《香港唔係追夢既地方》: Episode 01
Episode 1
香港，呢個好特別既地方，係好多人心目中，都有好多唔同既想法。係出面既人，想衝入去，好似過左海就係神仙咁。但係入面既人就好想走返出去，一樣都好似係過左海就係神仙咁。
而我，就係其中一個「入面既人」。
我叫 Tony，唔怕黑亦都唔怕凍，不過我最怕係悶。我老豆好早就死左，靠阿媽一個人含辛茹苦養大我，兩母子相依為命。所以如果你問我邊個係我生命中最重要既十個人，我一定不假思索就會答你︰我老母！
好好彩，除左我老母之外，小弟都有另一個生命中最重要既人，就係我女朋友 Jamie。Jamie 同我係副學士既同學，佢係個細細粒、得得意意既女仔，唔係最靚既女神type，但係可可愛愛，心地善良，簡直就係賢良淑德既最佳老婆人選。
不過作為男人既你都可能會明白，最令你有心跳感覺既可能唔係你老婆，而係你一直念念不忘、企係個扇羅生門前面既初戀女朋友。而我既初戀女朋友，叫 Sherry，不過我已經好耐無見佢，所以唔好提佢喇。
我係今年副學士既畢業生喇，亦即係話，今年就係我決定自己既將來既一年。
以前考咩鬼 HKDSE，衰左科中文就入唔到大學喇，本來諗住報副學士升返上去，點知都唔係咁易。阿媽曾經同我講過，唔係讀書就一係快D出來做野，唔好曬時間，但我個陣又唔太想咁快出來做野，所以就決定讀下副學士，呃下自己仲有希望，其實只係唔想咁快面對現實。
-
今晚，我同我人生中最老友既三個兄弟一齊係公園啤啤佢，開返套兄弟幫，傾下心事。呢三個兄弟唔係我小學同學、中學同學、大專同學，不過佢地三個同我由細識到大，就好似屋企人一樣。
仲記得係十幾年前，細細個係樓下公園玩，個陣我地都畀一個死肥仔恰到上心口，但係隻揪又唔夠個死肥仔打……結果我地四個聯手，打到個肥仔一仆一碌，結果就做左結拜四兄弟，做到今時今日。
我地四個無共同既朋友，就只係得對方，但佢地將會係我人生裡面，最重要、最重要既好兄弟。
「喂！屌你！你個口穿窿架？咁都漏啤酒！」粗口爛舌依個就係叫 Aaron，但佢同郭富誠係0%相似度。佢係高既，不過白白淨淨，瘦瘦地，戴住眼鏡，有D毒味其實。
「Sor 9！岩岩打波累呀，手震，體諒下喇！」呢個就叫 Chris，黑黑實實，高高大大，好中意打籃球。
「喂，聽我講先。」我暫停左佢地。
「其實呢，你地將來想做咩？或者咁講，有咩夢想？」我問佢地。
「我緊係想做籃球員喇，仲使講。」Chris 一馬當先咁講，佢份人似足佢打波咁，一味衝衝衝。
「我就想夾隊Band，我就做鼓佬，好似 Supper Moment 咁樣出歌出Show，寓興趣於工作上，正呀屌你老味！」Aaron 好開心咁講，係，因為佢真係好中意打鼓。
「你呢？成日咁靜！」Aaron 推左推身邊另一個男仔，無錯，我地其實一共有四個人，而呢個成日唔出聲既冷傲浪子，叫 Lok。其實我地都慣曬，因為佢真係唔係好中意講野，但偏偏佢份人講野一句就會中 Point。
「結婚囉。」Lok 好冷傲咁講，Aaron 又推左佢一野。
「靚仔，你係咪玩野呀？夢想係結婚？你又唔係差，唔係驚無女呀話！」Aaron 講。
「你估結婚易呀而家？」Lok 又一句收左佢皮。
「不過都係……我都唔知點結好，唉，諗起就頭痛。」Chris 一臉苦惱咁講。
係，點解 Chris 會咁苦惱？因為 Chris 個女朋友 Sophie 係一個有錢女，而 Chris 自己本人只係一個公屋仔，要同 Sophie 結婚又唔可以寒酸，但要唔寒酸，佢應該要唔食唔飲儲返30年先可以搞到一個世紀婚禮……
所以，原來男人，真係唔可以窮。
「喂，咁你呢？問完人自己又唔答，玩野呀仆街仔！」Aaron 笑笑口又將個波推到我身上。
「我呀？其實我想做……第二個坤哥。」我好怕羞咁講。
「下？」
「下？」
「下？」Aaron、Chris 同 Lok 同一時間下左出聲。
-
雖然成晚都只係講下笑下咁就算數，夢想喎，從來都係想下就算架喇。我係中意彈結他，中意玩樂器，中意唱歌，但唔代表我就可以靠音樂、靠歌聲去養活自己同媽媽。
畢竟，我住既地方，叫香港。
借完十幾二十萬學費，讀完出來搵份普通工，可能連一萬蚊都唔夠，又要開始還錢畀政府，然後又要儲錢結婚。買樓呢？都仲未計……
唉，講講下，開始連想都唔敢想。
香港，又可以有幾多個坤哥？
-
「普咩選丫，畀你去選都唔知選邊個喇，痴筋。」
今日，我就同我老母齊齊圍埋係屋企電視撈飯，睇到新聞話班學生要求真普選，而唔係小圈子選舉，我老母就即刻火都來，對住個電視係咁鬧。
「書都未讀好就學人搞風搞雨，真係廢青……」我阿媽又係到鬧喇。而我就知道，我根本勸唔到佢，況且人人都有自己立場，又何必為左政見唔同，而同老母鬧交呢？所以我選擇左沉默。
「到時選左個仲衰既出來你話點算，真係唔用腦……」
「食飯喇！阿媽！食不言，寑不語呀！」我終於忍唔住，大佬，好煩呀！
「衰仔來架你真係，養到你牛高馬大，句句疾住曬，你呀真……」阿媽真係永遠都係咁煩，係要不斷不斷咁講，講到你精神崩潰為止。
【救命，我老母又煩喇！】我Send左個Whats app畀 Jamie。
【唔好咁喇，最多你食完飯去沖個好耐既涼，咁就唔覺得佢煩架喇。】Jamie 總係咁溫柔。
【都係妳最好！】
【緊係！睇下你仲點走得出我五指山，哈哈！】
正當我同 Jamie 傾得不亦樂乎既時候，有一個人，一個我好耐無聯絡既人，忽然打畀我。
未完待續