《香港唔係追夢既地方》: Episode 06
Episode 6
本來我既生活，就係十分之咁平淡。係因為雨傘運動，加上 Jayden 既離開，先令我既人生有少少漣漪。
本來，我只係閒時同 Jamie 拍下拖、同班老友打下機睇下av、返下學做下功課、返下工搵下外快咁，就係我既人生。
無同大家講，我做既工真係極之普通既兼職，就係夜更7仔，一來做開廢事轉，二來懶得搵，三來都就畢業，到時再搵份正職先算。
係7仔來講，我係比較年輕既員工，我同個幾個同事感情都算唔錯。入面有個大我少少既姐姐，佢同我係最老友既，佢叫 Kate。
「多謝你二十蚊零五毫丫。」著住7仔制服既我機械式咁對住客人咁講，可以話只係一部完全無感情既收銀機械人。
「哈，我有五毫，你等等呀。」客人開心咁講。
「好丫，慢慢。」
好彩既，就遇到呢種咁好禮貌既客人，唔好彩既就⋯⋯
「一包純萬。」
「快撚D喇，趕時間呀仆街，手腳關節唔協調呀你？」係呀，我手腳協調既話斬撚左你十世喇！
「唔巧意思呀，禾⋯⋯」禾禾禾，禾你老豆呀，來到香港唔該你講返正我地既廣東話喇，屌你老母！
做前線，就係咁慘。
「喂Sorry呀 Tony！今日遲左！」
一位長頭髮、打扮試正但略嫌有些少疲態既女仔入左來，佢就係我最老友既同事，Kate。
佢好好人，又吹得，我意思係吹得水個種。份人把口又直，講野又幾好笑，年齡層同我相若，就同我做左好朋友喇。
Kate 點解會咁累呢？其實因為7仔只係佢既副職，佢朝早仲有份工要返。即係返基本上，佢係一日打兩份工既痴線婆。
「今日累唔累呀？唔使咁趕喎，我都仲頂得住。」見佢咁累，有時都想幫輕下佢。
「得喇輕鬆，老娘我完全無問題。」Kate 火速換左制服就出來同我一齊企喇。
「今日寫稿寫到我頭都痛埋，返呢到唔使用腦，做下機械式野，當休息下喇。」Kate 歎左口氣。
「點呀？你無事呀嘛，見你Facebook 講你個中學同學走左。」
「無喇，佢走得係安詳既，無憾既，所以無咩好傷心。」
「咁就好喇，有時人生真係講唔埋，好玄，今日唔知聽日事。」Kate 若有所思咁講。
「都係，前個排同佢先有傾有講，諗住佢同平時一樣照常出院，點知⋯⋯」諗返起 Jayden 個個笑容，我個心都仲係隱隱作痛。
「所以要把握時間，做自己想做既野。係呢，你就畢業喇啵，想做D咩？」
又係呢個問題。
「唉⋯⋯我都仲諗緊。」
正當我地兩個吹得不亦樂乎之際，經理又走一走出來。
「喂 Tony，請你返來傾計？執下個場喇，陣間神秘顧客來到就仆直喇。」經理一副豬頭咁既嘴臉，然後又返返入去。
我同 Kate 基本上成日講佢壞話。
「係時候要諗架喇，唔通一世係呢間咁既野到做咩。」Kate 笑笑口咁講。
「有朋友叫我去追夢，但係……邊夠錢使姐？我唔追夢，去打份穩定工咩？我又覺得好對唔住自己既人生……所以咪唔知點。」我好坦白咁講曬個問題出來畀佢聽。
「明白既，人生係好多野想做，但想做，同做唔做到，已經係兩件好唔同既事。」Kate 大智若愚咁講。
「我唔敢話畀咩意見你，但我可以講我自己既故事畀你聽。」Kate 望住我，我點左下頭，佢就準備講。
「知唔知點解我要打兩份工？可能你會話我囉苦來辛，話我發錢寒，話我嫌命長，可能三樣都係。不過最主要既原因係，我有夢想。」
「我想做第二個杜如風。」Kate 講野每一隻字都好有力，佢好堅定。
「杜如風係個富二代，可以周圍去旅行買野，唔使本，但我唔係。我有個屋企要養，仲有要還學費、好多野要使錢，如果我仲要花咁多時間去旅行做旅遊作家，我一定要本身有返咁上下先養得到自己……」
