自殺以後，進入了RPG的世界: β. NPC

廣華醫院。
好辛苦先係白雪手上逃走出黎。
然後我地就入左間醫院到。

令人驚訝既係，醫院入面居然仲有醫生同護士，不過無病人。
醫院依舊正常運作緊。

據風龍王所講，呢班醫生同護士係NPC。
Non-Player Characters。
非玩家角色。




就係打機入面果D村民A、村民B。
係無靈魂既生命體，只係一堆PROGRAMME堆砌而成。
只會機械式重覆工作。

我同風龍王就接受緊呢班NPC既治療。

感覺好奇怪。
呢班NPC實在係令人唔舒服。
明明望落去同普通既人類無分別，但永遠只會重覆差唔多既工作。
醫生就負責醫人，護士就負責照顧病人。




但係佢地唔會覺得香港無人好奇怪。
唔會覺得無病人好奇怪。
比人一種AI既感覺。

另一樣奇怪既事情係，既然虛構到一班醫生同護士做NPC。
點解唔整埋病人呢？
再延伸黎睇，點解唔整到成個香港都係NPC？
既然有NPC既存在，點解香港都係一個人都無』

然後，又有一個問題。




子彈蟻係唔係NPC？
如果係既話，咁佢地遵從咩規則黎行動？
點解要追殺我地？
佢地既武器就好似係專門特化黎對付D人類以外既生物。
RPG世界入面既魔物。
對付人類，絕對唔需要麻痺毒既武器。
創造佢地既人係邊個？
唔係話呢個世界無神架咩？

蜘蛛同女神要我黎呢到究竟係為左乜？
似乎唔係想比我見Alice咁簡單。

唔明既事又係一車車。
算啦，諗緊都唔明。





我既傷勢唔係好重。
我既肉體都好強壯，麻痺毒素對我構唔成威脅，好快就好返。
不過風龍王傷勢都好重下。
白雪真係好勁。

百無聊賴之際，我係醫院入面四圍行下。

我淨係見到一大班無所事事既NPC。
真係一個人都無。

行下行下，我行到入去深切治療部到。
無人阻止我，畢竟係NPC啊。
不過都唔會有病人係入面架啦……
有。
有病人。





一個細路女訓左係到。
昏迷左？
我明明無見過呢個細路女。
但係佢比我一種好特殊既感覺。
呢個細路女我曾經見過？
無可能。
但係佢既氣息，有一種似曾相識既感覺。

「如果殺左佢既話，會點？」
背後有把聲音。
係咩人？

女人。
嚴格黎講，並唔係人。




一身RPG風格既衣服。
人類既上半身，無腳。
下半身係——

蜘蛛。

蜘蛛女王。

並唔係身為禁忌存在既果一隻蜘蛛。
並唔係三師姐，唔係阿撒托斯，唔係神明既果一隻蜘蛛。
而係惡魔族魔王，蜘蛛女王‧阿南西。

「好耐無見啦，不死族既魔王。」
佢露出奸笑。





然後，身後一大班子彈蟲全副武裝行左入黎。