我們中，出了個叛徒: Line 5

　　我小心翼翼地拿起電話。
　　「沒有來電顯示。」我拉開按扭，再緊張卻又緩緩地拿到耳邊。
　　「喂？」我裝鎮定地說。
　　「喂！你M到咗未？」是一把男聲。
　　「嗡乜啊……」我還未想到是誰。
　　「我話你個啲月頭定唔知月尾嘅抑鬱症呢？而家重有冇？」原來是浩仔，一個說毒還不算很毒，也不算得上正常的朋友，我跟他在一起，不知為何正正直直，都會變成三句內必定語帶情色。
　　他老是幻想自己跟東瀛的鄰家女孩有一手……那當然只是幻想。為了實現這個幻想，他在讀大學的時候曾赴日當交流生，結果當然只是與幻想越來越遠。我也不常跟他聯絡，不過總有點一見而故的感覺。
　　「你打畀我就係問我呢啲嘢？」我當然不會告訴他，我早幾個小時前才大哭過來。
　　「唔係啦，我關心吓你咋嘛，你話過男性啊，都會有M到嘅時候。」他說。
　　「灰鳩唧，OK啦，成日都係咁……你，點解打到畀我？」難道他也在這個世界？




　　「喂，你真係說出個重點來。」他突然壓低聲音。「我諗我有啲問題。」
　　「你係咪係自己間房到出唔到蒞？」我問。
　　「你點知架？」他激動地大笑。「我就估到你有計架啦！」
　　「我冇，但你間房道門開唔到，有冇試過搵下第二啲出口？」我邊在通道行邊說。
　　「有呀，我諗住再唔得就跳窗。」他認真地說。
　　「你係咪傻架！你住廿幾樓架喎大佬！」我也認真的說。
　　「講吓笑唧，唔使咁認真。」他笑說。
　　「我知嘅嘢應該多過你，呢到唔係想像中咁簡單。」我說。
　　「你即係同我講而家我唔係原本嘅世界？」他說。「我都估到架啦，但冇理由咁真架嘛。」
　　「我唔知，我剩係知可能會有啲機關，係你間房嘅某啲角落，總之唔止得門一個出口；又或者如果我係蒞你屋企，應該就幫你開到門。」我說。




　　「所以我咪諗住打畀你求救囉……」他說。
　　「吓，你啲FRIEND呢？佢地咁近應該重易啦？」我說。
　　「搵到就係，全部都打唔通。」他說。「天水圍喎，你會唔會太遠？」
　　「唔會，我諗我有快啲嘅方法。不過唔知穩唔穩陣。」我站在另一個分岔口前，笑了一笑。
 
　　「你而家應該盡量搵吓自己間房有冇啲咩奇怪機關之類，例如床角、衣櫃呢啲，跟住帶齊自己嘅隨身物品，因為一搵到你就會去唔知邊到，好難返返屋企。」我認真地說。
　　「咁搞笑？」他說。
　　「你屋企其實係邊到，Send個地址畀我，我應該重收得到。」我說。
　　「喂，好啊。你等我一陣，唔好Cut我線呀。」他說。
　　「係啦，從來得你Cut人線呀嘛。」等候之際，指南針也沒有失效，我選了一條朝西的通道。




　　豈料他突然說：「喂，出面好似有人開緊我道門。哈哈，有救啦！你等我一陣。」
　　「吓？喂！唔好掂啲陌生人！」聽到他放下電話，應該聽不到我說話。
　　過了一會兒，又聽到他的聲音：「喂？喂！係咪傻架，道門無啦啦開咗喎又，但係又冇人係到，好搞笑囉。」
　　「咁都好啲，我都唔知點解，總之你帶齊啲嘢先，我地等陣會……」
　　話未說畢，這次是「啪」的一聲，估計電話跌在地上，傳來：「喂……喂……你係邊個？你點入我屋企架！喂……喂…….啊！」
　　「浩仔，喂？聽唔聽到！你做咩事？喂？」緊張總是掩蓋了冷靜。我沿住通道跑過去，只見不遠處就有個出口。我一直保持通話，當監聽器也好，至少能聽到他房間的動靜，直至打開這個像滑梯一樣的出口，通話因網絡失效已結束。
　　幸好這次早有準備，雙腳剛好到地。又是大同小異的嘈雜……這裡是……「屯門新墟街市」！還好來到了新界西。我跑出了街市，盡量避開那些如常過活的怪人，往天水圍的方向走去。
　　「行過去太遠，但係搭交通工具又唔係幾安全……」我邊走邊盤算可行的方案。
　　忽然聽到女子微弱的哭聲，從左面的小巷傳出。
　　「有冇人呀？」我慢慢走近這小巷，這種哭聲應該不是「怪人」。
　　
　　我不斷提醒自己要小心，生怕這種怪聲是恐怖片裡出現的陷阱，可是我直接走過去，根本防不勝防……又或者，我已毫不懼怕。
　　豈料我越走近，越感覺這人似曾相識，繞過那部手推車，竟見到……
　　「小花？點解你會係到？你唔係已經返左……」小花只是阿花的另一個花名，而當我回想這脫離現實的情況，後句就說不上了。
　　只見阿花瑟縮一角，躲中一條頗為整潔的後巷。她抬頭望我，滿臉盡是淚痕。




