《香港唔係追夢既地方》: Episode 10
Episode 10
「沙……沙……」
仆街，竟然 On show 先壞音響？我即刻望左望台後既 Renee，希望佢可以幫到我，點知 Renee 都只係可以用擔心既眼神望住我，證明 Renee 都幫我唔到……
唔通我既處男秀要咁樣落幕？唔通要 Jamie、我班兄弟仲有 Sherry 失望？
唔得，唔可以，絕對唔可以！
我行多左兩步，拎起左本來只係戲劇道具既一支結他。
「小伙子……長大了，在世事難料的森林，尋覓理想事。」我開始彈起結他，唱起呢首歌。
「愈向著青春走遠，愈容易孤單……你可有發現？」
係，人越大，越發現原來朋友，真係買少見少。當日可以同你玩到天昏地暗既朋友，有邊個可以陪你一直走落去？人人都有自己既生活，自己既工作，唔可以再係學校話見就見，唔可以一落去球場，就見到班朋友打緊波就衝埋去跟機。
孤單既感覺，會一年比一年多，一年比一年強。
「小伙子，相會了。聚散亦難料訴說了辛酸，也話說了當天。記憶裡那舊碎片，重組了趣事、嚮往的昨天。」
「臉龐上成熟到已多加一份懷疑，連歡笑都覺得幼稚。」係，對人唔可以再輕易敞開你既心扉，信任開始變得奢侈。社會上既人唔再好似你以前識既朋友咁真心真意，佢地可能有住唔同既目的，為左保護自己，你一定要捨棄當初個份天真。你唔再可以想笑就笑，想喊就喊，世界會逼你變得成熟，逼你變到……唔再係自己。
「散席了方知，好光陰往往流逝悄悄，揮發掉了很多很多經典……」
而家諗返起，原來同 Aaron 不經不覺已經識左十幾年，人生可以有幾多個十年？如果人生係一部三十集既劇，咁 Aaron 已經係我套劇裡面出現左起碼十集。我地真係有過好多好時光，同 Chris、Lok 一齊打肥仔，一齊打波打到身水身汗，一齊沖涼，一齊睇女，一齊睇咸野講咸野，一齊第一次飲酒，一齊因為溝唔到女而呻天光，一齊溫書但其實係玩，一齊做過好多好多經典野……原來係無野可以取替到。
只可惜，呢D劇情已經過左去。我見到而家既佢地，我覺得陌生，我覺得好似唔再係以前咁了解佢地，Aaron 好似畀人洗左腦咁，Chris 無曬以前個種衝勁，Lok 又神神秘秘咩都唔講。好多變化原來唔係一朝一夕，係慢慢，慢慢咁變，係你唔發覺。
死喇，點解我把聲走走地音……點解我會係呢個時候忍唔住喊？唔可以喊……要繼續唱落去。
「現實裡裝英勇難避免……成為了不懂哭也不想笑的一個漢子。活像木偶誰會在意，人多麼諷刺，生命裡誰令你還在意……」
係生活上面我地會遇到好多挫折，會失去好多人，慢慢你就會發現，到最後無論你幾珍惜、幾唔想個個人離開你，但你都係阻止唔到。Jayden 係咁……連 Aaron 都離我越來越遠。有時我都好想軟弱一下，一直都咁堅強，個人會好辛苦，要不斷適應各種殘酷既變化，人真係會累……
我已經唱到唔知唱緊咩，我一路唱一路諗，好似進入左一幕一幕令人好回味既回憶咁，令人好唔想走……上天，可唔可以畀我返去以前？返去佢地都仲係我身邊既時候……
歌已經唱到尾聲，我既思緒就好似同歌詞同步發展咁，去到最尾一句，我個心開始靜落來，係因為無奈，定係諗通左？
「在幻變，領略了，最重要……」
-
我完成左自己既部份，返到去後台，Renee 即刻走過來安慰我。
「做咩事呀你？無野呀嘛？」Renee 問我。
「無……諗起少少野姐。」
我靜靜望出去觀眾席，好想可以見到好多人，Aaron、Chris、Lok、Jamie……如果你地全部都可以係到，就好喇。可以以後都係到，就好喇。
-
戲做完，全場既燈都終於開返曬，我終於可以睇到班觀眾。我不斷係觀眾席上面尋找佢地每一個既身影，我完全無聽到個主席點樣分享，我剩係想搵到佢地……
但係主席都講完，大家都開始影相，人都開始走開始散……
「Tony！」Jamie 衝左過來，佢真係好興奮同好開心咁。有佢一直支持我，我都好感動，佢係永遠都唔會離棄我既一個人。
「我特登帶埋我D Friend來捧你場架，佢地話你唱得好有感情，唱到喊曬！你無咩野呀嘛？係唔係戲劇效果來架？」Jamie 一輪嘴咁問，但係我無咩心情答佢住……
「唔係……係呢 Jamie，有無見過 Aaron 佢地？」我問 Jamie，我好想 Jamie 可以點下頭，可惜佢搖搖頭。
唔係咁既！劇集總會係製造絕望，然後係最黑既時候先畀返光明你，無錯，一定係咁！係我以為佢地唔會出現既時候，佢地就會出現，仲會和好返一齊搭住膊頭咁出現，一定會！
「喂 Jamie，我地去食野喇，唔好阻你男朋友去慶功喇！」Jamie 班朋友講，但 Jamie 好似好唔捨得我。
「去喇 Jamie，得架喇我，放心同你朋友食野喇。」我對 Jamie 咁講，因為我要將今晚留畀我班兄弟。
「咁好喇……你記住 whats app 我呀！」
「知道！」
Jamie 就畀佢班朋友拉走左，而我就係到呆呆咁等緊佢地出現。
「喂，行喇，慶功喇！」Renee 過來叫我走。
「唔喇，我等緊人，你地食得開心D喇今晚！」我同佢講。
「仲等？你等左好耐喇喎，呢到要交返場畀人架喇，你班兄弟應該無來或者走左喇……」Renee 好認真咁講。
「班衰仔緊係畀驚喜我，真係唔怕我會走左去架喎，咁遲都唔來。」我笑笑口咁講，完全無諗 Renee 提出既可能。
Renee 歎左口氣，然後同隊 crew 走左去慶功。而我就去左門口，等緊佢地。
企係到等到累，就坐起梯級等。坐到唔舒服，就挨住牆等。
等等等……咩都等唔到。
原來……只係我一廂情願。
唔知點解我個腦又哼起左小伙子呢首歌，好多回憶……只能係回憶。
既然呢到無人，就畀我一個係到軟弱一下，容許我間唔中崩潰一次。
眼淚好暖熱，眼前既景物都開始模糊，我個嘴唇開始震，係我控制唔到自己個嘴既同時，我都控制唔到我既眼淚，一滴一滴流出來。
眼淚係我塊面上劃出左一條淚痕，然後去到下巴，再滴落我手臂上面。
我坐左係到，抱住自己大脾，用手臂遮住自己塊臉，由得淚水滴曬落我手臂到。
忽然，有個人坐左係我隔離，拍左拍我膊頭。無論係邊個，我都唔想畀佢睇到我喊成咁，於是我用手臂抹左我既淚水，然後扮無野咁望住個個人。
估唔到係佢。
「你無事呀嘛？」佢好溫柔咁講。
係 Sherry。
未完待續