《唔係啩！我間房幅牆有個窿》: Chapter 24
一覺醒來，看到死妹釘留給我的字條，上面只有簡簡單單三個字。
「多謝你」
我搖了搖頭，若果不是我，她也不會引狼入室吧，我應該要跟她道歉才對。
這時候電話響起來，是Carmen找我。
「喂你起身未呀? 我整咗早餐呀，過嚟一齊食吖。」Carmen甜甜的聲音讓我聽著很受用，煩惱瞬間消了一半。
我精神奕奕道﹕「有靚女煮早餐比我食咁正? 我牙都唔刷即刻過嚟！」
她笑駡﹕「刷完牙洗完面先好過嚟呀，唔係唔比你入門口㗎！」
「Yes！Madam！」
「喂你捉住人哋隻手我點食早餐呀? 」Carmen面紅紅的嬌嗔。
我打趣道﹕「哦? 乜你係用左手嘅咩? 咁我拖你右手囉。」然後我就放開她的左手，轉為捉住她的右手。
她嗔道﹕「喂呀！」
「哈哈哈......」
打情駡俏後，我終於肯專心吃早餐。吃著早餐時，我想起昨晚的事，或者可以問一下Carmen的意見﹕「阿靜，問你一樣嘢吖。」
「嗯? 咩呀? 」
「如果你識得有對couple朋友，佢哋感情好好嘅，個男嘅好錫個女嘅，但你發現個男仔原來以前係個專呃女仔嘅衰人，咁你會點呀? 」
「嗯? 你個friend呀? 」
我點頭道﹕「係呀，我同個男仔好friend㗎。」可不能說那個女的才是好朋友，不然她一定會聯想到水靈身上去。
Carmen側頭想了想，道﹕「嗯......我會搵個男仔傾吓囉，如果佢真係改過自新，而家又對個女仔好好，咁無理由唔比個機會佢嘅。」
「但係佢以前係一個賤人喎。你唔驚佢變返以前咁咩? 」
「都驚㗎，但邊一個無過去吖，而且你又話佢而家好錫個女仔，可能佢真係改過呢，咁當然你要識得分佢有無講大話啦。」
嗯......這樣的話，我應該找Ron談談嗎?
今天是星期日，上午Carmen要去進修，所以吃完早餐她就出門了，到了下午才能到安老院探望楊伯母。而我則待到做義工的時間，才出發到安老院。
今天會見到水靈吧，要透過她約Ron出來單獨談談嗎? 但怎樣才能令他說出真話?
「喂！諗緊咩呀? 個樣呆哂咁嘅? 」水靈拍一拍我的肩膊。
「吓? ......哦...嗯......其實呢......」要問她有關Ron的事嗎?
水靈沒等我說完，就不懷好意的笑道﹕「係咪追唔掂阿靜呀? 上次比你送佢返屋企都比哂位你入啦！咁都搞唔掂? 駛唔駛我再幫下你呀? 」
我自信滿滿道﹕「唓！我會搞唔掂? 我哋一齊咗啦！」
她顯得很驚訝﹕「真係? 估唔到你真係追到佢喎......喂等等先，你係咪吹水㗎? 我唔信囉。」然後就露出一臉懷疑的表情。
「你一陣咪見到佢囉，唔信嘅話你自己問吓佢喇。」
水靈還是以難以置信的表情瞪著我，就像我做了甚麼奇蹟出來似的。
趁Carmen還沒有來，我決定還是問一問她和Ron的事情，於是我不經意的問﹕「係呢，你同阿Ron點呀? 」
「嗯? 做咩咁問? 」
我有點心虛﹕「無......關心吓你哋啫......」
水靈訕笑道﹕「突然間咁關心我哋? 做咩呀? 你唔係愛上我呀? 我有未婚夫㗎啦！」
我白了她一眼﹕「我係關心阿Ron，唔係關心你囉，我愛上嘅係你老公呀！」
她笑得花枝亂墜﹕「哈哈哈，估唔到你係hehe喎......」笑過之後她又道﹕「我哋幾好吖，不過開始搞結婚啲嘢有啲煩啫。」
看她還是很幸福甜密的樣子，看來她也不知道她未婚夫的真面目，既然如此，我唯有直接找Ron出來攤牌好了。我絕不能讓水靈不明不白就嫁給這個人。
「喂我有啲事想搵阿Ron，你知唔知佢幾時得閒呀? 」
水靈瞪大眼睛看著我﹕「你唔係真係基呀嘛? 」
我沒好氣﹕「基你個死人頭！我想問佢有關買保險嘅嘢呀。」話說Ron是保險經紀，所以我用這個藉口絕對不會令水靈懷疑。
「你比生意佢做呀? 真係多謝你先。其實我都唔知佢幾時得閒，我比個電話你自己問佢啦。」然後她很爽快的將Ron的電話號碼給了我。
一會後，Carmen來到，我馬上宣示主權般牽著她的手在水靈面前出現，水靈目定口呆的嚷道﹕「阿靜你真係同呢條友一齊呀? 」
我瞪著她﹕「喂咩呢條友嗰條友呀? My name is Raymond！」
水靈道﹕「我覺得『呢條友』呢個名襯你多啲囉。」她轉頭向Carmen打趣道﹕「阿靜你係咪比佢落咗降頭呀? You deserve better！」
Carmen微笑道﹕「唔係吖，佢好好呀。」
我自大臭屁起來﹕「聽到未呀? 」
水靈不屑道﹕「哼！懶叻。」然後她挽著Carmen的手臂向我道﹕「我哋兩個約好咗一陣去行街食飯，無你份喎。」
我聞言望向Carmen，她歉意道﹕「Sorry呀，我唔記得同你講今晚約咗靈姐姐呀......」
我指著自己﹕「我唔可以一齊去㗎? 」
水靈道﹕「nonono, girls only. 我哋去睇女人嘢呀。」
我「唓」一聲，叮囑水靈道﹕「你唔好帶佢去飲酒呀。」
「知啦知啦。」
當然剛開始跟Carmen拍拖是很想整天都黏在一起，不過她也有自己的社交圈子，我也不會令她「有異性，無人性」，而且我也有自己的朋友，所以義工活動完結後，我跟她們分別過後就找來阿樂他們來我家打牌吃飯，一直到晚上十時，他們才盡興回家。Carmen十時多回來，我們聊了一會兒，她就回家休息了。
我洗完澡後正想關燈睡覺，風鈴卻響了起來。
「大叔大叔，你喺唔喺度呀? 」
雖然我有點睏，而且明天還要上班，但經過昨晚的事，好歹也要陪她聊一陣子吧。
「喺度呀，點呀你? 」
「嗯......無乜點呀......其實我諗清楚啦，好彩而家一早知道個衰人真面目咋，如果真係同佢一齊咗就死喇。」
唉......怎麼辦，我這邊的水靈快要跟這個衰人結婚呢......我應該告訴她這件事嗎?
