【苦】《英雄聯盟》 - 一件次世代既愛情工具: 《嬌縱》
見到佢咁焦急既樣，就知佢真係好想羸呢一場Ranking。
正常人見到一個女仔既要求，好自然都會心生愛憐咁去幫佢手，打算討佢好感。
不過如果你以為我會咁做，就大錯特錯。
「Er……Sorry呀，」我望一望手錶：「我黎左都有一段時間，我諗都差唔多係時候要走。」
『你……』少女稚氣既臉龐中帶著幾分生氣：『你試下走！』
「哦，」我假裝不在意的說：「拜拜。」
『喂！』
我揮一揮手，輕輕的轉身離去，不帶走半點雲彩。
而果個少女，就懷著渴望既心情望住我既背影慢慢消失係佢眼前。
呢一刻，我真係覺得自己好型。
但係呢個時候。
『喂？』背後忽然傳來一聲：『係咪超市經理啊？冇～頭先你有位員工————』
「喂！等陣！」
一聽見佢講電話時，我立即以一個轉身射個三分波既速度衝去佢面前，
再匆匆忙忙地捉住佢隻手，放低個電話。
「喂…我講下笑…講下笑啫…唔洗打去投訴啊嘛…？」
幾秒間，我霸氣盡失。
『講笑～？』少女小嘴一厥，不屑地拍開我的手道：『你！而家即刻坐低！』
「哦……」
其實，我本來以為自己可以將「欲擒故縱」呢個溝女秘技運用得淋漓盡致；
但…估唔到用呢招都要睇下莊閒，分下場面。
對於呢種嬌生慣養既女仔，由細到大都可謂要乜有乜，諗住吊佢癮而得到佢好感既我…
到呢一刻先知道咁做係大錯特錯，因為對住有錢女，試問我仲邊有得還拖啊？
於是我就立即坐低，打醒十二分精神，準備投入去我打機多過食飯既世界。
按住tab制望一望兩邊形勢，雖然過左十分鐘，但兩邊形勢其實相差不多，只係中路已被推到入中塔，不過對面十分鐘食兵得五十幾隻，相信我用五分鐘就可以收復失地。
先買基本裝、再即刻行出去，然後打開setting將自己慣用既快捷鍵以純熟既手勢設定到遊戲之內。
同一時間，我留意到身邊既果一位少女，雖然雙手交叉伏在胸前，表現出不可一世既態度，但我感覺到佢既視線從來都冇離開過我面前既電腦屏幕。
「每個玩家都有佢既一套慣用手勢。」我懶係型咁作狀道：「只要用慣左，由一開始出門就可以比人領先地圖上既視野，從而………」
當我講到一半時—
『專心打你既機啦！』少女用刺耳的聲音打斷：『我洗咩你教啊！』
「………」
我唔知係佢太緊張呢一場ranking，定係佢本身既性格就係咁乞人憎，我只係知道呢一刻我已經無哂男性既尊嚴，被一個女仔係度呼呼喝喝，成何體統。
遊戲往後既發展，其實都不太難打，每次我食完一波兵都會走去食野區既怪，然後順勢陪同打野、幫下路gank埋，再而打龍，入侵對面野區，分佈視野，整個過程行雲流水，毫無半點阻礙。
然後有一次係我得到優勢後，準備回城時…
我留意到呢個女仔既鍵盤旁邊，有幾份作業放左係度未做。
而作業書既封面，當然有呢個女仔既姓名。
「哦～？」我回過頭，細聲的說道：「原來你叫卡詩娜？」
『…？』少女的視線隨著我的優勢而放鬆下來：『你…點知我英文名…』
「哈，」我冷笑了一下，拎起本書得戚的說：「功課上面有你既名嘛。」
『喂…！』少女立即把書本搶過，臉頰通紅地仇視著我：『你有冇搞錯啊？知唔知咩叫私隱架你！…信唔信我投……』
「投訴我丫嘛？」我望著她手中的電話，打斷道：「要做既話，你頭先就做左啦，係咪？」
『………』少女尷尬地沈默。
當然，我夠膽咁樣有意冒犯，自然都藏有一手。
「你頭先根本無打電話去我公司。」我冷靜的說：「我有冇講錯呢。」
『你……』少女尷尬地支支吾吾，道：『你點知…』
「因為～～」我露出狡猾的笑容：「嘿嘿，我地經理呢個時候出左去食飯囉！」
『………』
啪———
一聲清脆既聲音，從我臉上忽然傳出。
「你痴線架咩！」我掩著臉：「做咩無啦啦打人啊！」
『哼，』少女若無其事的說：『關你咩事！專心打你既機！』
「………」
雖然佢唔係好大力，甚至…我覺得佢打落黎有一種舒服既感覺。
