自殺以後，進入了RPG的世界: 靈魂

果個叫瑪麗·雪萊既女人帶左我地入屋。
係一間大宅黎，豪華既程度完全唔會輸比約翰既果一間別墅。
我地行左入去一條好長既走廊到。
有一種空虛而又有少少恐怖既感覺。
大家都無出聲，只係默默咁跟住瑪麗。
瑪麗應該唔會襲擊我地掛，襲擊我地都唔會有咩好處啦。
即使係咁，我都做好哂迎擊準備。
以佢既實力……

「你地知道復活既方法？」




瑪麗突間開口，打破左寂靜。
復活？係咩野意思？

瑪麗停左落黎，轉個身黎望住我地：
「令到死者復活既方法。」

又係一片沉默。
瑪麗又繼續帶我地向前行。

「你講既野係禁忌黎喎，令到死者復活。」




呢個時候，王又張開口講。
瑪麗無回答佢，帶到我地入去一個大廳。
叫左Ｄ下人遞上紅茶，然後坐係張大椅到又問多次：
「你知道呢一種方法？」

呢個時候，又有一個人行左過黎。
係一個龍人族既男人，三十幾LV左右，略肥。
「你仲係到做緊呢D蠢事？」佢問瑪麗。
瑪麗有少少唔耐煩，無再回答佢。





「收手啦，有咩意義？」
「……」
「明明已經成功左啦，而且由你……」
「未成功。失敗左。失敗左。失敗左。」
「醒下啦！成功左……」
「失敗左呀！復活唔到啊！整到出黎既，只係一個同名、同性格、同肉體既人咋！」
「咁咪姐係成功左囉！」
「失敗啊，靈魂唔一樣。」
「明明性格、肉體，所有野都同生前一樣，咁同成功復活有咩分別？」
「我知呀！我明呀！但係佢……佢唔係咁諗啊！」
「你……」
「收聲啊！收聲啊！你同我收聲啊！我係領主夫人，你只係食客，你同我返去，唔好打擾我地，唔該。」

瑪麗拭乾淚水，露出笑容，邀請龍人離開。
龍人淨係搖左兩下頭，然後企左係到，無跟瑪麗既意思離開。




領主夫人……姐係話佢先生就係不死族既領主？
瑪麗要復活既人係……？

「嗯？大概GET到你地想講咩？不過佢又講得無錯既，明明已經構成到相同既肉體，連內在性格都係一樣，咁唔算係成功咩？」王問。
瑪麗搖一搖頭，無再講野。
卡珊德拉插嘴：
「不過，當兩個人外在內在都完全一模一樣，咁又算唔算係同一個人呢？」

「唔算，永遠、永遠都唔會係同一個人，所以我先想問你地，有無真真正正既復活方法？」瑪麗問。
「算把啦，如果真係有咁完美既復活方法，蜘蛛一早就復活左啦。」龍人講。
「蜘蛛係禁忌黎，你係呢到講就好，千奇唔四圍講蜘蛛呢兩隻字。」瑪麗回答。
「超！你講既復活，咪又係禁忌。」

「無錯，復活方法係有既。」王突然間好認真咁講野。
平時好似完全未見過佢認真。





「之所以復活係禁忌，係因為犧牲既野實在係太多。我唔建議你地進行復活既儀式。」王繼續講。
「唔緊要，犧牲一切，我都要復活！」

「我都要復活……我都要……『我』……明明就已經成功左，都已經復活左啦。」龍人自言自語。

王嘆息，然後開始講：
「放棄啦，代價唔係話你承擔就可以承擔，復活生命係破壞緊成個世界既系統，所消耗既能量唔係由你可以承擔得起。

「一個世界既靈魂總數量係固定不變，死左既人自然會投胎轉世，如果係咁簡單既情況，復活都唔係一件難事，只要殺死左投左胎既果個人，再回收返佢靈魂，之後將靈魂注入去你地構成好既果個肉體身上面咁就得，雖然咁樣對你黎講已經係件難事。

「不過，復活自然唔係咁簡單架啦。首先，為左解決生育太多或者出生率太少既問題，靈魂既投胎轉世係超越時空，依家既你死左，但係你既靈魂極有可能會去到一百年前既世界轉生。無穿越時間方法既人，又點可以將靈魂帶返黎一百年後既世界？

「另外，成個世界似乎係一個生命體黎。呢個宇宙有萬萬千千個唔同世界，唔同既世界物理法則可以唔同，有Ｄ世界同呢個世界係完全唔同，唔會有STATUS，唔會有系統，唔會去打怪……離題啦，唔同既世界都係生命體黎，佢地之間係會用靈魂黎交易，所以你死左之後，亦都有可能轉生去到第二個完全唔同既世界到。試問，你又點可以穿越去第二個世界，去拎返個靈魂返黎呢？





「簡單黎講，三個字：收收皮先。」

瑪麗同卡珊德拉一時之間比唔到反應。
龍人就問王究竟係咩人？
而我就係到諗，呢個就係我轉生既原因？