《男人多情而長情，女人專情而絕情》: 第十四章
當時既我仲未領悟到呢3句野既真諦，每一句都係經歷過深刻既事，先開始慢慢熬製出黎。
「家姐，你係咪每段感情都學到野？」我真係好好奇。
「睇你咩心態，如果你玩玩下，自然咩都帶唔走，但你認真對待每一段感情，即使結果唔係我，你都可以係果段感情入面有所得著。」
「只要你正面咁面對同正面咁諗，咁果段感情帶俾你既野就係正面。」
「呢d得著會令自己有所成長。」
家姐佢好溫柔咁摸一摸我個頭，微微一笑咁搖搖頭。
彷彿佢好似睇透左一d野咁。
「家姐，咁你有咩成長呀？」
家姐佢頓時無話可說。
「我...曾經墮過胎。」佢一講，到我靜左。
過左一排我先識得反應，我個腦load唔切。
估唔到眼前咁親近既人竟然發生過呢d事。
「下？點會呀？你點會咁做呀家姐。」我仲係有d難以置信。
「點解唔會？呢d野有樣睇既咩？」
乜呢d野有樣睇既咩？我都問返我自己。
「咁你點捱過果度......時期？」一堆問題我想問。
我開一開門，客廳熄曬燈，老豆老母都訓左。
「繼續。」
「人生出黎就係受苦嫁啦，我以為識左佢，我人生就會美滿，但現實就係現實。我無怪到佢，佢都好錫我，但唔係愛就可以一齊，將來你就會明嫁啦。」
「愛唔係咁簡單，愛係好沈重，重到有時你喘唔過氣。」
家姐講出黎好輕鬆咁，但就連我都唔知佢經歷過呢d痛苦。
一想像佢去墮胎既畫面，我就忍唔住心痛。
我行埋佢攬一攬佢。
「下次有咩事，要講呀，我點都會係你既依靠。」
我諗，其實有時人係落難既時候，未必係想要人地既幫忙，只係想簡簡單單要人地支持，依家既我好應該支持家姐。
「有陣時唔係咩都要話俾人，果時既我真係啞巴吃黃蓮，有苦自己吃嫁炸。」
「呢D咁既事講出去，貪馨香咩？」
「經歷過呢D野，我先真係有D成長，唔再咩都係靠男人，靠自己仲好。」
「睇人會睇得更加清楚先會交心，所以即使依家有好多男仔追我，我都無受就係因為咁。」
「我之所以提醒你唔好再受傷到康僑，係因為我覺得我地兩個都好似。」
「都好怕再一次受到傷害，我地承受唔起果一種痛，痛到入心入肺。」
家姐講得好淡不驚心，但卻句句有力，直插入我心度。
我明白了師父，我真係明白。
我明點解女人會成日要男人估黎估去。
係因為好多野佢都選擇唔講出口，吞聲忍氣。
所以先想俾男人估佢既心思。
而男人無返一定既耐性，係唔會了解到佢地，通常係了解之前就會先唔耐煩。
「我明啦家姐，好多謝你講咁多俾我知。」
「雖然我真係唔明白你既痛苦，但之後無論發生咩事，我都會企係你果邊。」
講得出呢一句，就代表無論點，我都一樣咁信任我家姐。
「你唔洗明白，可以講出黎我已經好開心啦，唔洗成日收收埋埋。」
「早D訓啦細佬，養好D精神去見康僑啦。」
「好啦，唔好諗咁多啦家姐，早抖。」
訓上床之後，我諗左好多......
