自殺以後，進入了RPG的世界: @勇者與魔王

世界末日一樣既情景。
成個天空係紅色。
大概係火花照亮左天空。
但係，更加可怕既野係地上面。
滿地都係爛肉。
怪物？
惡魔？
究竟係咩野黎？
不明既亂碼觸手充斥係大地上面。





教皇行左上前，望住D觸手。

教皇:「未見過既野。干涉唔到。」

教皇好少有咁表露出嚴肅既神情。

「教皇大人……究竟係……咩回事？」宰相好驚咁望住教皇。

「奧丁，你點睇？」教皇無視宰相。





教皇帶黎既果個黑色盔甲男人，應該就係奧丁，佢猶豫左一下，然後講:
「唔屬於呢個世界既……物體。」

宙斯:「黑騎士，然後出現既就係呢團爛肉？」
教皇:「黑騎士同呢團爛肉有關係？」
宙斯:「唔止係咁。仲有【魔王】，【魔王】既出現未免有D突然，似乎唔係呢個世界自然生成……係人為既。有人設定【魔王】呢出現。」
教皇:「你既意思係，我地之間有內鬼？你係懷疑緊我定係奧丁呀。」
宙斯:「唔係咁既意思……」
教皇:「除左我地三個之外，乜仲有人有管理員權限咩？」





「有。」

突然之間，空氣之中出現左一把聲音。

毛管棟。
打哂冷震。

唔知點解，我覺得聲音係由係呢團爛肉發出黎既。
無錯，係果團爛肉。

「如果話你地係神，咁樣我就係魔神。我係黎自第二度既，或者稱我為外神就得。」

奧丁無理佢，拎住把槍衝左上去。
一槍斬斷左舊爛肉。
然而，基本上係無用。




爛肉係會再生。

「永恆之槍」

奧丁跳左起身，一跳就係幾百米高，然後一槍投擲落黎。
好似核彈咁爆開。
想炸埋我地？
我無受傷。
我地所有人都無受傷？
發生咩事，明明咁強大既威力，但係傷唔到我地一點HP。

爛肉比佢轟成碎片。
一擊就打就佢變哂肉醬。

但係，爛肉開始再生。





「無用，佢睇黎真係有權限。只要有權限，係呢個世界就無可能殺得死佢。」教皇講。

「……明白啦。殺死左魔王先。」宙斯講。

「咩意思？」教皇問。

「我覺得魔王肯定同呢隻外神有關。所以就殺左魔王啦。」宙斯講。

「吓？吓？吓？你無病呀？依個時候仲理乜鬼魔王。搞惦左呢隻外神先啦。」教皇鬧番佢轉頭。

「唔係我去，勇者。交比果位勇者啦。」

勇者？
我？





「吓？你覺得呢個人真係打低贏魔王？STATUS差太遠啦。」教皇嘆左啖氣。

「放心啦。我設定好左勇者對魔王有戰鬥加成。所以，佢唔會輸比魔王。」

我有種不詳既預感。

宙斯:「而且，魔王已經變左系統既一部份，如果依個時候DELETE，我驚會出現BUG。所以，不如完善左魔王系統佢。勇者注定要打低魔王，魔王必須要死係勇者之手，作為第一任既魔王同勇者，唔可以有例外，所以……」

「空間魔法。」