自殺以後，進入了RPG的世界: 聯盟之王

黎到左一個城市入面。
我地收到既任務係護衛聯盟之王。
秘密任務？好似係。
我同約翰、大徒弟卡珊德拉、三徒弟，四個人坐係架馬車入面。
馬車非常之長，分左三個部份。
一個係司機位，中間既係王既房間，最後既部份係我地既座位。
王既房間，無人可以入到去。
即使交低左護衛任務，我地都係見唔到王既樣。

王究竟係一個咩人？




聽起黎係一把女仔聲。
神秘既王，好似連身為大賢者既約翰，都未曾見過佢個樣。

「你問我依家去邊？我咪係放緊個靚假，要你地黎保護我囉。」王係咁樣講。

大約係呢一種既感覺啦。
王好似係一個好隨便，咩都好HEA既人。
無啦啦放假，感覺上好奇怪。
不過我地做細既，唔問得咁多架啦。





但係，要出動到大賢者黎護衛，王究竟驚緊D咩？
好似話平時係由劍聖親自去護衛既，而依家劍聖趕左去前線打仗，無人黎保護王。
但係出動到大賢者同埋大賢者既好朋友們，總比人感覺到唔係一件小事。
一定會有重大既事情發生。
係蜘蛛教？抑或係另一樣野呢？

去到晚黑，王入左去間酒店上面。
話就話係成棟樓，不過都係一棟三層高既……類似村屋既物體。
我地順理成章咁係王既房間隔離到休息。
好似話，其他既住客都係王既親衛兵。




王究竟係到釣緊邊個？

我同卡珊德拉企左上棟樓既天台，俯視巡邏。
王無告之我地敵人究竟係邊個。
我地就只可以一直按兵不動。
敵人究竟係蜘蛛教？係魔王？
無人知。

「對唔住……果陣我走左。」卡珊德拉同我講野。
我無回答佢，扮講唔到野，我無同任何人講過我識得講人話。
「係我害死左佢……」佢好DOWN咁講野，但係無再流淚。
應該要喊既，都喊哂，唔會再喊。
都好既，我唔識安慰人，就咁聽下佢講野就算。

蜘蛛教。




究竟係何方神聖？
同大蜘蛛打完之後，我嘗試去搵過下資料。
呢個世界只係得兩大宗教。
聯盟信奉女神。
魔界信奉軍神。
而蜘蛛教，就係突然興起既宗教，認為當年同女神決戰既蜘蛛會係拯救世界既神，打破一切既不公。
蜘蛛，就係講緊地下城第8層既石像，阿撒托斯？連魔物都唔敢接近既蜘蛛。


「我要殺哂蜘蛛教既人。」卡珊德拉講。
黑化？唉，其實我又無咩所謂既。
二師姐死左，對我黎講真係無咩感覺。
反正都唔係太關我事。
浮士德都死左啦，所以求其啦。





不過，望住卡珊德拉個樣，我覺得佢好可憐。
於是乎，我用鉗，當係手一樣，輕輕咁摸佢個頭。
佢嚇左一一跳，然後望住我係到笑。

唔？樓下有人……
係軍隊？
打仗咩？
好多人……
成幾百人……上千人衝緊過黎，由遠處既山上，一路一路衝過黎座城市到。

WTF？
我本身以為係暗殺……但依家咁樣同打仗又有咩分別？
係魔界？係魔王？

「唔係，係……聯盟既士兵。」





睇黎絕對唔係黎吹水打下牙鉸。
好明顯係過黎劈友。

約翰唔知幾時候飄左上天，然後開哂魔法，大聲講：

「吾乃聯盟大賢者！你地係咩人，報上名來！唔係既話，我地就會視你地係敵人而迎擊！」

「我地係直屬王既軍情六處部隊！奉王之名黎捉拿逆賊！」軍隊入面有人大叫。

「放肆！呢到無逆賊！」

無回答。
好明顯，呢班人係為左殺王而黎。





「食住花生等睇戲。」我地後面突然間多左條友。
我轉頭一望，王將成個帷幕好大工程咁搬左上天台，然後自己係入面飲茶。