呢一晚，我知道自己將來應該點做。
我會好好咁對待康僑，呢樣係我唯一可以俾到佢既野。
第二朝，照舊拖住康僑返學。
方子龍見到我地都會有D傷感，睇黎佢真係唔似外面D人講到咁。
「Hi，方子龍。」康僑拖住我去同方子龍打招呼。
康僑捉得我好實，我明白佢想表示D咩，心頭感到陣陣溫暖。
「Hi，恭喜你地修成正果喎。」聽佢講出黎真係有骨既。
「多謝曬。」康僑佢撓住我隻手，好甜蜜咁講。
跟住佢就走開左。
返上課室，我同康僑講今日唔同佢食飯。
佢都好體諒我，話自己搵朋友食，都好耐無同佢地食，唔想冷淡左佢地。
咁我就去搵方子龍。
「方子龍，一陣lunch得唔得同我食餐飯?我有D野想同你講。」
我知，有D野點都要講清楚。
作為男人，我點都唔會再逃避。
為左自己心愛既女仔。
「好。」估唔到佢答得咁爽快。
我再走去隔離房搵文西。
我係佢班房叫佢出黎，「文西！」我都幾大聲嗌。
佢聽到就慢條斯理咁行出黎。
「文西，今日lunch唔同你地食啦。」我諗住dum低呢句就走。
「Hi，你都成日唔同我地食啦，慣左啦唉。」佢好大怨氣。
「我實會留時間俾你地既，我今日都唔係同康僑佢食。」
「下？咁你同邊個食呀？」佢既反應好似好驚訝我有邊個朋友願意同條毒向左走向右走食飯。
「方子龍囉。」我如實答佢。
「下？做咩無啦啦同佢食呀？你地仇人黎嫁喔，呢餐鴻門宴洗唔洗我幫手？」
文西佢好緊張我，抵我俾咁多狗糧佢食，真係乖。
「唔洗啦，我有D野要同佢講清楚姐，又唔係要去打交。」
「你唔係姐，人地係呀嘛，你都知有幾多人想畢你嫁啦，你咁樣衰。」佢真係好串咀。
「放心啦，我死唔去既。」
「你幫我報定警」我細細聲咁同佢講。
「收到！」
之後我地就各自走，等緊既就係lunch time。
到左lunch time，我同方子龍已經坐左係大家樂度食緊野。
「你有咩想同我講?」
方子龍依舊好似係公園咁，講野一樣單刀直入。
「你依家係咪仲鐘意緊康僑?」
我已經唔係果陣時係公園既我，既然你咁直接，我都唔會轉彎抺角。
「老實講，你地咁快一齊我都好驚訝，我諗住你地無咁快一齊，我仲有機會去爭取自己既幸福。」
「康僑佢份人心地好善良，由佢第一日轉校過黎我已經知道。」
「開學果日，我係巴士度漏左個銀包，岩岩一入學門口，我先發覺到，諗住放學去總站睇下搵唔搵得返。」
「咁康僑轉入我地班我都無咩留意佢，只係普通女仔一個。」
「點知小息既時侯佢拎返個銀包俾我，果一刻我真係唔知講咩好，難以形容果一份感激。」
「佢係巴士執到，諗住小息交俾學校，佢見到銀包入面有我張學證，咁岩同一班，就俾返我。」
「果時既我同佢講話請佢食飯報答返佢。」
「佢話唔洗，佢還返俾我唔係為左要我報答佢，之後佢就返埋位。」
「由我一刻我就知，佢係我一直搵緊既女仔。」
佢講完，頓左一頓，滿有感慨咁講，「其實男人，要搵既女仔唔係要咩好靚好正既，而係想搵個普普通通，留係自己身邊願意陪佢捱既女仔，而康僑就係咁既女仔。」
「華，你要好好珍惜佢呀知唔知？」方子龍好語重心長咁同我講。
「呢樣我知，其實我一開始對你既印象唔好，覺得你係傳聞中既狗公，對你一直都有偏見。」
「但識落慢慢開始發覺，你唔似係D咁既人。」 我將一開始對佢既意見同態度都表明出黎，舒服好多。
「出面D人點樣講我我唔在乎，我在乎既，係我搵到我心中理想既人，我唔想就咁放棄，但最後都輸左俾你。」
