自殺以後，進入了RPG的世界: 綁架

唔……第一個感想係……
蜘蛛同女神不如去結婚啦。
感覺上一樣都係煩膠。
仲要係好撚煩既果一隻煩膠。

果班黑衣人大叫完「教義」之後，成場DEAD哂AIR。
因為真係唔知比咩反應佢地好。
成場氣氛好懢尬。

然後，浮士德，似乎係班黑衣人既首領，行過黎同我講：




「我黎接你啦，蜘蛛大人。」

搞錯左。
我唔係蜘蛛。
更加唔係你地口中果一位蜘蛛大人……自稱好靚女既蜘蛛大人，呢Ｄ事點講得出口。
真係羞恥到一個點，究竟恥力要幾高先會寫落去教義到，比班信徒日夜歌頌？

我搖一搖頭。

頭先果個村民仲未死，受左重傷訓左係地，佢個怕醜女係到照顧緊佢。




「你地對呢條村出手，唔驚大賢者大人會對付你地咩？」村民大叫。

浮士德望一望果個人，然後問：
「大賢者大人叫咩名？」

「約翰‧提托，歷代最強既大賢者。」

浮士德聽完之後放聲大笑，然後講多句：
「歷代最強？如果佢叫天照我就驚啦。」





天照？點解魔王個名會出現係呢到？

「大賢者大人會殺左你！」村民繼續咆哮。

浮士德臉色不悅，行埋去，掹起佢頭髮，扯起佢成個身上黎。
「食屎啦你！哈哈哈哈！」
佢捉住村民個頭，用力猛敲棟牆。

「停……停手……」怕醜妹行埋去，捉住浮士德隻手。

浮士德望住怕醜妹，有少少驚愕，然後開始淫笑。
「想我停手都得，但係你要……」
係極度邪惡既笑容，笑到好猥瑣。
怕醜妹吞左啖口水，驚驚地，開始退後。





「你要……」
「唔好呀！」

「你要大叫蜘蛛大人好靚女十次。」

誒？
氣氛又再一次比佢破壞哂。
又真係唔知比咩反應佢好。

「蜘蛛大人好靚女……」ｘ１０
怕醜妹好唔情願咁講。

「GODDNESS！無錯！蜘蛛大人，真係好靚女啊！！！」浮士德又開始發癲。
「好啦，咁我放過佢啦。」
浮士德好有禮貌咁放返村民係地上面。





呢一刻，我真係唔知道應該做一個怎樣的表情。
有種是但啦、求其啦既感覺。

「好啦，親愛既蜘蛛大人，我地係時候要行啦。」

我搖一搖頭，睇黎要同佢地打。
係呢個時候，我比佢地麻包袋，綁架走左。
唔夠打。
順理成章咁比佢地捉左走。

仲話，要帶多個人質，帶埋怕醜妹一齊上路。
捉左我出去，塞左我去一個馬車上面。
睇唔到野，我係麻包袋入面，比佢地綁住，郁都郁唔到，咩都睇唔到。





話說，你地又話我係蜘蛛，但係又咁對我？
你地會咁樣對待你地最尊敬既蜘蛛大人咩？