　　「晨晨……點算好啊…..我唔知點算……」她抬頭說。
　　幸好她不是向我投懷送抱，否則我會更害怕那些恐怖片情節會在我身上發生，而我的戒心也少了。
　　「發生咩事？點解你喊成咁？你慢慢講。」天啊！為什麼我在她面前總是化身輔導員？
　　「我唔知……我好驚……」看來她真的吃了一大個驚。
　　「到底咩事？你……畀人強女女女？邊個！等我揪佢出蒞，中出返佢！」我嘗試認真地打笑。
　　什麼？我在說什麼？衝口而出的一秒，我就後悔了。
　　「哈哈？嘻嘻？」她破涕笑了一笑。
　　「你笑點真低，咁都笑得出。」看來也不是什麼大事。
　　「晨晨……我好驚，我真係好驚……」三秒後的她，回復當初緊張的神情，還不時探頭張望。
　　「到底咩事唧，你講得未？」我不太耐煩地說，我想要是在電視劇裡看到這種煩人的對白，所有人都只會認為是在「拖集數」。
　　不過，看她雙手異常顫抖得像低溫症發作，我連忙捉住她的手，讓她冷靜下來。然後就似她一樣，蹲在地上，頭兩側望去，像是替她把風。
　　「講啦……」過了良久，她沒有說話，但呼吸慢慢回復正常。我回頭掃她一眼，卻見她凝住我。「你望我做乜鬼唧？」我的手也縮開了。
　　她似是醒過來，用足中氣地說：「冇啊。晨晨我……我……我殺咗人！」
　　「吓？」第一個反應是：殺了人還說得這麼聲大，傻的嗎？
 




　　「我…..真係啊，點算啊！」她見我沒什麼反應，又說。
　　「咁你想點？」我說。
　　「我就係唔知先問你……點算呀晨晨……晨」她說。
　　「唔好嘈！一係你報警，不過而家應該冇用架啦；一係你走佬；一係你帶我去，幫你埋咗佢。係得呢幾種。」我說。
　　「報警？報警同佢地講唔係我殺，好冇啊？好冇呀？好冇唧？佢地會唔會信我？」她緊張地說。
　　「你帶我去睇下先，可能而家已經好大單嘢呢？」我說。
　　「好……好……你拉一拉我起身，我腳痺。」我扶她一把，與她走回大街。
　　「邊個蒞？」我說。
　　「樓下個看更伯伯…..我好亂啊、好恐怖，我唔知係咪我殺咗佢，我唔知點解佢會死架！」她說。
　　「你掂過佢？」我想了一想，說。
　　「好似有呀，咁係點？」她說。
　　我停了下來，說：「咁唔使返去啦。」回想起我在大埔被那班叔叔嬸嬸像喪屍般追趕，還是不重蹈覆徹。「呢到唔係我地個世界，返去都冇用；我地去搵浩仔。」
　　「浩仔？點解？你搵到佢？我連我屋企人都未搵到。」她說。
　　「唔好問咁多啦，總之佢可能有危險，去咗天水圍先。」我說，沒想太多就截停一輛的士，與阿花上了車。
　　在車上，我跟阿花定好了找尋浩仔的方法。她的電話裡也出現與我一樣的地圖和標記，至少確保我倆不會迷路。




　　「落車！」的士停了，我連忙拉阿花下車，也沒有給的士司機半分錢。不過正如我所料，那個沒有說話的司機，見我倆下車後，毫不猶豫地把的士開走，沒有半點詫異的反應。
　　「有咩嘢事，就記得先通知我，唔好自己入去，好易出事。」我實在是想不到更好的方法，只好憑印象，來到浩仔所住的屋苑。我跟阿花分開找，每家每戶「地毯式搜查」那間大門大開的單位。
　　「好，我知架啦。你畀我都唔夠膽自己一個入去啦，講到佢畀人捉咗咁恐怖。」她說。
　　「重有，唔好掂陌生人。」我說。
　　「係啦係啦，重覆好多次啦。」她回過頭來，向我微笑。
　　雖說阿花明顯比剛開始遇到她時怪異，但知道她還平安，我也感安慰。可能是她剛才刺激太大，又或者還未接受自己來到，這不再是香港的香港所致。一切都太撲朔迷離，我還搞不清楚這裡到底是什麼、到底如何回到以前的居住的地方。
　　這裡，應該有點規則我還沒弄清。