校園愛情治療師: 秋天該很好

「呀輝哥有咩高見?」

我望住佢依舊低垂嘅眼皮，

佢嘅睫毛微微咁抖動

「其實個女仔都幾單純，

竟然為咗去九寨溝定去歐洲同呀James嗌交，





俾着其他人諗都唔洗諗。」

「可能人地真係好想去九寨溝呢，
仲有佢地仲冷戰緊。」

個女仔抬一抬頭正想講野，
不過望咗呀輝一眼之後欲言又止咁低翻頭。

「你想講就講。」呀輝漫不經心咁講。





「我覺得個女仔係驚去到歐洲因為見識少
而會令佢男朋友唔開心，
所以先揀啲普通地方去。」

呀輝又打開咗佢本筆記，
轉起手上嘅筆，
「你地覺得呀James想帶
女朋友去歐洲嘅動機係咩？」
「或者我地又諗吓原版嘅come on james，
男女主角又諗緊咩?」




佢同時係本筆記上面寫咗幾隻字，
又圈又連線，
不過由於我坐佢對面
所以我睇唔清佢究竟寫乜。

佢見我地冇反應，
就繼續一路寫一路講，
「女主角嘅思路最易明，
第一層就係佢認為九寨溝太庸俗，
只係得瀑布同湖，最重要係咩，
九寨溝係中國嘅地方，聽到都唔開心啦。
而歐洲就有古典氣派，
高貴有悠久嘅人文景觀。
先可以襯托到佢嘅身份氣質，
雖然我就覺得明顯太過抬舉自己，




不過始終地球是hku領先，
佢咁諗都唔出奇嘅。」

佢停一停，又加咗幾筆，
我今次終於望得清楚，
似乎係中文嘅分段落大要？

「第二層就係一啲物質層面上嘅差異，
九寨溝可以買到嘅野最多咪啲
淘寶上面有嘅工藝品，
但係歐洲有名牌一條街，
有展覽，行吓羅浮宮，上吓教堂，
入吓城堡，聽吓歌劇，
好容易就滿足佢到嘅虛榮心，
放上Instagram威俾人睇，




加幾句法文hanstag，
放張佢企係香榭麗舍大道中間嘅相，
show俾人睇佢幾咁有品味，
順便又望吓有冇吸引到有錢仔同佢講吓野，
得閑又可以flirt吓。
你唔係以為佢去歐洲真係想體驗農村生活，
住木屋飲羊奶，
定同你坐係海邊飲啤酒食pizza吓話。」

呀輝篤一篤枱面，將我地帶翻現實。

「你會唔會諗太多啊?」我問佢，
「其實我只係針對個角色嘅性格言行去分析，
如果你覺得唔舒服嘅話，
就係證明咗作者凝造出




一個好成功嘅貪慕虛榮角色，
而由於佢鮮明嘅形象，
你好輕易就可以喺唔同人上面搵到相似點，
就係因為真實所以先至痛苦。」

「呃，我想問聽日份中文卷會唔會咁難?」
雖然我冇咩點上過堂遮，
冇理由中文會變成咁架?

「唔會，我只係用翻嗰套思路。」

「咁都好啲。」我放翻啲心。

「第三層就會複雜啲，
要用翻前文後理，




其實成件事都係佢用黎分手嘅借口，
用黎合理化因為大家
價值觀唔同先分手呢一個理由，
無論去九寨溝定歐洲定長洲都好，
其實都冇關係，
甚至退一百步咁講，
女主角唔講旅行都有其他野可以講。
當然，真正分手嘅原因我地都好清楚，
好大部分唔關於男主角
諗緊乜或者做過啲乜。」

「……長洲？」


「但係你之前又話分手係唔洗理由嘅?」
我問呀輝，不過頭先係咪有人講野？

呀輝停咗半秒。

「應該咁講，變心係唔洗理由，
但係分手係要理由架，
只係個理由合理與否唔重要遮。
就好似你鍾意一個人係唔洗理由，
但係想同佢發展關落去就要咁，
不過今次就要個理由合理。」

呀輝望一望個鐘，
「好啦，時間唔多夠，
我地就唔講男主角啦，
返返正題，點樣幫到佢地?」

我順住佢嘅目光望過去，
仲有半個鐘佢地就收鋪，
「一係我地搵個機會問吓佢地點諗？
但係佢地又冷戰緊，
都冇機會約埋一齊。」

「不如去次小型旅行?」

我同呀輝不約而同望過去，
只係見到個女仔一改頭先唔敢出聲嘅態度。

佢用好興奮，發曬光嘅眼神咁講，
「不如我地去長洲，我呀姨係嗰邊有間屋，
我地可以借黎住幾日，一路玩一路
慢慢問清楚佢地點諗啊！」

我望一望個女仔，又望一望呀輝，
頭先提長洲先嗰個好似係佢？
「咪住先，咩我地？」

「你呢個提議幾好呀，就咁啦，
考完final之後有一個禮拜假，
就搵埋佢地兩個，我，
你同你，再搵多個女仔。」

「喂……」

「我諗好咗架啦，搵埋璐琳啱啱好三男三女。」

「吓喂，我仲未……」

「好啦就咁決定，你去搵許璐琳，
我地搵呀James同女朋友。
詳細野考完中文再傾。」

「咁我都係時候返去。」女仔企起身，
向住廚房揮一揮手，而世伯點一點頭，
Auntie見到就走過黎問，
「呀女你走喇？」
未等到女仔俾反應佢就轉過黎話
「收鋪我地黎得架啦，你地送佢返去啦。」

「唔洗啦，我屋企好近架。」

「得啦得啦，咁樣安心啲呀嘛。」

街上面已經冇咩人，
連車聲都唔係太聽到，
女仔行係前面，
而呀輝同我就係佢五六步後面，
我見大家都冇講野嘅意欲，
就細細聲問呀輝，
「無啦啦點解要搵許璐琳入黎遮?」

「因為你最尾都係解決唔到佢嘅問題，
橫掂你都話同佢反咗面，
咁咪順便俾機會你同佢和好囉。」

「你都識講反咗面啦，佢仲點會肯黎。」

「佢可以。」




呀輝低頭望住昏黃街燈喺佢身後
拉出黎長長嘅影子，
我亦都跟住一齊望過去。

一步，一步，慢慢越黎越近。

就黎掂到佢嘅影子嘅時候，
我抬起頭，咁啱同佢對望，
我望到街燈喺佢眼珠嘅倒影。


不過佢即刻就移開咗視線，
「你地……送到呢度就得啦。」

望住佢面上嘅笑容，
我心裏面總覺得同佢以往嘅笑容有啲差異，
我衝口而出一句，
「但係呢度周圍都冇屋喎？」

「前面行多一陣就到架啦，真係唔洗再送。」

佢嘅表情由頭先虛構嘅笑容變做苦笑，
呀輝撞一撞我，
「人地話唔洗就唔洗啦，行啦。」
順便大大力咁拉住我行翻轉頭。

個女仔向我地揮一揮手，
「拜拜，聽日B班班房見。」

呀輝冇轉身，揮一揮手就當道別，
而俾佢拉住嘅我勉強轉過頭，
做咗個拜拜嘅口形，
佢向我微微一笑，之後都轉身慢慢行走。

唔知點解，我望住佢嘅背影，
同頭先嘅笑容，
我突然心入面有一種難以形容嘅悲涼感覺，
就好似秋天嘅氣息咁樣。






「我好似仲未知佢叫咩名。」
我口噏噏。

「想知你咪問人囉。」

「你同我講都得架。」

「暑假就黎到啦。」
呀輝望向天空。
「咁又一年。」