《男人多情而長情，女人專情而絕情》: 第二十七章
我輕輕敲一敲個Sir滑梯，然後震左一下，我知康僑一定係嚇親。
「康僑，係我呀。」
佢無應我。
「對唔住呀，我知你依家你唔想見到我，咁你俾我咁樣隔住同你講野呀，好無？」除左咁，我諗唔到其他方法可以處理呢件事。
佢仍然無講野，但我應該比岩先更大聲既抽泣聲。
家姐佢講得岩，佢真係唔可以再受到傷害。
偏偏傷得你最深既，係無時無刻係你身邊既我。
因為只有我，先知道你邊度最痛。
我唔忍心見到你受傷害，但你所受既傷害，係我造成既，真係矛盾。
對唔住，我最後都係俾唔到幸福你。
我繼續留係你身邊只係令你喊得更西利。
我起身，想離開既時候，康僑佢出聲：
「你講啦，點解？」
「KaKa佢鐘意左我，而我亦對佢有D感覺，岩岩moment幾好，佢就錫左埋黎，就俾你睇到曬。」
「但我愛既真係得你，我岩岩搵你，搵左你好耐都搵你唔到，我真係好擔心你。」
「我想像唔到失去你會點樣，我真係唔想你離開我。」
「你岩岩咁樣你叫我點信你呀！？！？！？！？」佢勁大力咁打左個Sir滑梯一下，嘶聲力竭咁嗌。
我俾佢嚇親，係真係驚嚇果隻。
康僑未曾試過咁惡同我講野，可見我真係傷得佢好深....
能傷你最深的人 偏得你心
我能夠咁樣傷害佢，證明佢真係毫無保留咁相信我。
對佢黎講，我係最後一絲希望黎。
我萬萬都估唔到我會咁樣傷害，我諗，如果當初佢揀左方子龍，可能會仲好。
「你講呀！！！！！」佢喊得仲西利。
我無言以對，錯乜都係錯，講多錯多。
「我覺得無左同你當初同你一齊既感覺......」對住康僑，我真係唔想再講大話呃佢。
「唔會係咪感情太平淡所以....但係你對我黎講真係好重要好重要，我唔可以無左你。」我就咁坐左係地下，背對住康僑。
「可唔可以俾多次機會我？俾多次機會我對你好呀。」我唔想呃佢，因為我既良心真係過唔去，每一刻我都責備緊自己既良心。
其實我只係想令自己既良心好過D.....
佢無出聲，我知佢一時之間好難答到我。
我清楚，亦都理解，畢竟做錯野既係我。
一分鐘一分鐘咁過去，我無得到任何既回答。
時間耐到我忍唔到，轉身一睇，發覺後面空無一人。
我即刻跑入去Sir滑梯度睇，人呢？又消失左.....
搞咩呀又，又唔見左人。
睇黎佢係我等既時候，無聲無息咁走左。
真係怪自己大意，做乜要背住佢？
佢應該從裡面既影子睇到我背住佢，知道我睇唔到佢掛？
連一次既機會都唔俾我，呢個就係康僑既答案。
係幾灰機既其實，但亦都明顯不過，康僑既決心。
我終於捨得返去，今日太攰啦，好攰，我感覺到自己身心已經到極限.....
我想將呢件事同家姐講，今朝先同佢食完個飯，講左一輪，今晚就搞到咁。
但返到去屋企人都訓曬。
我份人即使幾攰都好，都一定會沖完涼先訓，如果唔係成日好唔舒服。
一路沖涼一路回想返起今日發生既事，好似將呢10幾年黎既事情堆呢一日咁。
真係承受唔起，好攰既狀況下，仲好痛.....
