《香港唔係追夢既地方》: Episode 20
Episode 20
Jimmy 係我生命中第二個離開我既朋友。不過佢同 Jayden 唔同，今次係 Jimmy 自己選擇結束自己既生命⋯⋯
聽 Sandy 講，Jimmy 係因為DSE既壓力太大而跳樓，但明明已經考完⋯⋯ Jimmy 要做既明明只係等放榜，點解仲要跳樓？
我忽然間諗起，佢之前 send 畀我既 message。
當我仲擔心緊 Lok 既時候，係 Lok 樓下等既時候，Jimmy 已經畀左一次警告我，但我當時覺得 Lok 重要少少，所以不以為然。
第二次係 Patrick 係海邊同 Lok 復合既時候，Jimmy 已經再 send 多一次 message 畀我，但我都係無留意⋯⋯
如果我做多少少，如果我有用心留意多少少，或者佢就唔會死⋯⋯
係我害死佢。
-
我坐左係公園，望住班中學生打波，望左好耐。其實快樂，只係好簡單，一班朋友無憂無慮咁玩，已經可以好開心。今日我先知，無論我搵幾多錢都好，都買唔到依種快樂。
人人都話學生時期係人生最快樂既時光，因為係呢個時候係最無憂無慮、可以消耗大好青春既最好時光。做完功課、上完堂就可以去玩，唔使為生活而煩惱。
但係香港，好似連快樂都咁難。
大人已經唔快樂，人人搭車返工都好似出殯咁既面口，人逼逼撞到兩下已經鬧曬大交，拍片擺上網。連最應該快樂既學生哥，而家都比咁多無形既壓力逼到終日愁眉苦面、自殺收場。
咁樣好咩？
DSE只有一次，得就得，唔得就唔得，令到我地都覺得，路好似只有一條。政府、社會逼到佢地眼中只有考試、分數。口就同人講：求學不是求分數。
但轉個頭就係另一回事。
我睇住佢地，我心情好複雜。我見到佢地咁開心打波，我好欣慰。但我亦都好驚第二日報紙見到既係佢地。
係香港，連做學生都苦過人。
-
今日，係 Jimmy 既喪禮，佢既屋企人明顯精神好差。佢地臉上唔單止有既係傷心，仲有既係內疚同懊悔。
如果可以比佢地返到過去，佢地會點樣教 Jimmy 面對佢既人生？
今日既場景，好熟悉⋯⋯同當日 Jayden 既喪禮好相似。不過唔同既係，一個係唔想死，但無得選擇既人；一個係可以選擇，但選擇左結束自己生命既人。
但我最估唔到既係⋯⋯Jimmy 既遺書，竟然唔係由佢父母去讀，而係由 Sandy 呢個前同學仔去宣讀，點解會咁？
「可能大家都會好好奇，點解 Jimmy 會搵我去讀呢一份遺書。本來我都好好奇，但我睇完之後，我就明白佢既用意。」Sandy 好冷靜咁對住大家講。
「Jimmy 一直都好唔開心，因為公開試既壓力逼到佢好似抖唔到氣咁，考完之後，每一日都諗⋯⋯如果 jupas 無大學收佢咁點呀？係咪會變左社會既失敗者呀？」
「無止境既等待會令到一個人越諗越灰，佢覺得自己考得唔好，所以選擇結束自己既生命。但佢係天台臨跳前一刻，佢回望自己短暫既一生，佢先發覺⋯⋯原來佢十八年以來，都無做過一件佢覺得有意義既事。佢既人生，就係讀書、測驗、功課、溫書，同埋公開試。」
「係，佢考到好高既分數，名列前茅，係好多人心目中既明日之星，前途無可限量。但佢發現，佢根本諗唔到，自己中意咩野、有咩興趣、有咩夢想。」
「佢呢個時候諗起我。佢竟然覺得⋯⋯羨慕我。」Sandy 講到呢到，眼開始紅，佢微笑，有一種好矛盾味道既微笑⋯⋯
「我係一個成績唔好，綜合卷得單位數字，人人都覺得我係失敗者既一個女仔。一個咁既女仔，仲要夢想做廚⋯⋯真係笑大人個口。係咪？」Sandy 把聲開始震。
「佢羨慕我既咩野呀？有咩好羨慕呀？佢竟然覺得，我既人生仲有意義過佢，因為我有既係目標同夢想，但佢無。雖然我揀既路係辛苦，係難行，但我享受、我開心⋯⋯Jimmy 先知道原來佢想要既唔係滿分既考卷，而係滿分既人生。」
「佢話如果有下一世，佢都想⋯⋯佢都想可以做一個⋯⋯有夢⋯⋯有夢想既人。」Sandy 講到呢到終於忍唔住喊左出來，而周圍既人都忍唔住流眼淚。
我望住個天，原來想飛既，仲有好多、好多人。
-
儀式完結，而 Jimmy 都入土為安。去到佢墓碑前面，我放低左一樣野。
係一架紙飛機。
我係到諗，如果 Jimmy 係天堂遇到 Jayden，會點呢？
-
過左幾個月之後，DSE放榜喇，Sandy 特登帶我返去佢地間中學。
我去到優異學生既公佈欄到，見到 Jimmy 個名。
「三個5**，一個5*，三個5，佢係我地學校成績最好個幾個學生⋯⋯如果佢仲在生，應該會收到港大offer⋯⋯」Sandy 係側邊解釋畀我聽。
我個心好痛，點解佢唔堅持多一陣，點解唔相信自己多一陣⋯⋯生命既寶貴，就係在於佢帶來既各樣可能性。
有邊個會知道未來既事？你點知道，笑到最後既唔係你自己？
我個腦忽然哼起左一首歌⋯⋯係方皓玟既《你是你本身的傳奇》。
我深信，你就係你自己本身既傳奇，相信自己，就可以創造出無限既可能，所以⋯⋯千祈唔好放棄。
未完待續