我的爛Gag女友: 真正的朋友, 就是在你難過時扶你一把的人
自O camp完結至開學的一段時間, 我沒有再見過敏兒. 由於當天她沒有將聯絡方法留給任何人, 而組爸組媽又因保密關係, 不可以不經本人同意下透露電話號碼, 所以在黑7組出來重聚唱K時也沒有她.
當黑7組再出來時, 黑妹己經是鄰組一位獸父的養女, 而其他組爸組媽亦各自帶男女朋友出來. 我, 杜拉格 B 和杜拉格 C 就毒自坐在一旁數手指.
老實說, 這次是我第一次去K, 我既不懂用選歌的系統, 唱歌又五音不全, 再加上雖然去了一個O camp, 但大家都不算太熟, 所以不好意思唱.
他們一首又一首, 一對對的唱著情歌, 相愛很難, 唯獨妳是不可取替, 天下無雙, 妳的名字我的姓氏, 明愛暗戀補習社, 戀愛大過天……
我心想, 唉, 好後悔出呢, 一條友, on99坐成晚. 突然, 呢一首歌傳來的音樂是……
重讀著你的告別信 抑壓了暗湧
雖不信寫的話 竟可以這麼重
但再哭亦無用
唉, 呢次中招, 每次聽到傷信都會令我想起嘉嘉. 當時我整個人定了神, 雙眼有點紅, 嘴巴緊合. 我怕自己頂唔住, 所以起身去洗手間冷靜一下. 到回來時候, 大家唱得太開心, 沒有人留意到. 萬幸!!
在最後, 大家說我坐了全晚不可以一首也不唱, 於是就要我一定要唱一首才肯. 於是, 我選了一首令大家都目定口呆的歌, 超人的主題曲. 雖然, 唱得五音不全, 總算是交足功課吧.
然後, 又過了一星期, 今次回校的活動終於是正常, 有關學業的事情. 學校為每個學生都安排了Mentor, 為學生講解如何Reg 科, 如何用E-portal, 申請locker, 職業路向等等事情.
這個mentor group連mentor在內, 有5人, 5個都是男生. Mentor 名字己記不起, 因為見過一兩次面就沒有再見, 而其餘三人, 一個叫阿王, 一個叫阿禮, 一個叫阿K.
Mentor: 我係你地Mentor, 我叫xxx. 歡迎大家加入我地department, 不如大家介紹下自己.
王: 我叫阿王, 之前係沙田xxx中學讀書.
禮: 我叫阿禮, 之前係太和xxx中學讀書.
我: 我叫阿月, 之前係元朗xxx中學讀書.
K: 我叫阿K, 之前係觀塘xxx中學讀書.
Mentor: 好, 大家都介紹左自己啦, 而家我地開始入正題, 首先想問, 大家識唔識得入AIMS reg 科? 你地本身個schedule係department幫你地安排好, 但係你地可以自己再改, 轉第二科, 改時間或者再加多幾科都得架. 拿, 我而家用課室部機Login教你地用個AIMS 啦.
經Mentor講解, 我們都大約了解. 然後Mentor再講完他需要說的申請locker, 職業路向等事情後, 他就從此消失了, 認真盡責.
Mentor離開後, 留下我們4個麻甩仔開始聊天起來.
阿王: 屌, 條粉皮真係講完一講完就撇喎.
阿禮: 睇開d啦, 人地都係泥幫一幫, 係咁上下架啦, 唔通好似我地O camp咁同你唱埋個K先走咩.
我: 咦, 你地本身識架?
阿K: 我地之前去左department個O camp, 同一組, 所以咪識囉.
我: o我. 我本來都想報呢個細O架, 但係報名果陣唔小心報錯左大O所以無去到個細O.
他們三人的表情立即扭曲, 側目, 鄙視, 然後恥笑.
我: 唉, 大O報名果條女好索丫麻, 俾佢迷惑左, 失左常, 無計啦.
王: 索女? 仆街, 我果日係d攤位剩係見到仔咋喎, 點解唔泥迷惑我呀佢?
我: 訓啦柒頭.
我: 咁你地個O camp玩左d咩呀?
禮: 唉, 唔好提, 悶到飛起. 淨係係咁係度講d Career 野, 乜q都無得玩.
K: 哈哈, 是但啦, 去聽下都幾好丫. 阿月, 咁你地大O有咩玩呀?
我: um……都係Treasure Hurt, Social Game同埋d 咸濕遊戲果d 囉.
聽到咸濕遊戲阿王, 阿王立即變得很有興趣.
王: 咸濕遊戲?? 玩呢d 野條女唔得就Lai 野架啦喎
我: d 組女都ok 既, 過得去啦
王: 哎吔!!! 屌, 點解我唔係去大O呀仆街
K: 算啦你, 諗咁多睇住腎虧呀.
禮: 阿月你有冇去過CSC呀?
我: 無呀, 咩泥架?
禮: 電腦房, 不如而家一齊落去試下頭先講果d AIMS 用法丫
我: 好呀, 順手睇下自己個schedule 丫, 我都未開過泥睇
我地一行4人就由課室落左CSC, 到左門口. 門口有2部閘機, 我就身先士卒, 推閘入場, 誰知, 推不開.