但我內心深處話比我知，呢個女仔同佢講道理係無用，就算我點講，佢都唔會聽得入耳。
又或者有錢人都係咁任性，呢刻既我只係想喇喇聲完場離開呢個地方。
『仲有呀，』少女又一下拍落黎我肩膊：『果個字唔係讀＂卡＂，係讀＂辨＂啊！』
「辨？」
我一邊用滑鼠買裝，一邊回望佢果本作業，發覺簿上面寫住既名果然唔係＂卡＂詩娜，
而係＂卞詩娜＂。
我接著說：「乜呢個字…讀＂辨＂咩？」
『哼～』少女驕傲自滿地說：『你呢啲讀得書少既人，我唔怪你喎～而且我為免人人都唔識讀，索性改左個英名叫Cacilla，咁咪唔洗為你呢啲下人而煩惱囉～～』
呢條女…真係狗眼看人低。
「哦。」我立即敷衍地Dead Air佢。
點知…
『喂！』詩娜又用力的一下拍落黎：『你知道左我個名…你都要講返你個名比我知啊！』
「下…？」我不禁心生好奇：「點解要我講…」
我唔想講，係因為我怕佢會拎我個名去投訴我。
『公平囉！』詩娜撓著手托在鼓脹的酥胸前，目中無人的道：『你…你知道左人地個名…禮貌上你都要講返自己個名架嘛…！有無家教架你？』
「……」
嘩，呢句說話從佢口中講出，簡直難聽過粗口。
「不過…」我立即開口說道：「我點知你會唔會投訴我……」
誰知佢一句駁埋黎。
『你講唔講啊你～？！』
面對住如此強勢既少女，我尤如一個被政府欺壓既星斗市民一樣，無從反抗。
「任天衡…」我死死地氣自我介紹：「我叫任天衡……」
『任天衡…？』詩娜好奇地皺著眉：『車，你以為自己改個名好型咩？』
「咁我又無咁講……」
『啊！！』忽然間詩娜望住我身後的電腦螢幕：『你…你仲唔快啲郁～～？就輸喇…！』
「放心啦……」我稍稍移開桃紅色的電腦椅，展露另一半螢光幕：「對面已經投降。」
[Victory！]———電腦喇叭傳來一聲巨響。
「咁……」我從電腦椅上站起：「你而家滿意喇掛？」
『嗯…』詩娜見到升階後，終於展露甜美的微笑，不過一剎那後又板著臉：『車，好叻咩！？如果無你阻住哂啊…我都一樣得啦！哼！』
「咁…係咁啦，」我轉身準備離去：「打搞哂唔好意思。」
『喂…』她細細聲地說。
我假裝沒有聽見，繼續步向門口。
『喂…！咪走住啊你…！』
「……」我自滿地笑了一下，然後扮木無表情，回望道：「又點？」
『我…』詩娜逃避著我的眼神，害羞使她白皙的皮膚更顯通紅：『我話…你Game ID叫咩名…』
「想ADD我呀？」我反問。
『唔係！』詩娜立即否定：『我只係唔抵得你姐…我…我班朋友仲勁過你多多聲啊…！你以為自己好叻咩？』
「哦～？係咩？」我嘴角微微上揚。
『哼，梗係！』詩娜高傲地鄙視著我：『如果你唔驚既話～留低個ID今晚同我班朋友五打五囉～？』
「下……」我假裝害怕的說。
『嘿！做咩啊…？』詩娜忽然露出欠揍的笑容：『頭先唔係好威威架咩？而家淆底呀～？』
「好，」我冷靜沈著的說：「我今晚會Add你，我記得你ID。」
『嘻，一言為定架喇～』詩娜像小孩般指著我：『到時輸左唔好喊先好呀你～！』
「哦，拜拜。」
我推住部空既汽水車離開左佢屋企之後，內心不禁有一股莫明的興奮。
唔知點解，就好似初中時第一次同女仔約會既感覺一樣。
但面對呢種不可一世既女仔，我幾乎對佢無任何好感，甚至，有點討厭佢。
不過又難怪佢既，試問含住條金鎖匙出世，有父母既呵護備至既女仔，又點會睇得上我呢啲超市仔先得架？
我係佢眼中，基本上就好似一隻狗一樣，狗都或許會得到佢歡心，而我…可能比狗既身分更低微。
回想起來，如果唔係因為《英雄聯盟》呢隻遊戲，我諗我呢世都唔會再有自信。
因為以前香港地，無錢、無車、無樓、無學識，學咩人講溝女啊？
但而家時代已經唔同，《英雄聯盟》帶比我既除左係開心，滿足、同朋友之外…
仲有「女」，不論係上流社會，定係低下階層既女仔都會投入去呢隻遊戲入面。
我係遊戲世界爬到高處，就算現實生活中我一無所有咁又點？
憑住高超既打機技術，我爭取到既唔止係遊戲既成就，而係源源不絕，令我重新做人既「自信心」！