「唔好玩啦，大哥，我瀨尿喇。」





「咁變成兩條不似人型蜈蚣囉。」

「屌！你D廢話仲多過我班Friend呀！」我而家已經近乎黐線，心情好複雜。

「喔 ~ 其實…我只係想同你做個TSA啫。」

「吓！？哈哈，我仲以為係咩添，原來係濕鳩TSA咋呀，TSA呢家野，難我唔到既，黎啦，放開我D手腳俾我做啦。」聽到TSA我反而放鬆返D。

「不過此TSA不同彼TSA，我呢個TSA，係講緊The Scary Assessment，一個恐怖既試驗。」

「乜…乜撚野黎架？」我又再驚起黎。

「植入式廣告呀，TSA考試慌骰，都係作呢個故條粉腸作架！」

「植入式廣告！？咁…究竟點恐怖法呀？」我震住咁問。





「你睇過咪知囉。」

「屌！我講你個實驗呀！」一邊驚一邊發嬲既心情，真係人都癲。

「攪掂架喇，純粹只係想試吓當人類受到死亡恐懼威嚇果陣，人類有咩特殊反應啫。」

佢講完之後就開始幫我解鎖。

「咁…咁你試到D咩出黎？」

我捽一捽D手腳，鬆綁之後，真係一身都鬆晒，鬆到好似甩散較咁。

「你唔係人。」句號回應我問。





「你係咪想我真屌你呀？」鬆綁左之後，講野都輕鬆返少少。

「咪攪我，我唔係基不擇食既人。」

「咁你即係認基啦。」

「我講呀，你能力上面已經唔係非一般既人類。」句號再講。

「咁我係咩呀？」

「錦鯉我知係魚，「咁我」我唔知係咩黎。」佢一邊執緊D手術用品。

我冇理佢，直接就行左出門口。

「門口左邊手攞返五十蚊車馬費啦。」佢再講。

「咪住先，太低B好似唔太合理，你真係打贏左我朋友？」我另返轉頭問佢。

佢冇出聲，淨係笑笑口及左一吓頭。

「咁…呢度究竟係邊度？」

「我屋企。」

「咁…你想點呀？」

「冇咩點，我想做個實驗。」

講到呢度，我真係有D驚黎左個無限Loop既空間…

所以都專登唔講野住…

直接行左出門口睇吓。

而門口出面既，竟然係一個嘈怨巴閉既大街。

「旺角行人專用區！？」我忍唔住大嗌左出黎。