【苦】《英雄聯盟》 - 一件次世代既愛情工具: 《離別》

『嗚嗚……』 

「呃…」 


老老竇竇，我都係第一次見女仔係我面前喊成咁既樣。 

可能因為以前無女仔真正咁鍾意過我，所以我離開果啲女仔時，佢地都唔會流下一滴眼淚。 

畢竟，佢地想要既…只係係朋友面前炫耀自己既威風，炫耀我幫佢地打到既牌位… 



而唔係真心愛上我。 


哈，或者我終於明白…果啲靠錢得到愛既富豪，應該同我有同一番感受。 


「喂…你…」面對這樣的情況我完全不知所措：「唔好喊啦…」 

『嗚…』詩娜攬緊枕頭，不斷哽咽著：『唔…唔準望呀！』 




當然，你叫一個喊緊既女仔唔好喊，佢就愈喊，叫佢唔好嬲，佢就愈嬲。 

如果你係我，面對住呢個束手無策既情況會點做？ 


「呀…」我突然靈機一觸：「不如我講個笑話比你聽呀。」 

『嗚嗚……』詩娜鬆開枕頭，雙眼通紅楚楚可憐咁望住我：『唔聽呀…！唔聽呀！』 




呢樣又唔得，果樣又唔願，屌…有時真係覺得女人好麻煩。



「唉…」我歎一口氣，嘗試轉移話題：「不如…我地講下各自既事呀？」 

『嗚……』她繼續抽泣著，卻沒有反對。 

「我講自己先喇，」我躺在地上，回想著：「唔…講咩先好呢…呀～就由我細個開始講起啦。」 

『細個…？』詩娜暫停了哭泣，一邊哽咽一邊看著我。 

「嗯…」我繼續說：「記得我細個既時候…屋企真係好窮，但父母又要返工做野，所以就將我掉左比啲親戚養。」 



『下…』詩娜流露著好奇的表情：『點會喎…唔好呃我啦…你嗲地媽咪點會捨得呀…』 

「哈，」我苦笑了一下：「你估個個好似你咁有錢咩？家家有本難唸的經嘛。」 

『咁之後呢…？』詩娜拭去眼淚，追問：『咁你唔同嗲地媽咪住…咪會好悶囉～？』 

「悶？」我不禁皺眉冷笑：「何止悶，簡直係悲慘。」 

『點解？』她用水靈靈的眼眸凝視著我。 

「記得果時…」我回想道：「我寄居係婆婆既屋企…而且仲有好多表兄弟姐妹一齊住，一家有十幾人，非常熱鬧。」 

『咁咪好囉～？有咁多人陪你？』詩娜好奇的問。 



「錯喇…當然唔好。」我搖搖頭說道：「每一個月，我父母都會比一筆錢我婆婆一家人，負責我幼稚園既學費，同生活上既費用等等…而且，仲經常會買玩具比我添…」 


『咁好好呀…邊度唔好？』她問道。




「但…」我皺著眉回想起：「每次父母買比我既玩具，都會被舅父搶左去比佢啲仔女玩，玩到爛哂…先會比返我。而且…啲表親全部都會恰我，甚至打我…食又食唔飽…」 

『下…佢地咁衰架…！！』詩娜稚氣地幫我抱打不平。 

「無辦法，」我搖頭歎氣：「因為我父母同佢地講，唔洗鍚住我，當係自己仔女咁教就可以，有唔聽話就打，唔洗比面。」 

『啊…任天衡……』詩娜的嘴扁扁惋惜的道。 



「你睇下，」我抽高衣袖，露出十數道長長既疤痕：「我舅父母，每次打我都會用鐵衣架折成既鐵枝，兩條繞埋一齊…咁去打我。」 

『嘩…呀…』詩娜的黛眉緊皺著，伸出雪白的小手觸碰：『痛唔痛架…？』 

「唔痛。」我冷靜的說：「就算痛，都唔可以話痛。」 

『下…乜你果時無喊咩？？』 

「無。」我冷冷的說道：「如果我咁易喊，就等如求佢地唔好打我，所以佢每次打我，我都死忍著。於是佢地就愈打愈大力，愈打愈狠。」 

『嗯呀…任天衡…』詩娜一臉憐憫的樣子。 

「我就係…係呢種環境下長大。」我續道：「直到中學我先同返屋企人住，自此，就算我遇到咩情況我都唔會流一滴眼淚。」 



『哦……』



「所以你都要堅強啲，唔好咁易喊啊知嘛？」我回望著詩娜說。 

『哼…知道喇…』詩娜雖然答允，但仍保留一股小姐脾氣。 

「咁你呢～？」我回復平靜：「到你講下喇？」 

『我？』詩娜的螓首微微側著：『關…關你咩事喎！』 

「唔係嘛大佬～我講左咁多…你唔講返多少你既事比我知～？唔公平喎老細。」 

『我……』詩娜吞吞吐吐的說。 

「講啦講啦，」我期待的說著：「我唔會講出去～」 

『其實我…』詩娜低聲歎氣的道：『都唔係你想既咁開心架咋……』 

「點解？」我好奇一問：「有錢都唔開心？」 

『嗯嗯…』詩娜娓娓道來：『我同你唔一樣…由我細細個開始…嗲地媽咪已經好錫我…咩都會買比我……對我無微不至咁…』 

「咁有咩唔好啊？」我繼續問。



『雖然係咁…』詩娜抱著雙腿，可憐的說：『但由細細個開始…佢地都會幫我準備好哂一切…唔理係我鍾意…定唔鍾意…佢地都會迫我去學…』 

「咁正，」我羨慕的道：「如果我有得學就好囉！」　　　一定溝死女，我心諗。 

『你以為啦～』詩娜打斷我：『有時候我學彈琴…日日都要好多個鐘…每日都要練習，無得休息…』 