「嗯? 做咩唔出聲嘅? 」
我連忙道﹕「無...無......諗緊啲嘢啫......」還是不要告訴她好了，免得令事情變得更複雜。
「係......係呢......你...你同阿靜點呀? 」
我也不打算跟她說我跟Carmen已經開始了，我怕刺激到她的神經﹕「無咩點呀，都係咁上下囉。」
「係呀......」她轉了轉話題﹕「係呢，你讀邊間中學㗎? 」
「我間中學同你讀嗰間好近㗎咋，喺你學校門口行前兩條街轉左過咗個巴士總站......」
「啊我知啦！係咪白色恤衫白色西褲嗰間男女校呀? 」
「咪就係呢間囉。」
「我成日食lunch都會見到你間學校啲學生，可能我同『你』見過面都唔定喎。」
「哈，可能係喇。我嗰陣同同學好鍾意去巴士站隔離個街市度食飯，嗰度有檔車仔麵啲咖哩魚蛋好正㗎！」
「嘩我知呀我知呀！個老闆娘好鬼死惡成日鬧佢老公㗎嘛！」
「哈哈係呀，不過個老闆好好人㗎，佢好多時會專登比多啲餸我哋㗎，有時多隻雞翼，有時又會多幾粒魚蛋。」
「哈可能就係因為咁佢先成日比老婆鬧。」
我們嘻笑一輪後，她又道﹕「你同我同年呀呵，咁你係咪都係同我同一年考會考呀? 」
「係呀。」
「咁你考成點呀? 係原校升讀定係去咗第二間讀呀? 」
「我係原校升呀，不過可能我間學校本身渣渣哋，我無乜幾個friend夠分留低，去到預科差唔多成班都係外校生......咁你呢? 睇你之前個樣都應該考得唔錯吖，應該夠分原校升啦，咁你咪可以同你班friend一齊讀預科囉。」
她的聲音突然悶悶不樂﹕「嗯......不過我唔想讀返原校......我唔想見到佢......」
糟了！我忘了Ron是她的同學，而且還是成績很好的那一種，Ron在原校升讀應該是毫無疑問的事吧。
我連忙道﹕「咁其實轉吓環境識吓新朋友都好嘅，話唔定識到個更好嘅呢。」
她的聲音馬上又變得雀躍起來﹕「嗯！我都係咁諗！」
這個時候，我看到洞口突然消失了，我呼喚了她幾次沒人回應，以為是她那邊停雨了。正當我放下紙杯想睡覺的時候，風鈴又響起來。
「喂喂，大叔你仲喺唔喺度? 」
「喺呀，頭先你嗰邊停雨呀? 」
「唔係呀，頭先個窿唔見咗我都以為係停雨，但我望出窗都係一直落緊雨喎。」
「係呀......咁點解個隆會突然唔見咗呢? ......」
「唔知呢，喂唔好理咁多啦。係呢，你嗰陣有無拍拖呀? 」
怎麼八卦起我的事來?
我沒有想太多，回答道﹕「無呀，我間學校啲女仔無乜幾個係靚嘅，嗰陣我同班friend成日lunch放學都走去你間學校附近睇你哋啲女同學，哈哈。」
死妹釘「嘖」的一聲﹕「你哋啲男人，個個都咁敷淺。」然後她有點嬌羞的問道﹕「咁...咁你覺得......我靚唔靚呀? 」
老實說死妹釘不是屬於看第一眼會覺得驚豔的那一種，但卻是越看越覺得漂亮，於是我由衷道﹕「靚呀，如果我嗰陣識你嘅話一定會去追你啫！」當然說會追求她只是說笑，我純粹想給她一點自信而已。不過我想，若果十六歲的我遇見她的話，也許真的會被她吸引吧。
她喜形於色﹕「真嘅? 」
「係呀！所以你唔好比另一個我見到你呀，佢肯定會追瘦你！」
「嘻...嘻嘻.......」
「喂你唔駛咁開心吖? 讚你兩句就鬆毛鬆翼。」
她嗔道﹕「咩啫咩啫，笑吓都唔比呀? 」然後又喜孜孜道﹕「好喇我唔同你講lu，我要瞓覺啦，早抖。」
「嗯，早抖啦。」
我放下紙杯，呼了一口氣。這個妹釘還真厲害，才一天而已就將昨晚的事放下，也不知是她神經比較大條還是為人樂觀。不過這樣也好，昨晚的事應該不會令她留下陰影吧?