《香港唔係追夢既地方》: Episode 13
Episode 13
以前細個睇電視，會覺得返工坐房、有自己辦公室先開心。人大左，就會知道其實有自己張台已經好好。
今日係我第一日返工，我比平時仲早左起身，其實只係太緊張、訓唔著。
我整裝待發，精神奕奕咁樣去返工。
滿懷住雄心壯志同期盼既我去到尖沙咀，平日我只係會去尖沙咀食飯行街睇戲，根本唔會見到而家既光景⋯⋯
好多人！簡直係人山人海，不過全部都面無表情，著住西裝、拎住公事包咁行，佢地感覺好無生氣，就好似我最中意睇既 the walking dead 一樣，喪屍大軍就係我眼前⋯⋯
我忽然有種好強烈既感覺，原來出左來社會，世界真係會好唔同。朝早返學，以前大家會有傾有講，開開心心跳跳紮咁返學，但而家大家都只會低頭望電話，成隻喪屍咁返工然後成隻喪屍咁放工，日復一日，時間就係咁不知不覺過去。
有幾多「喪屍」曾經都係有過夢想既熱血小子？只不過佢地如何強悍，都敵唔過最強既敵人：「現實」。
今日，我終於成為左佢地既一份子⋯⋯
-
返到辦公室，好尷尬咁認識左好多新同事，我亦都好努力咁學習辦公室入面既知識同工作，我好想快D可以熟習，然後融入佢地。
我以為辦公室好似電視劇咁明爭暗鬥，大家各出奇謀搏上位，每日都做緊酒店風雲、溏心風暴。原來唔係既⋯⋯
佢地只係會自己做自己野，基本上連食飯都唔會點傾計，寧願把握時間食完飯恰下好過。辦公室鬥爭？唔係話無既，但我真係入世未深，暫時唔清楚。
我坐係個位到打緊文件，雖然呢個位大好多，但我忽然好掛住以前中學個張又殘又花又細既木台，上面畫左好多野，甚至可能係上手、上上手、上上上上手既筆跡。
辦公室好靜，冷氣聲都好清晰，但更加令我掛住以前個間嘈喧巴閉既班房，掛住老師成日講個句：「我唔要見到有聲音！」
時間真係無情，原來自己已經返緊工，唔再係學生。
「六點，閃！」有個同事睇住時間，一搭正就拎袋打卡走人。
辦公室，係一夠鐘，人就會想走。
但學校，係一夠鐘，先係我地既世界。
-
我放左工之後，就買左少少野食返平時返開個間7仔，作為散水餅。
雖然呢到返工辛苦，但同呢到既同事反而幾好感情，就連個個麻Q煩既經理都話唔捨得我。
Kate 見到我搵到出路，自然好開心，仲話要我努力。
我真係有少少唔捨得，雖然呢到唔係咩高級地方，但呢到既人同事，都令我有留戀，我反而中意呢到，多過個間靜到水靜鵝飛既寫字樓⋯⋯
我同班舊同事、Kate 傾左好耐，簡直講足我幾日既quota，因為我聽日返去寫字樓，都唔會講好多野。
世界同你講係好既，唔通就真係好架喇咩？人人都話想返寫字樓，因為寫字樓工好，但事實又係唔係咁呢？定係我地只係追隨住社會既「好與壞」？
我地到底係為自己而活，定係為社會而活？
我唔知，真係唔知⋯⋯
「畀心機返呢份工呀，知唔知？得閒要返來探下我！」Kate 同我講。
「一定！你都係，要快D同男朋友好返。」我同佢講，Kate 都笑笑口點點頭，我地有時就真係好似兩姐弟咁。
「好喇，咁我走喇，再會喇！」我同佢地揮揮手，然後就轉身慢慢離開。
走到出去，我忍唔住轉身望下呢個地方，原來自己唔經唔覺已經返左呢到成年幾兩年，有種好難以形容既感覺湧上心頭……
所有野，都係有個限期既。