「無得休息？」 

『嗯…』詩娜點點頭：『一年365日…每日都要練八個鐘…』 

「真係架…？！」我心底驚訝不已。 


試想下，假如我入左戰隊打LOL，要我每日定時訓練八個鐘…我諗…我都悶到想死。 

而且詩娜仲要係由細個到大都係咁…可想而知有幾辛苦。



『當然係真架啦…』詩娜琅琅上口的說：『我地有句說話…一日唔練自己知…兩日唔練同行知…三日唔練…大家都知…所以…我唔可以唔練…』 

「下！？」我忍不住衝口而出：「傻的嗎？唔鍾意咪唔好去做囉…！最緊要自己鍾意嘛！」 

『無用架…』詩娜回想著：『我試過一次發脾氣唔練…爹地嬲到困左我係房三日…果三日…真係好辛苦…好難捱…』 

「痴線…」我心底不禁驚訝著：「點會有呢啲父母架？」 

『而且…』詩娜忽然回望著我：『最近有件事…爹地都幫我決定左……』 

「咩事？」我不以為意地追問。 

『係…哼！…』忽然間，詩娜語調一轉：『關你咩事～！』 

「………」 

『哼，你咁八卦…唔同你講喇！我訓覺！』 

「下…咁突然。」 


語畢，詩娜就蓋上棉被，背著我倒頭大睡過去。



呢個時候，我亦明白到…原來表面上幸福既人，實際上都有佢地不為人知既一面。 

就好似詩娜咁，儘管我一直都以為佢要乜有乜，可以呼風喚雨等等…但原來…都有佢既難言之隱。 

如果我變成佢…我又會點呢？或者到時…我可能寧願好似而家咁，自己搵自己食，總好過被人操縱住自己既將來。 

原來有時候無自由，相比起無錢更可悲。 


房內回復一片寧靜後，我望一望個鐘…原來已經不知不覺去到五點。 

我真係唔敢相信…呢一晚我真係對詩娜咩都無做到。 

望住她的背影，長長既秀髮下…原來埋藏住獨自承受既悲傷。 

作為一個男人，我真係好想過去攬住佢，同佢講…：「你並唔係自己孤單一個，你…仲有我。」 


當然…呢啲電影情節…又點會出現係我身上先得架？如果真係咁樣做，分分鐘比佢一巴打埋黎都似。 


正當我係度胡思亂想，輾轉反側不能入睡之時… 



我好似仍然聽到…… 



詩娜既哭泣聲…




我坐起來後，慢慢靠近她，輕聲說：「詩娜…？」 


『………』詩娜背對著我，沒有回應。 

「你仲未訓咩…？」 


『任天衡…』詩娜用沙啞的聲線背著我說：『你會唔會…唔記得我架…？』 



「唔記得你…？」我莫名奇妙的問：「傻…我點會唔記得你…」 

『萬一……有一日我唔係度呢…？』詩娜哽咽著說道。 



「下？」我呆了呆：「你唔好嚇我呀…？你唔係有絕症啊嘛？」 


『你答左我先啦…！』詩娜淘氣地追問：『你會唔會…忘記我？』 



「唔會。」我堅定的回答。 



『……任天衡…』詩娜慢慢轉身，百般哀愁地…面向著我：『你過黎…』 



「下…？」 



『訓上黎…』 



「……」




雖然四周漆黑一片，但我呢一刻竟然感到自己開始緊張起來。 

不單止面紅耳赤、心跳加速，而且口部特別乾涸，緊張感令到我不禁不停地嚥口水。 

聽完詩娜呢句之後，我無出聲，只係慢慢坐到床上，背對著佢。 


『喂…』背後忽然傳來詩娜溫柔的聲音。 

「做…」我雖然躺在床上，但整個人彷彿石化了一般動彈不得：「做咩…？」 



『擰過黎呀……』她嬌柔的道。 

「哦…」 



我就好似一個收到指令既機械人一樣，詩娜叫我做咩就做咩，無叫我做我就唔做， 

絕不出軌，絕不做多餘的事一樣聽話。 




「擰左喇，」我異常緊張地面向著她，緊閉雙眼：「點…？」 


『擘大眼…』 





我心跳不斷的加速，但雙眼卻不由自主的慢慢張開… 


迎面而來既第一個景象…不意外，係詩娜五官精緻的臉孔。 



好近… 



真係好近……





我都係第一次係咁近距離望住佢… 

詩娜就係我面前僅十公分左右既位置，我可以清楚望見佢清澈雙眼的光芒…不停的閃耀著。 

我感覺到…詩娜與我對望中…雙眼好似有千言萬語想同我表達一樣動人。 

不知為何，呢種情況卻沒有半點尷尬。 


但…詩娜忽然咁深情地望住我…反而令到我完全不知所措…全身簡直…好似被電流通過一樣。 

雖然我知道係男人都會被雄性荷爾蒙影響，從而望向詩娜衣領低窪處…神秘且鼓脹的地方… 

但呢一刻既我…竟然唔敢。 



我既視線，無一刻離開過她的眼神。 



『任天衡…』詩娜忽然說話。 



距離之近…我甚至聞到她身上散發的嬰兒爽身粉氣味。 



「下…做…做咩…」 

呢一刻我已全身僵硬，包括不能控制的某處。 




『我……』詩娜熱淚盈眶的說。 




「嗯…？」 






『我……要去英國喇…』 


「…」