「有男朋友既女仔我係唔會做咩行動，呢個係我愛情既原則，所以你可以放心。」
我覺得自己好彩有約佢出黎食飯，咁樣先知佢份人係點。
「咁你依家點算？除左康僑你無鐘意既人咩？」我好好奇，似佢咁既男神唔會無人要呀。
「曾經有，但一切都返唔到轉頭。」每個人既背後總有一段故事。
「你問我點，我都唔知可以點，我需要時間放低康僑，老實講，依家都仲有D痛。」
「但係我會繼續搵，搵個我真係想同佢行一世既人。」
方子龍佢會搵到，始終呢個世界真係有從一而終，好人的確有好報。
「好彩識到你呢個朋友，以後有咩事都可以搵我，我實會幫你。」方子龍份人真係幾豪爽。
之後方子龍佢真係都幫左我好多，有時緣份既野真係好奇妙。
佢黎既時候你唔知，你想控制既時候又控制唔住。
之後我地既感情都好順風順水，甜甜蜜蜜咁。
得閒就去睇場電影，行下海旁，同普通情侶無咩分別。
一齊耐左，先發覺康僑原來有keep住跑步，唔怪之得佢身材可以keep到咁瘦。
佢唔同我講係因為知我唔鐘意運動先唔同我講。
果一晚康僑同我講有野做，咁我補完習就行海旁返屋企啦。
沿路就見到康僑自己一個跑啦，佢見到我都好驚訝，估唔到我會行返去。
「做咩行海旁返去既？平時你都搭車嫁。」佢一臉疑惑。
「無呀，我見有時間又唔係好?咪行返去，吹下海風都唔錯。」
「咁你呢？又話有野做，原來係跑步，我都唔知你一直有跑步既習慣。」
我地慢慢行去海邊，就坐係欄杆上面傾起上黎。
「做運動健康呀，自從我上年大病左一場，就開始做下運動咁，等自己健康?，又可以keep到fit。」
「咁你做咩唔同我講喎？」其實我唔鐘意佢瞞住我，即使佢係為我好，有咩咪坦白囉。
「咁我知你唔鐘意運動呀嘛，咁咪唔講囉。」
佢仲細細聲咁講：「其實我好想同你一齊跑步做運動嫁。」佢擰轉左面，仲要細細聲咁講，可惜都俾我聽到。
雖然佢好細細聲咁講，但我都一樣聽到佢講乜。
為左佢呢句，我就間唔中陪佢跑步。
咁樣多左樣情趣無咩唔好呀。
「其實跑步最緊要係講堅持，睇下你堅唔堅持到啦。」
佢講完就一支箭咁跑走左，我好努力咁追都追唔到。
因為我少運動，而佢就跑左成年。
將來我會唔會都追唔到佢？
為左成為配得上佢既男人，我都要努力！
曾經我有問過佢：「你會唔會覺得我好毒，唔識打扮呀咁，出街襯唔起你呀？」
同佢拍拖不但無增加我既自信，反而令我更加自卑。
「你既打扮真係麻麻地既，不過我鐘意既係你既人，又唔係你D衫。」
「可唔可以教我點樣打扮？至少我想做個襯得上你既男人。」
「哈哈，都唔知你幾時開始講野咁鬼甜，冧人冧得咁掂。」
佢又細細咁打我。 「咁我講真嫁嘛！我唔識D咩甜言蜜語，但我講既都係真話。」
「好啦，見你講到咁，搵日我帶你去睇衫啦，行下街街。」
但到依家佢都未帶我去行街街，都夾唔到時間。
唔知大家有冇睇求婚大作戰，當中個矮仔講左一句。
人只要肯努力，其實好多野都會做得到。
好多年後，睇返以前毒毒地既我，一定幻想唔到今時今日既我。
好多年後，自己會好慶幸認識康僑，係佢先會有依家既我。
好多年後，自己經歷過好多，亦都睇化左好多。
年輕既我，因為咩都冇，想要既野好多；好多年後既我，擁有既野好多，但想要既野就只得一樣，就係想你返黎我身邊。
咁多年啦，去到邊都有你既影子。
但自從果次之後，就未見過你既實體，我一直都追尋緊你既影子。
一個決定會改變自己一生