唔係掛！原來真係有鬼！－現代捉鬼故事: 第十章 - 萬惡之夜 -9

「頭先我見到有個黑影，我以為係跟隨我地嗰個人....」
 「咁依家條友呢？」師傅語帶點氣忿地說。

「我諗....佢走甩左....」我為了保護Somky ，決定欺騙師傅。
因為如果我同師傅講Smoky 出現，可能佢會認為Smoky 同今晚目標係同一伙，
雖然呢一點我都未必可以肯定。

「大哥，唔該你下次醒番少少，我本身諗住同你由門口慢慢掃入黎，
你睇下依家？你好似平時人地打機拉怪咁呀大佬，依家一車怪，你話點清？」





「呀．．．．」面對師傅嘅指責，我知道我除左道歉，跟本講咩都冇用。
「對唔住呀師傅。」

「唉，Load 夾啦，捉唔曬架喇，清啦。」師傅以理智按住了怒火，
但難掩面上的無奈地說。

「清？」

「即係殺曬佢地。今日，我地同佢地，一定要有一邊訓低曬件事先完到。
我地已經入左佢地地盆深處，依家返唔到出去架喇。」





「.............」嗯一刻，我終於知道我以為無傷大雅嘅事，引起嘅後果原來咁大。
結界之外，每一個靈魂原本都是一條生命，原本佢地都可以有轉世嘅機會，
但係因為我嘅魯莽，我嘅衝動，依家佢地已經化為一班等待永遠死亡嘅可憐蟲。
雖然由眼見到佢地第一下已經唔覺得佢地身上有任何希望之光，但都未至於要煙消雲散。
 
我。令它們失去了生存的機會。

係我令佢地失去左再世為人嘅機會、失去左再次同所愛團聚嘅機會，
係我...全部都係因為我。




結界外的黑色生物苦痛的面容，彷彿都是因我而來，
耳邊突然好像出現無數哀號跑進了我的腦海，不停地重覆，似是控訴我將要犯下的殺戒。


大地的震動將我由哀號痛苦的黑洞中帶回了現實世界。
地上一下接著一下，有規律的震動將以鐵皮搭建而成的市集震得像快要倒塌一樣。
就像是一隻大型野獸的腳步聲。

師傅早已定睛望向腳步聲的方向，即使在我眼中只是一氣漆黑一片的通道。

「呢堆野交比你。」師傅看來早已知道對方實力不容忽視，黃金籌碼早已在左手之間滾動。
「我地去打大笨象。」