自殺以後，進入了RPG的世界: ☁暗殺者

「你確定無錯，風龍王每日都會經過呢到？」我問。
「係，無錯。」
「啊，黎啦。」

我同溫蒂妮匿係一個六、七米高岩石既草叢上面。
望住體型巨大既怪物係密林入面走動。
十五、六米既身長。
純白又夾雜幾片淺綠色既羽毛。
毫無疑問，係風龍王。





呢到係風龍王每日必經之地。

確認左佢既路徑，但係仲未有殺死佢既方法。
溫蒂妮既劍係可以傷到風龍王。
老實講我唔係幾相信，不過溫蒂妮實牙實齒講到，我就唯有信下佢。

但咁樣係未夠。
以風龍王既力量，大概我地未行到去，就已經比佢殺死。
所以，一定要靠偷襲，先可能殺到風龍王。





所謂既偷襲，講既係一擊弊命。
必須要係趁對方仲未察覺到既情況下暗殺對方。
如果第一擊失敗，成功率就會下跌80%。

即使係咁，都必須要準備第二手既準備。
第二步既殺著。
若果第一擊失敗，無論如何都要即刻補上第二擊。
即使得返20%既可能性，甚至跌到得1%既可能都要繼續。

失敗既話……




無失敗可言。

反正已經無野可以失去。
依家我就要豁出性命殺死風龍王。

即使偉大到同神一樣既存在。
即使係司掌暴風既龍王。
我都要殺死佢。

呢個係人類最後既吶喊。

正因為咁，更加唔可以貿然行事。
一定要準備好第二把刀，先至可以行動。

之但係，究竟有咩方法先可以殺死風龍王？




要殺死風龍王，就需要高級龍種骨骼牙齒所製成既武器，普通既龍種都唔得。
除左溫蒂妮既劍之外，睇怕都好難搵到第二把相同既武器。

初步計劃就係，我係岩石上面埋伏，拎住溫蒂妮既劍等風龍王一出現，一接近岩石，
我就跳出去用劍插死佢。
岩石既高度同風龍王身高差唔多。
所以我就可以直接用劍刺入風龍王既腦到。
直接殺死佢。

好簡單既計劃。
正因為簡單先至有勝算。

但係我地無PLAN B。
無PLAN B就麻煩得多。
唔係無PLAN B，而係根本搵唔到PLAN B既可能性。




我地無第二種手段去擊殺風龍王。

「嘔……」

「你無事嗎？」溫蒂妮問我。

風龍王已經遠去。
溫蒂妮扶住我。

「無，我有少少想作嘔姐。」
身體有D唔係幾舒服。
有種不思議既煩悶感。
仲有少少頭痛。

身體好差。




無辦法。
我都唔知自己依家點。
可能已經離死期不遠。

所以，計劃要盡快實行。

以弱勝強。
殺死龍王。
殺死身為自然現象既神明。
殺死暴風之王。

憑咩人類做唔到。
我依家就做比你睇。
黎啦，邊個話人類，注定無可能贏到龍王？