唔係掛！原來真係有鬼！－現代捉鬼故事: 第十章 - 萬惡之夜 -5

「喂，執齊野未？」師傅問。

「嗯。」

「咁出發喇。」

我望一望鐘。
時間已經係六點半，即係話，無聊嘅已經又過左大半日。
當然，呢半日入面，我亦已經早早準備好所有一陣工作需要用到嘅工具。
狙魂彈已經一早上齊落每一隻彈夾，鎗亦check 好曬唔會有任何問題。




我將所有工具放到入自己新買嘅鐵制工具箱，工具箱外觀就好似裝修師傅電鑽嘅盒一樣。
而師傅已經將黑白二傘架於腰間，黑色 『蔡瀾袋』亦早已架在肩上，靜待出發。

我們二人坐上向調景嶺嘅地鐵，師傅工作前夕總是特別寡言，
而每次工作前都唔會同我講我地嘅目的地，
又或者我地嘅目標，而今日亦唔例外。

每次工作有師傅喺身邊，從來唔會感到憂慮，
但係今日卻於內心入面有一陣隱隱嘅不安，就如八號風球時，
你明知你已經留在最安全嘅地方，但係狂風吹襲下，玻璃窗發出陣陣敲擊聲音的不安感覺。





我不經意地將手放到腰間的氣鎗彈夾，緊緊的抓住去宣洩這種不安。
或者是因為這個原因，自己心中也覺得好像有某個人一直在跟蹤著我們兩師徒。
師傅也似乎留意到我不安的感覺，又或者我嘅面色已經變得相當難睇。

「做咩呀，今日到你唔舒服呀？」師傅問。

「唔....唔算啦。」

「駛唔駛返去抖抖？」





「OK 頂得住。」

「咁其實我地都係去觀塘食左野先啫，再夜D先開工。一係你睇下你一陣點再決定啦，
反正我有冇你我都掂。」師傅笑說。不過我知道雖然師傅把口係賤，但係佢內心都關心我呢個徒弟。

我地喺觀塘唯一一個大型商場搵左個位落腳，但作為毒撚，咪又係食Foodcourt！
喺我食完野之際，我亦同師傅道出我地懷疑比人跟蹤一事。

師傅只是笑了一笑，看來師傅比我更早已經察覺到異樣。
 「放心啦，一陣我地去嘅地方冇人會去，到時就知龍與鳳。」師傅說。

「嗯，咁睇下一陣點啦。」

「喂，睇唔睇場戲先？」





「又睇？！」

睇黎睇戲已經係我地等開工前嘅唯一娛樂，不過都係嘅，
邊有地方可以比你坐咁耐，而你又唔駛點廢神？戲院真係唯一選擇。