「呢個理想對於我來講，好遙遠，亦都好難，但我無諗過放棄，所以我要返兩份工，儲錢做我想做既野。雖然辛苦，但諗起你做既野係有目標既，你就會有動力繼續落去，食得咸魚就會抵得渴，我相信到我成功個一日，我一定唔會後悔今日付出過既野。」
「香港要值得保留既野，已經買少見少，好快就會變曬大商場、連鎖店，香港會變成一個講金唔講心既地方，變成完全商業既社會。所以我地更加應該要保留我地本身既一點夢想，捍衛呢一點人性同美好。」
Kate 講既野好有意思，比起 Jayden 同 Jack，佢更加兼顧到夢想同現實兩邊。今日之後，令我對佢更加肅然起敬。
每一個有夢想而努力去追既人，都係值得敬重既英雄。
-
今日，我拖住 Jamie 去行街拍拖，佢最中意同我十指緊扣，因為佢話怕我會走左去。
「不如去試下好出名個間雲吞麵，平平地，好唔好呀？」Jamie 問我。
條女主動話食平野，緊係老練都話好喇！不過其實問心，Jamie 係好賢良淑德既女朋友，就算要佢同我食一個星期譚仔，佢都會肯，唔食貴野對佢來講真係無咩所謂。因為佢話而家最緊要慳錢，咁將來先夠錢結婚同買樓。
有時，我都好感激個天賜左個咁好咁體貼既女朋友畀我。
點知當我地行到去雲吞麵鋪既時候，我地只能企左係到。
「下？執左？」Jamie 好驚訝咁講。
我望左望張告示，真係嬲左。
「屌，食唔住貴租，呢到下個月又開藥房喇！使唔撚使咁多藥房呀屌！」真係忍唔撚住，一條街十間鋪有九間都係藥房，剩低個間係金鋪，呢個到底係咩世界？
「算喇算喇，食M記喇！我想食M記，哈哈。」Jamie 笑笑口就拉走左燥底既我。
呢個肯陪我捱M記既女人，真係好。
-
轉眼間就行到夜晚，我送到佢去屋企樓下既公園仔。
「真係快，又一日。」Jamie 好滿足咁講。
「係囉，不過就咁結尾好似唔太完美啵。」我奸笑，然後指指自己個咀。Jamie 笑笑口，然後鍚左埋來。我攬實佢，錫左好耐，隻手開始唔規矩咁向落掃。
「喂！咸濕仔！」Jamie 扮嬲咁打左我一下。
「男人無邊個唔咸濕架喎……」我笑左笑，一野將佢攬過來，覺醒左既弟弟即刻頂住左佢。
「但我屋企有人……」Jamie 臉紅紅咁講。
屌，我而家先醒起，我屋企都有人！咁點算呀……
「行入少少，睇下有無暗角位……幫你喇。」Jamie 笑笑，指住自己個咀仔。好過無丫！
我地兩個行去公園角落，屌，有對情侶已經起到插左旗，FULL左！我地無放棄，再行去第二個角，頂，又一對！
唔緊要，去後樓梯一樣得！入左去，頂，上左兩層，就有對HEHE 係到攬緊喇已經，睇來香港既土地問題真係好嚴重，我亦都開始明白，點解咁多情侶會係車上面街上面搞野，因為香港真係無地方！
行左幾轉，我已經冷靜返，乜 mood 都無曬，頂。
「算喇，下次先喇，你早少少返去休息下喇，好唔好？」我摸左摸佢個頭，佢點點頭，就返左去。
-
一路行返去，我又諗左好多野。
香港，係咪應該係咁？性，係好多人基本既需要，而家呢個時代，情侶間扑下野其實好平常，點解係香港連扑個野都咁難……
真係痴痴地線呢個地方。
呢個時候，我望見對面馬路有個長長頭髮、髮尾有少少卷既女仔……好似 Sherry！
又係 Sherry？我再集中精神望左望，點知佢已經轉彎唔見左。
點解又係 Sherry……係佢跟蹤我，定我地真係咁有緣，定只係我既幻覺？
如果真係佢，我會想問佢……妳，最近還好嗎？
呢個時候電話震左震，原來係 Jamie send 左 message 過來。
【Love you！Babe！哈哈！】
傻妹……
Jamie、Sherry，人生真係矛盾，真係無奈。
未完待續