-
不經不覺又過左兩個月，原來我已經習慣左呢種朝九晚六既生活，雖然以前未返過一星期五日咁多，但我都開始適應。
每日勞碌起身趕車，然後面無表情咁跟住人群一齊衝去返工，怕既係遲一分鐘然後收 warning letter。
以前唔中意帶飯，因為想同同學、朋友仔一齊出去食飯，係 lunch time 玩下開心下。而家有飯帶就老練都帶返，一來慳錢，二來慳返D無謂既社交，個人都無咁累。Lunch time 有時間剩？不如恰下好過喇，返九點，個人真係好眼訓架⋯⋯
係咪覺得我好似無咩對白？係因為我係公司，真係無野講⋯⋯
今日食完飯，就碌下 Facebook，睇下有咩睇。其實都係不外乎一百毛、蘋果動同無聊笑片⋯⋯
睇住個政府一日比一日荒謬，但我做既只可以係 like 一百毛同留言講粗口，當日雨傘運動既熱情，好似已經消失得一乾二淨。
「又係呢條『中間手指』？好心唔好出咁多叫春文喇，真係年中害死唔少男朋友，仲有乜鬼野『沙脾呀』⋯⋯唉！」我忍唔住歎左口氣，點解女仔就係咁中意睇佢地既叫春文，然後 cap 畀男朋友睇，話比男朋友聽應該要點樣點樣疼錫女朋友⋯⋯我唔使你教呀！仆街！
好可惜，Jamie 都係其中一員⋯⋯
「面子多少錢一斤？讓你覺得面子比失去了的好友還重要？」
咦，呢句有意思⋯⋯
「喂！Tony 入一入來丫！」係呢個時候我經理叫左我去做野，我就無再理同諗呢句野。
-
一做，就做到夜晚八點，原來真係可以咁累⋯⋯
【放工喇終於！累死！】我 send 左個 message 畀 Jamie。
【唔累！BB錫返你！】Jamie 即刻 send 埋個嘴唇表情畀我。
【岩岩畀老細鬧左成十幾分鐘⋯⋯幾無面，唉！】我忍唔住同 Jamie 呻。
【做野係咁架喇，面子幾錢斤丫！唔好咁計較佢喇BB。】Jamie 講。
面子幾錢斤⋯⋯
我忽然諗返起今日 Facebook 睇到個一句。
到底面子幾錢斤，令你怕無臉而唔去主動聯絡舊朋友。
有D人，可能一離別就係一世。Jayden 就係其中一個例子，佢離開左我，永永遠遠⋯⋯
唔知 Chris 同 Sophie 而家點呢？Aaron 又做緊咩呢？Lok 又過得開唔開心呢？點解⋯⋯我就係唔肯行多一步去問佢地？
就係怕無臉？
好多時就係只差一步，就決定我地得到，定係失去。一個決定，足以改寫你既命運。
今日，我怕無臉而唔去搵佢地，可能我以後就會無左呢班兄弟。諗深一層，其實無結果差得過而家咁丫，我仲怕咩呢？
唔睬我咪唔睬我囉！又唔係未「魚」過！衰D講句，怕柒，先係最柒既。
我忽然間，好有衝動，想關心下佢地。
我係 what's app 打左句野，但我遲遲無 send 出去。
因為我覺得訊息係唔夠誠意。
我決定，逐個打畀佢地。
我係通訊錄搵到佢地個名，禁左入去，第一個係 Aaron。我深深吸左口氣，決定把心一橫打畀佢。
「嘟嘟、嘟嘟、嘟嘟。」係未接電話時候個D聲。
「嘟嘟、嘟嘟、嘟嘟。」快聽喇 Aaron！
「嘟⋯⋯嘟⋯⋯嘟⋯⋯」佢最尾都係無聽到。
我有少少心灰，但我唔會咁易放棄！Aaron 一定係忙緊架姐！試下打畀 Chris 先！
「嘟嘟、嘟嘟、嘟嘟。」
「喂？」係 Chris 把聲！
未完待續