校園愛情治療師: 晴
……
扁鵲見蔡桓公？唔，好似聽過。
乜鬼野愛蓮說，上堂有講過咩？
……
實用文，寫啟事？死啦，個格式係咩。
……
「好喇，夠鐘，咁多位同學停筆。
我會過黎逐個逐個收卷，唔好出聲。」
……
我趴係枱面上，覺得個人完全冇曬力，
隻手又痛，唉，我望一望周圍，
啲同學都走得七七八八，
仲有幾個仲執緊野，我轉翻個頭，
又唉多一聲。
呀James佢地仲未考完，
既然仲有啲時間，
不如搞掂埋Emily啲野先，
唔知佢走咗未。
我諗就即刻執起個袋，
向後面個班房行過去，
喺個班房出面望入去，
佢喺度同班同學傾得好開心，
我向Emily揮一揮手，
但似乎佢睇唔到，
反而係佢格離嘅同學見到，
即刻好興奮咁細細聲咗啲野，
又大大聲咁笑，
過咗一陣，
全部人都吱吱喳喳咁行出課室，
淨翻Emily一個。
我入去搵個位坐低，
反而係我唔係幾好意思，
「冇阻住你地呀嘛。」
「冇……」當佢耷低頭嘅時候，
佢嘅及耳頭髮遮住半塊面，
果然我都係唔知點同佢相處，
我同佢因為家姐嘅關係又係由細識到大，
但係唔知點解，
隨住升班，
慢慢開始搞唔清楚我地之間嘅距離，
明明好熟悉，但係又有一種疏遠感。
「其實係家姐叫我黎㗎，
點解你會想讀體育呢科。
你應該可以揀其他科讀。」
雖然佢細個好男仔頭。
「我想大學讀關於體育科學嘅科。」
「你好有興趣?」
「唔。」
「不過讀運動科學其實都
唔一定要中學讀體育㗎。
係會有幫助但唔係必要。」
「我覺得以你嘅成績可以揀其他科讀，
之後會有多啲路揀，無謂俾一科體育限制住你。」
「唔……」
「你班主任同屋企人知唔知?」
「我淨係同咗家姐講乍。」
佢把聲真係幾軟幾舒服，
同以前唔同。
但係時間都差唔多。
「咁你同佢地傾吓好啲，
話時話你另外嗰科想揀咩？」
「Bio。」
我忍唔住望咗佢一眼，
「你都係諗清楚好啲，
我仲有啲事，走先。」
我急急腳又走出課室，吸咗啖氣，
上樓梯之前，向後望一望，
佢已經走咗出去，
佢班朋友應該都等緊佢。
B班班房喺上面一層，
真係好奇怪嘅設計，我地兩班喺呢層，
但係AB兩班又喺上面嗰層。
我入到去都仲有幾多人未走，
我相信係因為嗰個人嘅關係。
呀輝佢企咗係窗邊唔知望緊乜，
而有兩個女仔坐喺佢附近 ，
雖然咁諗唔係幾好，
但係佢地坐埋一齊真係有啲對比，
喺許璐琳格離，
我諗任何女仔都會失色唔少。
或者佢放頭髮會好啲？
我諗翻起球場嗰日。
我喺門口已經感受到唔少
應該唔係歡迎我嘅視線，
不過我都慣，
我慢慢行到窗邊。
「話說好似係你第一次過黎呢個課室喎。」
「你啲同學都幾鍾意我喎。」
「緊係啦。你咁出名。」
「呀James佢地呢?」
「差唔多，佢地喺hall考完就會上黎。
你唔過去講兩句？」
佢笑一笑。
我望一望窗口，
見到Emily同佢啲朋友，
「等到人齊先啦。」
反而係嗰個女仔走過黎，
喺我耳邊細細聲咁講，
「你放心，我冇同璐琳講你地啲野，
佢只係當考完試一齊去玩㗎咋。」
一陣若有若無洗頭水嘅味道
輕輕撩動我嘅鼻腔，
今日佢放埋啲陰落黎，
變咗齊陰馬尾，
可能因為就放假，所以隨意啲。
「……好呀，唔該。」
「唔洗。」
氣味帶住半抹微笑飄然而去，
亦都冇留低一縷髮絲。
但係嗰種悵然若失嘅感覺，
好熟悉。
「好喇，人齊啦嘛。」
講野係呀輝。
「你開始啦。」
我點一點頭。
「嗱，我地呢班就係長洲兩日三夜嘅團友，
大致嘅計畫就寫咗喺本筆記度，
住呢，就會住由屬團友提供嘅民宿。
食呢，就大家都準備一啲，
唔知你地有冇問題呢？」
「我冇聽過去長洲，
仲要同啲唔識嘅人去。」
呀James女朋友問，
佢用頭指咗兩指，
「我識嘅得呢二個人。」
佢講緊許璐琳同呀James。
「你又想點？」
佢唔耐煩咁同James講。
「Relax，你咪當去旅行咁囉，
你唔係自由行都要
同啲唔識嘅人去㗎啦。」
「啍！」
我同呀輝對望一眼，
冇諗過佢女朋友係咁嘅人黎，
性格咁差。
「 Tiffany姐姐，你當去玩咁就得，
佢地……都係好人黎㗎。」
許小姐交出助攻，
雖然我覺得個停頓位係多餘。
佢嘅眼神攻勢，
我諗都幾難拒絕。
「唔……我信你，我去囉。」
「嘻嘻。」
佢究竟做咗啲咩先可以令到許璐琳咁投入……
「我會開個Whatsapp group，
有咩問題就喺上面問啦，
唔阻大家喇，今日就咁。」
Tiffany望住呀James，
「出去講。」
許小姐見到氣氛唔係太好，
亦都跟咗出去。
而我地呢邊，
呀輝話有野做亦都走咗，
得翻我同佢，
睇黎都係時候問佢叫咩名，
冇理由都去得旅遊都唔知佢叫咩名㗎。
但點開口好？
「你頭先係咪話開個Whatsapp group，
宜家可唔可以add我入去？」
「哦……好啊，
不過我地低調啲。」
「唔？」
我唔好意思同佢講我
再俾人收電話就要搵家長，
雖然佢應該唔會黎。
「呃，點叫你？」
「張雅晴，
你叫我雅晴或者呀晴都得。」
「得喇。」
「你洗唔洗搵埋佢地攞電話？」
「唔洗，我有㗎啦，
Tiffany嗰個我問呀James都得。」
「咁我都返去先啦，
有咩事就Whatsapp度講啦。」
「啊， 我想知點解許璐琳會咁投入去長洲嘅？」
「呢個係祕密。」
佢將一隻手指放係嘴唇上，
馬尾一揈，轉身出去。
「拜拜。」
雖然我見唔到佢嘅表情，
但我都想像到佢面上嘅笑容。
「吓？」
打颱風冇野做，打文消磨時間。