《香港唔係追夢既地方》: Episode 27
Episode 27
自從經歷上一次之後，我比以前更加努力。一方面可能係畀 Renee 啟發到我，另一方面可能係因為出於對 Morris 同 Agnes 個種仇恨心。
我感覺到自己變緊，唔明顯⋯⋯但比起以前，我感覺到自己既唔同。
【BB！幾時可以同我食飯呀？我成個幾星期無見過你喇！】Jamie 係 what's app同我講。
【喂！兄弟幫好耐無聚頭，攜眷唔攜眷都得喎！你幾時得呀？】Chris 都問我。
不過，我全部都推曬。
我要把握失去左既機會同時間⋯⋯我只可以成功！我唔會再失敗！
-
經過左一段日子，我已經見慣 Agnes 同 Morris 既事，亦都知道 Agnes 同 Edwin 又有過一手。
娛樂圈真係可以搵到好多錢，名利雙收，只係我地都睇唔到金錢背後既污糟。
而我，為左證明自己既實力，我都膽粗粗向 Lydia 報名參加由電視台舉辦既歌唱大賽。
今次呢個比賽將會雲集各路真正既強敵同高手，Agnes、Edwin 根本唔敢參賽，因為當佢地遇到真正既高手就自然相形見絀。而我亦都深信，呢個係我反敗為勝既機會。
但最令我估唔到既係，Gareth 都肯報名參賽。Gareth 同佢兩個唔同，我睇得出 Gareth 係有實力，亦都有心喜歡音樂既一個人。我係到諗，如果我地唔係咁樣相識，或者我地會係好朋友。不過可惜，我同佢注定係對手。
-
今晚，我仍然係自己間房練歌，忽然有人敲門。
「咯咯咯！」
「等等！」我大叫，即刻放低手上支結他，衝去開門。
門外既人竟然係 Gareth。
一座冰山居然浮過來我房門口，係我意想不到既一件事。
「係你？」我出奇問左一句。
「你都參加左歌唱比賽？」Gareth 一句就飛埋來，又無打招呼又無開場白⋯⋯
「係，有問題？」我都好唔客氣反問佢一句。
「無。」Gareth 意味深長咁望左我一下，然後就走，呢個人真係古古怪怪。
-
跟住落來既日子，我同 Gareth 都各自準備比賽，因為今次呢個比賽對我地兩個來講都係好重要，可以話係食粥食飯都係睇今次。
為左練習，我犧牲左好多同 Jamie、兄弟，甚至返屋企同老母食飯既時間。不知不覺，原來我已經好耐無見佢地。
但我覺得，只要我成功，就值得，乜野都值得！
-
「好緊張呀MC田，跟住落來就會見到我地樂壇既明日之聲喇啵，係咪呀？」主持係台上展開左歌唱大賽既開場白，正式揭開戰幔。
「係呀！佢地有來自五湖四海既年青人，全部都係對音樂充滿熱誠既後生仔後生女呀！」MC田回應個主持。
觀眾都聽個兩個主持講得好開心，但我地班參賽者係後台就好緊張！個個係到幫自己既樂器較音喇、不斷默唸歌詞喇、呆坐喇、滴汗喇⋯⋯乜都有。
當比賽正式開始既時候，佢地逐個出場，情形就好似武林大會咁，各施奇技、使盡渾身解數要突圍而出。呢到，真係名乎其實既戰場。
一個一個表演者退場，佢地既得分都唔低，都有成70分。比起 Agnes 同 Edwin，我真係覺得呢到既人先係真正既音樂人。
「跟住落來呢個參賽者就犀利喇，曾經奪得香港青少年音樂大賽冠軍既殊榮，亦都係銀河娛樂本年度秘密訓練既新人王，張思齊 Gareth！」MC田終於介紹 Gareth 出場。
只見 Gareth 微微一笑，然後好淡定咁坐係鋼琴面前，慢慢合埋眼，開始投入去佢既音樂世界入面。
佢既歌聲同琴聲真係非常配合，唔只觀眾同評判聽到如痴如醉，就連主持都聽到呆埋。
結果，Gareth 拎左全場暫時最高既85分，更加得到全場最熱烈既掌聲。霎時間，Gareth 成為左冠軍大熱門。
「跟住就到佢既同門師兄弟，同樣極具音樂天份既黃日朗 Tony！要講講呀，佢亦都係銀河娛樂秘密訓練既新人之一來架啵。」MC田照稿咁介紹我出場，不過經歷左 Gareth 岩岩咁精彩既表演，咁我一定會比下去，除非我有好勁好勁既演出⋯⋯
忽然間，好大壓力。
