自殺以後，進入了RPG的世界: 魔女的徒弟

離開左王宮，同約翰、弟子三人組黎到一座別墅到。
別墅位於一條好偏僻既鄉村附近既一座山上面。
要穿過一片森林先可以上到山，而別墅正位於座山上面。

約翰休假緊。
大概就係咁既感覺。
呢到應該就係約翰本身既屋企。

一座三層樓高既巨大獨立屋。
一樓係客廳、雜物房、飯廳、廚房等。




二樓全層都係客房。
三樓唔比入去，好似係約翰私人既空間黎。
好似仲有個地下城圖書館咁樣。
之後，又有個好大既花園，就係一座普通既別墅。

只不過，咁大間別墅就似乎只係得我地四個人一隻蟲打理。
約翰一返到黎就去返上房休息。
似乎佢勞動左好耐，需要去休息一下。

別墅比人一種荒廢左好耐既感覺。




應該都好耐無人黎過打理。
好多塵。

明明係大賢者，但係又唔比徒弟亂咁用魔法。
好似話唔想我地凡事都依賴魔法，要憑自己雙手去做野。
睇黎執屋都有排執。
然後開始分工啦，兩個徒弟留係別墅到執屋。
我同大徒弟落山去採購。

作為魔物既我，真係唔會嚇親人？




不過既然村民都知道山上面別墅既主人係大賢者，咁有隻蟲落黎做阿四都唔係咩出奇既事。

大徒弟係個女仔。
佢似乎比約翰大少少，應該都係大佢兩、三歲到。
係一個婷婷玉立既少女。
金色頭髮，無咩特別咁。

【大賢者的徒弟】人類-卡珊德拉 法師 LV87

HP:5464/5464
MP:10164/10164

力量:549  敏捷:875
防禦:597  魔力:1018





佢無開口同我講野。
大概係覺得我係一隻蟲，唔會聽得明自己講乜。
不過，係三個徒弟入面，佢對我既態度已經係最好既。
弟子二號正情覺得要殺死我先岩，弟子三號完全無視我。
雖然卡珊德拉佢本人唔會同我講野，但係佢會當我係寵物看待。

一D都唔好，OK？
我係人呀，唔係真係一隻蟲。
算啦，無所謂了。

黎到條村，村民用奇怪既目光望住我。
但係佢地唔會覺得驚，都算係咁。

卡珊德拉帶我去到一個市場到，然後隨便咁買左D食物、日用品咁。





「咦？呢隻魔物？」村民問佢。
「係四師妹，最近收既徒弟。」卡珊德拉笑住回答。

卡珊德拉將D貨物放係我背上面，然後摸下我個頭。
「行啦。」佢講。

「哇，好得意呀！」
「係魔物？」
「唔會咬人架咩？」
「魔女大人話呢條村落左結界，魔物唔會走到入黎架，所以佢一定係安全！」
「姐姐！姐姐！呢隻蟲係咩黎架？」

一大班細路見到我地，就即刻圍住我地。
卡珊德拉輕輕一笑，細心解答佢地既問題。
而我就淪為玩具，慘遭細路們上下其手。





可以話係有生以黎，第一次同人咁近距離接觸。
係開心既。

「我地做緊野呀，下次再搵你地玩呀！」卡珊德拉笑住咁同班細路道別。
係幾有愛心既，呢個女仔。
其實呢個女仔，或者係一個好人都未定。
最起碼好過其他人先。

「跟住落黎要買既係……你仲有無野想買？」卡珊德拉問我。
答唔到佢。
我只可以搖頭。
「係呀……咁就返去囉。」

然之後，我地就返返去別墅到。