職員阿叔: 你要用張學生證拍上去先入到架.
我: 噢, 柒左,
然後王, 禮, K都一齊拎張學生證出來, 拍卡入閘.
王: 屌, 我學生證張相影得麻麻, 都唔係咁想拎出泥, 之後都係放係銀包度嘟卡算.
K: 影得麻麻? 我仲衰過你啦, 交換睇下.
於是我地交換左學生證來看. 看過後.
王: 阿月, 你張相岩岩訓醒去影架?
我: 唉, 唔好提, 總之柒左.
過左陣, 大家都找到電腦印出自己的時間表. 一看之下, 我們竟然幾乎全部科目都是同一班, 可能因為是department 預先登記, 所以都倒模一樣幫每個學生加同一個schedule.
禮: 正喎, 我地全部同一班, 之後唔怕無伴喎.
我: 係喎, 但係點解我科英文唔同你地既? 上多咁多?
K: 之前O camp 聽過, AL 英文D 的話就讀EN, 其他就ELC, 所以你果隻係要讀多好多架.
我: o我, 你睇, 你地個O camp 幾好, 咁多野聽.
王: 屌, 我寧願唔聽, 去你個大O.
大家各自試用了AIMS一會後,
王: 喂, 等陣去唔去旺角呀? 我想去信和買野
我地都無問題, 於是就一齊關機去旺角. 到信和, 阿王一個箭步走到地庫間漫畫店買全職獵人最新一期.然後又帶我們走到百老匯街街頭, 上了一座大廈買波衫. 原來阿王都是個毒男, 仲要特別咸濕果隻.
我: 乜條友咁有錢既, 一出到泥係咁買野好似唔使錢咁?
K: 嘻, 之前同佢出泥果次買得仲勁呀, 今次算少架啦
禮: 係喎, 大家新相識, 不如下齊去食餐飯丫
我: 好呀.
阿王買完波衫過來說
王: 屌, 食咩飯丫, 去Neway City 食K buffet 啦, 有得食有得玩.
我當時心諗, 又唱K, 唔係呀麻?? 又坐成晚. 但因為初相識, 我不太好意思去拒絕, 所以都跟去.
到了Neway City, 我們4人到了一間比較大的K 房, 一來到阿王就點了兩板歌, 有張學友, 鄭伊健, 陳奕迅……然後阿禮到點歌, 點的都是較冷門的歌, 如極樂, 做你的男人, 別要我放棄等等. 而我和阿K 就沒理他們, 直接出大堂拿食物.
這裏的Buffet 我是第一次來, 上一次和O camp 人唱K 的旺角中心沒什麼好吃. 相比旺角中心之下, 這裏有花膠, 魚翅, 蛋糕點品, 還有很多不同食物, 百多元的價錢, 絕對超值. 我在拿食物時看到阿K很古怪, 拿的食物都是很素, 沒太多肉, 沒生冷食物, 沒魚生. 我好奇問他.
我: 咦, 你拎d 野食咁寡既, 果邊有翅拎喎, 整番碗丫?
K有點面有難色: 唔使啦, 我食呢d 得架啦.
我不以為然, 見他臉色蒼白, 以為只是有點不適所以吃素一點.
到我們拿食物回去後, 阿王和阿禮都正在唱得興起. 聽著他們所唱, 原來他們和我的歌喉和我不惶多讓, 相比之前和O camp 人唱, 人人都唱到像開show一樣, 我沒那麼尷尬和他們唱.
吃飽後, 我拿起咪也唱他們所點的歌.
我(走晒音): 若問世界誰無雙….
因為幾個人一起唱, 走音也沒那麼難聽. 然後, 又到了傷信. 我心想, 呢次仆街, 又係呢隻歌.
但今次, 我沒有離開, 因為大家都一起唱, 看著螢光幕, 沒有人會留意我, 所以繼續唱下去.
我唱著:
………
仍多麼需要你 仍多麼需要你
如今天失去了 怎麼退怎麼進
如果可不要信 寧死都不要信
但看我手 再激動仍只得傷信
到這句, 我終於忍不住哭了出來, 這次是我在失去嘉嘉後第一次哭, 想不到是在第一次見面的同學前. 阿K坐我旁邊, 見到我在哭, 就拍拍我膞頭.
K: 女啫, 過左去咪算囉, 邊個男人無俾女介傷過丫.
王: 咪係, 我都同我條女散左啦幾年啦, 咪又係咁
禮: 唔使咁愁既老友, 隊番啖橙汁再繼續唱啦, 盡情嗌晒出泥
我擦一擦眼淚, 哭了出來後, 覺得感覺比之前舒服了很多.
我: 無野喎, 諗番起d 唔開心野姐.
然後, 他們點了一首歌鼓勵我, 就是---杜汶澤版本的眼睛想旅行.
我大唱大叫, 從未如此開懷, 此時我終於明白, 原來朋友就是在你難過時扶你一把的人. 有著這幾位朋友的友情, 我相信, 友情可以填補我心中失去嘉嘉的傷痛.
自此之後, 我愛上了唱K, 經常在天地堂時也和這幾位真正朋友一起去唱K.