「銀河娛樂捧既呢兩位新人，會唔會一樣都係咁有實力呢？咁我地要拭目以待喇！有請，Tony！」主持伸手指示我出場。
我低頭，慢慢行出去舞台。今次其實係我第二次踏上舞台，仲記得上一次就係 Renee 邀請我上台既音樂劇唱《小伙子》。
短短一、兩年，原來已經可以好唔同。
今次既心情同上次比實在係兩種唔同既感受，面對住 Gareth 呢個強敵，我真係半點都不敢鬆懈。
我不嬲彈結他都唔中意用pic，因為我覺得掃出來既聲唔靚，由我對手親手掃既chord先可以灌注我既靈魂同故事入去音符裡面。
我輕輕用手掃左一個chord，然後就開始我既演唱。
係 Mr. 既《森林》。
我對眼雖然望住班觀眾，但我腦海浮現既係首歌描寫既畫面同故事。係香港呢個石屎森林裡面，有幾多人迷失左係入面？為左工作同生活而努力打拼，慢慢畀高樓大廈埋沒，再睇唔到屬於自己既一片天空。
樹木參天，都市都一樣只係另一片森林。
曾經我都係其中一份子，但我而家會為夢想努力，要令自己活得無悔，走出呢片森林。
世界，其實好大。
「其實 命運就像大廈
如都市幻化 凌亂如燈火中的密碼
露台 看看世界吧
這個天下 用盡方法 建立這一個家
每朵 高高低低的花 為都市腐化
零落時擦亮這個家
但仍有過美態吧 不怕倒下
花開花飛花似畫
經得起變化」
我彈出最後一個chord，最後一粒弦音亦慢慢消失，觀眾同評判先慢慢回過神來。
「哇我都聽到入曬神添⋯⋯Tony 咁精湛既表演，又會有幾多分呢？」MC田笑笑咁問評判。
當評判禁制，大熒幕上面既數字不斷升，我心跳就跟住一齊加速！
20⋯⋯40⋯⋯60⋯⋯70⋯⋯75⋯⋯
「哇，75分都仲未停？」主持真係識將氣氛推到最緊張個個位。
78⋯⋯80⋯⋯83⋯⋯
差兩分⋯⋯差兩分⋯⋯
84⋯⋯
唔係差一分輸呀話？
85！
仲有無？仲有無？
「哇！85分！仲有無得升呢？」主持自己都唔知，不過個分數似乎就停左。
「好喇，睇來會有雙冠⋯⋯」
「咪住！MC田你望真少少！」正當MC田想講結果既時候，主持攔住左MC田，因為原來85分唔係盡頭！
係88分！
「哇！高潮真係一浪接一浪，估唔到 Tony 可以憑住呢首《森林》拎到咁高分，仲擊時擊敗左同門既師兄弟 Gareth 添啵！Tony 你有咩感受？不如同大家講下？」MC田即刻隊個咪畀我，我拎住個咪，望住個攝錄機，都唔知講咩好，呆左係到。就算個攝錄人員係咁「圈」我，我都唔識加快反應。
因為我無諗過自己會贏到 Gareth，雖然只係初賽，但已經⋯⋯好夢幻。
「我⋯⋯呀⋯⋯好⋯⋯唔知講咩好添⋯⋯」我呆呆濟濟咁講。
「好喇唔緊要，知你第一次上台都緊張架喇，返入去休息下，好唔好？」MC田友善咁笑笑，然後請左我返後台。
我個腦仲係空白一片。
-
我慢慢行入後台，明明三唔識七個班人都走來話恭喜我，我忽然間好似做左英雄咁。其實，佢地又有幾多個係真心？
Gareth 岩岩唱完拎到最高分既時候，佢地一樣對 Gareth 攀龍附鳳。到而家我反壓 Gareth，佢地就即刻轉向。
世態炎涼，人未走，茶已經涼，Gareth 而家只係獨坐一角咁望住我。
呢個時候，Lydia 同 Morris 都趕左過來，而佢地既態度，都係九百幾度既改變。
「Tony，叻仔！」Morris 即刻變臉讚我。
「話左你得架喇，我真係無睇錯人！」Lydia 好欣賞咁望住我。
-
節目終於曲終人散，而 Lydia 同 Morris 都忙住要做其他野而走先，我亦終於樂得清靜。
我拎起支結他，搭上公司返宿舍既車，合上眼休息下。總算突圍初賽，可以繼續留低。
同車既當然有 Gareth，不過佢臉色比起之前更難睇。
我地全程車都無講過一句野，一路到落車，返到去宿舍既時候，佢臨開房門，先忽然轉身望住我。
「Tony。」Gareth 既語氣非常冷淡。
「咩事？」
到底佢想講咩？唔通佢欣賞我？識英雄重英雄？
「我地未完，我要同你鬥到底。」Gareth 忽然臉色變到好兇狠咁厲住我。
氣氛，好似凍到靜止左一樣。
未完待續