自殺以後，進入了RPG的世界: ☁最後的人類

我仲未死。
張開眼睛既時候，變左做普通既一個朝早。
第一個感想係，我仲未死。
第二個感想係，今日天氣幾好。
第三個感想係，我地成條村滅亡左，淨返我一個人。

我昏迷左幾耐？
我拍一拍身上既灰塵、落葉。
手上得返把長弓，五枝箭，仲有一把普通既石刀匕首。





身上傷口，唔痛？
好似無哂傷口咁。
身體無事，就只係昏迷左。
究竟發生左咩事？
我記憶入面，就只係風龍王黎過。
屠村。
仲話要滅絕人類。

我深深咁吸多一口新鮮空氣。
再一次認知我仲未死呢一個事實。





「你終於醒拿？」
我轉身一望。
銀白色既長髮。
係一個女仔？

「你係？」我問。

「溫蒂妮。」
「我叫希爾芙。」





佢身上有一把好長既……武器？
似乎唔知係用咩魔物既骨骼或者牙齒整。

「做咩望住我？」佢問。
「無，好少見人有銀色頭髮。」
「你個耳朵咁尖，咪仲更加罕有。」
「你身後果把係？」
「哦，呢把係劍。」
「劍？未聽過既武器，你由邊到黎架？我好似未見過你。」
「邊到黎已經唔重要。風龍王依家發癲四圍襲擊人類，據我所知，人類大多數既部落都已經消失左，你同我可能係僅存既最後人類。」
「……」
「又唔洗咁沉重。與其話我把劍特別，不如話你背後面果樣野仲特別。」
「哦，呢把係弓，可以遠距離攻擊，不過我依家淨係可以用多五次，得返五枝箭。」
「你無事吖嗎？」





我行開兩步，然後即場嘔左出黎。
頭好暈。
呃……
好辛苦。
個口好酸。

「無事。」
我又企直返個人。

「……無事就好。」
「嗯。」

「你之後有咩打算？」
溫蒂妮問我。




「我都唔知。」
「諗住報仇，定係點？」
「報咩仇？無可能，根本就無可能殺得到風龍王，算啦，放棄啦。」

唔好講風龍王。
就連線峽蝶我地傷唔到佢。
連龍牙匕首都無埋。
根本就完全傷唔到線峽蝶半分。

依個時候再一次感覺到人類既弱小。
一直以黎，即使我地挑戰到上位既魔物。
所依靠既，並唔係自身既力量。
而係龍牙匕首。
失去左龍牙匕首，失去左其他魔物既幫助。
人類就一事無成。




無錯，人類只係種弱小既生物。
同其他魔物無分別。
就只不過係一種弱小既魔物。

事到如今，因為得罪左風龍王……
唔係，明明咩都無做過，就惹黎左線峽蝶。
佢帶住玩玩下既心態，就令到人類絕種。
依家得返我同溫蒂妮。
世界上最後既兩個人類。
兩個女人。
人類，呢一刻已經可以宣告滅亡。

玩完啦。
玩完啦。
一切都已經玩完啦。




人類，呢一種垃圾既魔物。
終於適應唔到環境，係弱肉強食之下——
絕種。