唔知仲有無機會同康僑和好呢，定從此成為陌路人？
我帶住呢個問題入睡，但訓唔好。
迷迷糊糊間，我好似見到康僑既背影。
佢背住我越行越遠，直到我見佢唔到就醒左。
個夢唔算係好真實，夢入面果個都唔知係唔係康僑黎既。
我閉起雙眼，見到既係康僑對我絕望既樣。
這一生也在進取 這分鐘卻掛念誰
張國榮 —— 追
但果種痛既感覺好真實，佢真係越行越遠。
我望住我間房入面既天花板，呢種感覺俾我又好唔真實。
彷彿夢境先係真實，現實卻係虛幻咁。
我拎起部手機睇下有冇人搵我，一睇，係有人搵我既，不過唔係康僑，而係KaKa。
佢whatsapp我幾個表情符號，係類似咁樣既表情符號：
我既心情更加低落，再禁入去康僑個whatsapp度。
無頭像，無上線時間，無status，好明顯佢做得好絕。
望住佢最後同我講果一句說話，係佢出街同朋友食飯，就出去既時候講既—我愛你。
可惜既係返唔到轉頭。
當我訓醒既時候，我家姐又走左去，想同佢傾都傾唔到。
想搵康僑搵KaKa亦拉唔落面子，琴晚既事對我黎講沖擊實在太大。
我係張度玩緊手機，望返我同康僑之前既相，佢笑既幾咁甜蜜......依家呢？
不停loop返以前D相，一路睇返起聖誕節既相，果時既我好溫馨嫁，做咩野搞到依家咁，咁快就唔記得左之前既野。
人係犯賤既，越痛越係想去糟蹋自己，得自己再痛D。
你失戀同班fd去唱K你唔會唱「紅日」咁激昂咁勵志呀？你實會唱返D失戀歌，等自己慘情D。
我就係咁樣折磨自己。
但睇睇果時聖誕節既相，我睇返起一張相。
一張方子龍寫俾康僑既信。
我無睇過，因為我想等我同康僑散既時間先睇。
我相信我呢世都唔會有機會睇到呢封信既內容。
可見當時既我係幾咁想同佢行一世。
但年輕既我邊度甘心就咁平淡過一世？
無經歷過風風雨雨，係唔會明白風平浪靜係有幾咁珍貴。
後生經得起風浪，年少氣盛，咩都唔怕，係要吃下虧先識死。
依家我明白啦，所以先會好似網絡上面D人講，失去左先識得珍惜。
我心諗都傻的嗎9既，成日上網都見呢D飛機文。
呢D野點會出現係我身上？我咁既條件識到康僑已經好好，仲點會唔珍惜？
所以我真係傻的嗎9。
To康僑：
Hi，康僑，我係方子龍，聖誕節快樂呀。
呢一次係我第一次寫聖誕卡俾女仔，呢張唔可以話係聖誕卡黎既，係聖誕信。
以前都係女仔寫俾我多，所以我真係唔係幾識寫。
你對我黎講係一個好特別既女仔，心地係如此善良，呢樣野比所有野重要。
華dee佢心地都好好嫁，佢為左你都做左好多野。
我樣樣野都比華仔好，但就係唔夠佢溫柔體貼。
我相信佢可以俾到你想要既野你，好好珍惜佢啦。
好老實講我真係好鐘意你，我唔係咁容易鐘意上一個人，但係你就輕易咁捉走左我個心。
依家既我，學習緊放低你，同時我都想你幸福，但你要我俾祝福俾你地我就做唔到啦。
華仔佢經歷過既感情唔多嫁，所以好多野都唔識，亦都唔知點做，你係佢身邊就多D教下佢啦知無？
我身為佢朋友我都會教佢既，有咩行差踏錯一定係Hi到佢岩為止。
只要兩個有心，無咩難關過唔到，有D咩事記住，記住，記住要好好溝通，唔好收收埋埋（因為好重要所以要講3次haha）。
華仔佢好錫你嫁，我好清楚。
曾經你地未一齊，我想追你既時候，我測試過佢一次。
果一次我睇得佢既真心，佢眼神既堅定不移，我就知會輸俾佢。
所以我先放心將你交俾佢，唔好讓我後悔曾經將你交俾佢呀。
睇完方子龍寫俾康僑既信，我個心更加內疚......
更加覺得自己配唔上康僑，呢個世界真係人善被人欺。
康僑佢咁善良，最終都係落得咁既下場，點解？因為有我呢D咁既Hi Hi囉。
我真係大徹大悟，17歲學識呢D野都唔係太遲姐？
我諗左好耐，我由起身果一刻係訓係床係咁諗野。
諗返起之前既野，諗返起以前傻的嗎既自己。
思考緊自己點解會搞到咁，我諗以後好難會再遇到好似康僑咁好既女仔。
直到我果一日訓，我都無起過床食過野。
但咁樣做都補唔返我心中既內疚。
呢幾日我每日如是，無動力打機，正係食少少野。
手機呢幾日無再響過，無再震過，連推銷電話都打過黎。
每日就係咁重複咁諗返起當日既畫面，我真係唔知呢D日子應該點撐過去。
有邊個可以幫下我
過左一個禮拜到，文西佢叫我打機，我先有動力打返機。
——————手機仍然無響過，康僑佢封鎖曬我所有聯絡方法。
呢個暑假我好似上一個暑假咁，毒住咁過。
上年同今年既分別就係......多了一份悲傷。
家姐佢察覺到我咩事嫁，佢有問我係咪唔開心。
我知我瞞唔到我家姐，我選擇咩都講曬俾我家姐知。
「如果你唔係我細佬既話，我一定會打勁死你呢D賤男。」佢語氣好重咁講。
可想而知我做得有幾錯。
「你應該記得我講過康僑唔受得傷害嫁啦？再傷一次我真係想像唔到佢以後點樣相信人。」家姐坐係我床邊講。
的確我自己係真係唔抵幫。
「但你係我細佬，我清楚你份人係善良既，今日你無經驗咩都唔識先行差踏錯，咪慢慢黎囉，你日後仲有機會，唔好再傷害人啦知唔知？」