【江湖故】《響朵砵籣街》: 第二十四章
華仔見到碎料良，立即走上前︰「點啊你？死得未？」
碎料良說︰「碎料啦，食幾拳對我嚟講好少事。」
然後碎料良將聲線壓低問︰「係呢，點解你會請到肯德基嚟幫手？」
華仔想了一想，覺得碎料良是一位真兄弟可以信任，所以也沒有什麼好忍暪的，直接說︰「見同你都算係出生入死，講個秘密俾你聽吖，我係上校個仔。」
碎料良聽到這個簡單的答案後，馬上瞠目結舌久久說不出話來。過了好一陣子，才吐出一句︰「猛料喎…」
肯德基跟身邊的兄弟打點了一切後，就對華仔問︰「係呢華仔，你大佬係邊個啊？」
「大哥雄。」
肯德基望望身邊的兄弟，只見那兄弟搖搖頭。
肯德基再問︰「咁你阿公係邊個？」
「牛下刀仔。」
肯德基又望望身邊的兄弟，那兄弟吐出一句︰「石頭啲靚。」
「嗯，華仔，你跟住嗰個咩大哥…大哥…」
「大哥雄。」
「係係係，大哥雄，你跟住嗰個咩大哥雄要發圍好難，有排先上到位。不如咁啦，你過嚟跟我啦！你個大哥雄今日都唔撐你，做大佬唔係咁做架！哩啲咁嘅大佬，早走早著啦，我會同石頭講聲，話你跟我嘎啦。」
「基叔，我可唔可以同碎料良一齊過嚟跟你？今日嘅事我覺得鬍鬚狗嗰邊一定唔會就咁算數，嚟緊嘅日子我同阿良都會好有危險，我唔想好似自己一個走咗咁樣……」
「嗯，你叫阿良？」肯德基望著碎料良問。
「係啊，人哋叫我碎料良。」
「聽華仔講你幾好揪架喎。」
「唔係，碎料啫，學過下咁。」
「可以兩三招KO到件潮州佬，應該都幾好揪嘅，你想唔想過嚟跟我啊？」
「可以跟到基哥你搵食係我嘅榮幸，我當然想啦！」
「哈哈哈！好，以後你兩個就跟我啦！儀式嘅野聽日先搞啦，我今晚會打電話同你哋啲阿頂講聲。阿良，你睇哩個場，係唔係老義大聖支水架？」
「係啊基哥。」
「好，我會同大聖仲有石頭講聲，應該唔會有咩問題。聽日開始你兩個就跟我，近期出入自己小心啲，我會俾個場你哋睇，你哋兩兄弟拍住上，記得攪到好好睇睇啊！」
「係嘅基叔，其實我仲有一個不情之請……」
「講啦。」
「我喺大哥雄嗰邊有五條囡跟我搵食嘅，可唔可以帶埋佢哋過嚟？」
「哈哈哈，果然同你老豆一樣，對啲囡囡都係咁上心，啱架！無佢哋嘅付出我哋都搵唔到食。嗰五條女我會買左佢，以後都照跟你搵食啦！一個場五條女未必夠，要女就搵佢」肯德基在他的兄弟群中拉出一名樣子俊秀的男子。「佢叫跛康，馬王跛康，佢啲女好多，燕瘦橫肥咩都有，哈哈。」
華仔看見跛康，不自覺地往他的腳上看。
跛康笑笑說︰「哈哈，我無跛，跛康係個朵啫。你要女嘅，我一定留返啲一班馬俾你。」
「咁多謝你先。」
交代完所有的事情，大家就散去了。
碎料良跟著華仔一同回到私竇，畢竟今日發生的事情太多了，心情變得很複雜，面對這樣的心情，不會有人想獨處。
過了這麼多事，天也快要亮了，他們兩個也只想回到私竇休息一下。
華仔打開私竇的門，除了小紅以外四位囡囡一同衝了出來。
華仔被突然衝出來的人群嚇了一下︰「嘩！嚇撚死人咩？你哋仲未走嘅？」
朱古力擔心地走上前，抱著華仔哭了起來︰「你無事做咩唔打個電話同我哋講！你知唔知我哋會擔心架！」然後就一直往華仔身上打。
蘋果也哭了起來︰「你無事就好喇，你無事就好喇。」
Mary愧疚地啜泣起來︰「一日都係我唔好，搞到咁大件事……」
碎料良︰「傻啦，咪一早講咗唔關你事囉！」
華仔大聲說了句︰「喂好喇好喇！你哋唔好再喊啦！我哋無事啊！」
Amy︰「最後件事係點解決架？」
碎料良︰「嘩！你都唔知，我哋華哥仔原來係猛料嚟架！」
然後，碎料良將事情的經過一五一十地說了出來。包括華仔是上校的兒子，他們現在跟了肯德基等，無一遺留地說了出來。
Amy︰「算你都仲記得我哋！走都帶埋我哋，都叫無白擔心到。我打俾小紅同佢講聲先，佢要返屋企湊細路所以走咗先，叫我一有你哋消息點都要通知佢。」
Mary︰「係喎，之前華哥你又話唔識邊個鬍鬚狗……但係佢係你殺父仇人，你無理由唔識架？」
Mary一說，大家的眼光立即往華仔身上看。
華仔︰「係……我講咗大話呃大家，因為俾人知道身份係一件危險嘅時，今次都係迫近無奈先會去搵基叔。鬍鬚狗一直都想殺咗我，所以我先扮唔識佢，向你哋收風，知多啲關於佢嘅野…對唔住。」
碎料良︰「得啦！哩啲碎料啫！有咩所謂！」
蘋果︰「咁而家鬍鬚狗知道你係上校個仔咪好危險？咁你出入要小心啊！」
華仔︰「其實而家佢都未必真係知，但可能都會估到少少。你哋都唔好周圍同人講，你又係嘅良哥，哩頭同你講秘密嗰頭就爆大鑊！」
碎料良︰「哈哈，係喎，不過人哋幾個女仔等我哋咁耐，又喊晒口咁，你話唔講真話點解釋喇？」
朱古力︰「總知你哋以後自己要小心啲啦！唔好叫我哋再擔心你哋！碎料良，你啊，要睇住佢啊！」
碎料良︰「得啦！碎料！」
華仔︰「你哋都攰喇！快啲返屋企休息吓啦，聽日仲要去新場開工。第一日睇場成績唔可以差啊。」
華仔說完，大家再寒暄幾句就各自回家了。
房間中剩下華仔跟碎料良，經歷了漫長的一天，身體是累壞了，心理上卻還未睡得著。