唔係掛！原來真係有鬼！－現代捉鬼故事: 外傳 - 命運的哀歌 - 08

少年拿起了斷線的元兇，電話。 
「喂？係唔係志堅呀？」電話另一面傳來一把女聲。 

「邊叉個呀，你搞到我打唔到機呀！」少年狠狠的回答。 

「我係教會美儀導師呀！我見你咁耐冇返教會，特登打黎睇下你點架。」 

「幾好丫，我冇野，未死得，咁收得線未？」少年極不耐煩，只想再次回到遊戲世界中，成為第一個收服紅色暴龍的玩家。 

「你唔好咁難過啦，Owen 既死其實唔關你事架。」 





「你收聲啦！你知發生咩事咩！」少年氣憤到極點。 

「......不如咁啦，我一陣帶埋其他弟兄上黎探你啦,好唔好？」電話另一邊的女士道。 

「...你話事啦。」說完這句，少年就掛上了電話。 
再次沉醉於電腦遊戲的世界當中。 

旁晚時份，家中的門鈴響起。 
少年萬般不願意地將遊戲角色登出，走出房間開門。 




他知道，門後的都是一班偽善而煩討厭的家伙。 

「叮噹。」門鈴再一次響起。 
「黎緊喇！」少年對門大叫。 

打開厚厚的木門，鐵閘外站著美儀導師及幾個教會弟兄。 
大家打扮樸素，就像是學校中的老師一樣。 

「入黎啦。」少年門開鐵閘。幾位教會朋友進屋後，少年看了看門外的電梯大堂， 
之後將鐵閘關上。為使空氣流通，少年特意把木門打開。

幾位教會朋友坐了在梳化上，少年拿了張圓櫈，坐了在他們對面。 
就像見工面試一樣，少年望了望聚人。 

「點呀？我未死丫，冇穿冇爛，咁多位滿意未？」少年單刀直入，因為他不想教會朋友們阻礙他進行遊戲的一分一秒。 

「你唔好咁啦，其實Owen 返左天家，大家都好難過。」其中一個年長的男性教友道， 
「不過呢個都係天父比你既考驗。」 

少年冷冷一笑，因為他已經聽厭了所謂的教義。 
甚麼上天的考驗？甚麼神的思賜？ 
這兩個問題，在Owen 死後，少年不停反思。 

「考驗？」少年細聲說。 
「Owen 出事既時候，你地o係邊？你地既神又o係邊？！」少年大聲怒吼。 





眾人無語。 

「如果你地個神ｏ係度，Owen 點會有事？！」少年雙眼泛紅。 
「講野呀！你地做乜唔講野呀？」 

大家也知道，現在再說話也只會刺激到少年的情緒。 

「算啦，你地走啦！帶埋你地既神所謂既恩惠，即刻走！」少年走到鐵閘前，把閘拉開。 
正當少年打開鐵閘的一剎，他看到一個身影，一個不可能再出現於他面前的身影。