校園愛情治療師: 桂花糕

雖然我喺跑完步之後都一定會黎生記甜品，
但係同埋個女仔黎係第一次，
我有種衝動係想好似其他人咁排隊入去，
冇咁明顯。
但係前面個女仔望到條隊都係冇排隊嘅意欲，
冇任何遲疑咁行咗入去。
我唯有跟住佢，
明明平時可以頂得住排隊嘅人嘅目光，
但宜家我竟然覺得咁尷尬。





不過今日真係好少人，唔通生招牌唔係度?


我一行入門口就見到auntie兩隻眼發曬光咁
同個女仔傾計，完全冇留意到我嘅存在，
我嘗試打招呼，叫咗幾聲之後先發現我，
「咦，銘仔你都係度嘅？」
「係呢，呀輝今日唔喺度?我四圍睇都唔見佢。」

「佢話聽日要測驗所以溫緊書，你地坐陣等等，




我去叫佢落黎。」

Auntie拉住嗰個女仔搵咗張枱坐低，
我都跟住。佢好有興趣咁周圍望，
好似所有野都對佢好新奇咁，
我忍唔住開口問：「你係呢度嘅熟客黎?」

「都唔算，因為我小學之後就冇黎過呢度。」
佢帶住懷念嘅眼神，微笑住咁講，
「你呢？我見呀姨都識得你。」





「一開始呀輝帶我黎，
之後我一個禮拜都有兩三日會黎。」
「啊，呀輝係auntie個仔。」

「我知，我同佢以前都係好friend。」
講到一半佢似乎唔想再講落去，
我亦都識趣起身走向廚房，行到半路，
我又諗起冇問佢想食咩。
我正想返轉頭問嘅時候，
世伯已經拎住兩碗糖水過黎，放低冇講野就走咗。

枱面上嘅係一碗豆腐花同一碟桂花糕。

而呀輝亦都帶住本筆記面無表情咁走咗入黎。