自殺以後，進入了RPG的世界: #雪兔

我揀左既職業係神官。
比起其他要打生打死既職業，我覺得我比較適合做後面幫手後援既神官。
最起碼其他人會主動保護我，得閒比下甜頭人，咁先符合我既生存之道。

講起神官，我地相信既神係一個女神。
嚴格黎講，呢個世界分兩大陣營。
西邊既人類聯盟，東邊既魔界。
聯盟相信住掌握住光既女神，而魔界既神係掌握住暗既軍神。

雖然話暗既力量係黎自魔界既神，但係我地聯盟既人一樣可以用暗。




除左光同暗之外，仲有四種元素，風火水土，由四條龍王管理。
每一個人除左可以揀自己既職業之外，仲要揀多一種元素既力量。
呢個世界既設定大概係咁啦。

而我揀既係光。

【初心者】 人類-愛麗斯 神官 LV3

HP:721
MP:736





力量:69  敏捷:65
防禦:56  魔力:78

「小心！上面！」白兔同我講。

吓吓吓？
上面有隻蜜蜂飛左落黎呀！好大隻呀！成個人咁大呀！
行開啦！咪過過黎呀！





「查佢既STATUS呀！」

蜜蜂幼蟲 LV8

HP:803
MP:648

力量:64  敏捷:101
防禦:34  魔力:68

「開技能呀！」白兔又大叫。

係！係！係！開……開咩呀！
我依家有咩技能？





[光束球:召喚一個會自動攻擊的光球旁身]
[聖光鎖鏈:對一個目標賦予束縛狀態]
[治療魔法:為一個目標回復HP]
[天使之環:為範圍內所有同伴小幅度回復HP，然後解除其負面狀態]
[光之壁:召喚一扇可以擋下一定傷害的盾牌]
[聖杖揮擊:揮舞聖杖，對近距離目標造成物理傷害]

「聖……聖光鎖鏈！」
我開左技能，然後地上面有幾條鎖鏈飛左出黎綁住隻蜜蜂。
得左？唔係，淨係綁住左佢，殺唔死佢架！

「聖光球」
我肩膀上出現左個光球，自動對蜜蜂發射光束。

好低攻呀！殺唔死佢呀！




每炮扣得果一百血……好低攻囉。

蜜蜂飛過黎，想用毒針吉我！
「光之壁」
擋住！
好低攻呀呀。
殺唔死呀！

「聖杖揮擊」
隻手自動咁亂揮把杖，配合光球終於殺死左隻蜜蜂。

[等級上升至LV4]

「好險呀……有乜理由要我親身上去打架。」我坐低係到叫。
「辛苦你啦。咁樣你先升得快架！」白兔掟左樽淡白色，類似寶O力既物體比我。




「但係真係好辛苦囉！差D以為自己會死。」但係我一啖都無飲。

除左升LV有新技能之外，好似仲可以用技能點數學指定既新技能。
不過，技能點數比較難攞。
憑我依家既實力，應該係無可能殺得死隻蟲。
我由頭到尾既目標得一個，殺死隻蟲報仇。

「喂！白兔你係到搞乜？吓？綁架細路女？」

突然之間，有個人騎住白馬經過。
係個女人？

【劍聖的繼承者】精靈-白雪 戰士 LV61

HP:6315




MP:6216

力量:406  敏捷:509
防禦:544  魔力:658

「咩呀！唔好講到咁過份好喎！佢無哂親人，我當佢係我個妹咁姐！」白兔對住果個女人反駁。
妹你個頭，可能我仲大過你。
「妹？笑大人個口咩！明明自己個親生家姐就係你面前！」白雪大聲咁笑。

白兔嘆左口氣，然後同我介紹:
「呢個係我家姐，係勇者黎，好似係。」

「咩好似係，直頭係囉！」