《高登獵殺遊戲》(情景題變講故 ): 骷髏堡主 車神大戰

聽我嗌「有落」之後…

(必 ~！) 女司機真係急停左車。

「點解…點解…」佢仲係咁自言自語添。

而幽靈戰車就因為收唔切制，好自然咁抄左落山。

「點咩解啫？開門啦，車神！」屎忽講。





之後，女司機佢真係傻戇戇咁開左門…

而我地就一個一個咁落車，直到到左最後一個想落車既我果陣…

佢突然咁問︰

「你點解知道我個名？」

「吓！？咩名呀？」我反問。





「司機街口有落。」佢回應。

「司機街口有落！？你講…你講呢個係你個名？」唔係奇怪呱個名。

「無錯！你究竟係點樣知既？」點知佢真係咁答。

「黐線！我想落車咋！」我理所當然咁回應。

「冇可能，因為正常人落車，應該會講『司機，街口有落丫，唔該。』，但係你既語氣好唔同。」個女司機仲要咁講。





「哈哈哈，唔好意思囉，我都知我係冇乜禮貌，下次唔會架喇。」我有D尷尬。

「唔係咁架！你…會唔會就係我命中注定既如意郎君呢？」佢竟然仲咁講。

哇！講到咁，想嚇死人咩？

「吓！？」我只好咁樣回應，扮傻先。

當我仲傻傻呆呆之際，小姬同惠那一聽到咁就知有唔妥，仲想一齊拉我落車…

(你條友又FF，成日發夢D女爭奪你。)

點知唔夠女司機閂門快手。

佢一閂左門就立即踩行油去…





而我就仆左去後座…

「喂！乜又你呀陳生？」跌左落地，要拿返咋沙，唔想失威既我，唯有大嗌

「佢最多咪陳小姐。」突然有把聲響我旁邊傳黎。

「你又係邊位呀？」我問。

「好話喇！石屎虧劃主任是也。」

「你幾時上車架？」

「頭先見你唔落車，我咪上車囉。」





「咁…咁你地想點呀？」我問緊個司機同呢條友。

「我同靚女司機唔係一伙既，我想落山啫。」

「佢！？你旨意佢！？」我再問，意思就係個女司機信唔過。

「人家係司機，唔旨意佢唔通旨意你呀？」而佢又講得幾岩。

「佢會抄落山架喎，你唔驚死咩？」我尷尬中帶點驚慌詢問。

「哈哈哈，死！？係咪即係咁呀？」

之後佢將自己個人頭抆左落黎…

呢一刻，我嚇呆左…





好Q恐怖呀！

當時場面恐怖，好在仲係朝早…

「你…你究竟…又係咪人呀？」我驚惶中希望以問題阻止佢有機會傷害我。

「骷髏頭堡堡主，石屎虧劃主任是也。」點知佢好有禮貌咁回應我。

「佢係人黎架，不過就有甩頭甩骨既能力，住響後山架。」女司機插口。

「咁你…你呢？你究竟又想點呀？」我問女司機 。

「我揸緊車本來唔應該同你地講野，不過我可以話你聽，我雖然覺得你好特別，覺得你會對我既生命產生好大變化，不過未至於要做到搶親呢家野既，我要即刻開車，完全係因為唔開車既話，死既就係你同我。」女司機再講。





「我唔明噃。」我講。

「你睇下後面。」佢回應。

我響後面玻璃望出去，發現…

幽靈戰車！？

「佢…佢唔係抄左落山喇咩？」我好驚訝。

「以靈魂騷動你，其實都係人黎，不過佢身附奇異亂神怪力，有殘像﹑鬼影之類既能力。頭先佢根本冇抄落山，而係從後再追上黎，問題係我之前都有講過，對過佢既車手，除左我，冇一個係生存既，原因係…佢除左係幽靈車手，仲係一個會奪人命既車手！」

當司機街口有落女司機講到呢度果陣，我突然眼尾梢到…

幽靈戰車已經響我地既右手邊，仲好似…

唔止想過我地頭，而且似乎係想逼我地衝落山一樣。

係呢D時候，我除左信任女車神就再冇任何選擇…

(改左口既？唔係女司機 喇？而家係女車神喇？)

「呵呵呵。」 骷髏頭堡堡主竟然仲響呢D時候笑！？

唔通佢對女車神充滿信心？

「死人頭堡主，次次驚死果陣就響度『呵呵呵』。不過我可以話俾你，響我架車，一個人都唔可以死！」女車神咁講。

之後佢一個耷頭，個軚一扭，架車就飄移咁飄…

我睇見住架車要飛出山邊，除左做好死既準備，根本乜都做唔到…

但係…

響呢個時候…

女車神竟然…

「凌晨小巴極限飄移！」

之後我地架車竟然…

將幽靈戰車成架爆開左。