自殺以後，進入了RPG的世界: 完

我一直望住佢。
天照，果然唔係大賢者咁簡單。

「無錯！比你發現左添！其實我就係……」

我繼續睥住佢。

「其實我就係魔王！」佢笑住同我講。

我都係繼續睥住佢。




魔王你個頭，明明就係……

「你唔信，我變番個稱號比你睇囉！」
佢換左個稱號，由【大賢者】變成【魔王】。

我都係繼續睥住佢。
扮乜，如果係你既話，將自己既稱號變成【魔王】都係有可能。

因為你就係女神。





「你幾時開始發現發現架？」
佢嘟長個嘴望住我，然後無聊到係咁換稱號，【勇者】呀、【劍聖】呀等等。
咁樣唔代表佢同時係魔王，同時係勇者，只係代表佢可以隨時得到所有既稱號姐。
恐怕，大賢者呢個身份係假既。

至於我幾時發現，當然就係岩岩啦。

首先，我好似以前見過佢個樣。
究竟係幾時呢？我終於都諗番起，地下城第5層個BOSS女神像係無面紗，同天照有7分相似。





第二，頭先條友用左招技能叫[天照之光]
有咩人可以亂咁設定技能個名，恐怕就得女神一個人。
當然，將自己個名塞入技能名到，呢D咁羞恥既事，都係得佢一個人做到。

第三，之前打外星怪物既時候，佢一開技就扣左敵人150000血。
150000血根本唔合邏輯，但係如果佢係女神既話，呢件事就好正常。

第四，明明係大賢者但係無人識佢。
大賢者點睇都係D大人物，雖然依家佢睇落去係40LV既神官姐，但係佢個樣同個名無變架喎，點解會無人認得佢？

總之一切一切既疑點，都顯示緊天照就係女神。
佢就係女神，呢個世界唔怪得咁ON9。
不概係垃圾GAME，連個神都垃圾過人。
當然啦，呢一切我都無講出黎，講出黎實在太麻煩。





「哈，不概係你，咁快就睇穿左我既身份。無錯，我就係女神，不過如果話係女神既話，你應該唔係幾明係咩黎。不如用番你個世界既術語啦，我就係呢個世界既遊戲管理員，姐係GM(GAME MASTER)。」

……
GM……GM都可以做神。
GM無啦啦跟住我做乜？

「無呀，只係無聊無野做囉！」
「可以咁架咩？」仲有你可以讀我心架咩？犯規呀……！
「點解唔得，有一個GM日日都偷懶添。」
唔怪得隻GAME咁垃圾。
「你既意思係，神唔止得一個？」
「係呀，有三個。」

「等等……你話……你話用番我個世界既術語？你知道我既世界？」
「梗係啦！我係無所不能既天神大人，哈哈哈！」




「點解我會出現係呢到？」
無錯？我上一世既記憶就係跳樓之前既果一剎那，根住我就黎到呢到。

究竟，發生左咩事？

「你，真係想知？」
佢笑笑口問。

「無錯。我想知。」

佢深呼吸，然後就講左句:

「鬼知。」

(#^!(@^#(&^!&@




頂你咩，神喎！算啦，本來就唔指望佢知道D咩。

「大概應該係BUG掛。」佢又笑住講。
BUG?
「你應該都知啦，我地呢個世界比黑客攻擊。」
唔知囉好唔好？我依家先知囉！我淨係知無啦啦有外星人囉！外星人=外掛=HACKER……
「大概係佢地攻擊既時候，開多左個入口，令到你地入左黎掛。」
好隨便，仲以為係叫我地黎拯救呢個世界。等等……「你地」？姐係話，唔知得我一個黎左呢到？
「係呀，計埋你，一共有十個人入左黎。仲有世界洗鬼你救，一早比我地搞惦哂啦！」
十個人？
「無錯，就係果日呀，呢你係咪叫咩……係啦係啦……放榜呀，你跳樓果日！果日你果班有十個人番學，然後你地十個咪比人掟哂入黎囉，好似係。」
好隨便……咁佢地係邊個？
「你自己搵啦。比起呢樣，依家既你，究竟有咩想做？」

有咩想做？




外星人唔洗我打，根本就無野好做。
係喎，黎到呢個世界之後，我根本就無哂生存既目的。
一開始只係求生，但係依家既我根本就唔洗為生存而煩惱。
我有咩想做？
無。
上一世我或者有好多野要做，但係呢一刻既我，終於都可以無束縛咁企係到，聽下呢個所謂既神9UP。
自由？
我笑左，咁樣咪仲好，雖然無野做無哂人生目標，但係無野做都有無野做既我。

無錯啦，或者，呢到就係我真正既歸宿。
是咁的，自殺以後，進入了RPG既世界就此完結。
跟住，我終於可以自由自在咁生活。

咪住咪住……咪住呀，仲未完得！
等等先！
果個人係？
遠處有個人瞓左係到。
好面善。
呀，係白雪。
一開始果個差D做到勇者既人。
第三次見到佢啦，同佢真係有緣。

佢係比人打到重傷？
我聞到魔法既味道。
生命連動，過番D HP比佢先。
唔單止係魔法，仲有戰爭既味道。
無錯，呢到係邊境。

睇黎，魔界既人，終於正式出兵攻打人類。