《唔係啩！我間房幅牆有個窿》: Chapter 18
噹啷噹啷......
我一邊拉著繩子，一邊想著這邊的水靈說給我知道的事。
要告訴死妹釘她最後會和Ron結婚的事嗎? 但他們拍拖的契機是Ron感染了SARS而錯過了會考，令到水靈更加關心他而感動了他。那死妹釘那邊的Ron現在已經逃過SARS一劫，這個契機已經消失了，即是說他們不會再因為這個原因而成為情侶。若果我告訴死妹釘實情的話，會影響她和Ron的發展嗎? ......還是先不要說出來比較好，反正現在他們也發展得不錯。既然這邊的他們能成為夫妻，另一邊的他們應該也會因為別的理由走在一起吧。
「喂大叔，你呢排點呀? 」死妹釘的聲音剛好打斷了我的思路。
「幾好呀，你呢? 考試考成點呀? 」
「仲有3科，過多兩個禮拜就考完啦。」她的聲音聽起來滿輕鬆的，看來她很有把握。
「好似幾有信心咁喎，之前嗰啲考得好好呀? 」
「覺得都唔錯啦，應該可以攞到自己心目中個grade。」
「咁呢排你同個男仔點樣呀? 」
她的聲音馬上變得忸怩起來﹕「都...係咁啦......咪成日兩個人去自修室溫書......有時溫完書又會一齊食吓飯囉......」
看來我的出現並沒有影響他倆的關係，他們最後還是會成為情侶吧。
我鬆了一口氣﹕「係佢主動約你? 」
「係呀......」
「咁你有無聽我講要吊住佢癮，唔好次次都應承佢呀? 」
「有呀，跟足你咁做之後，我覺得佢真係搵多咗我，電話又密咗。」
「都話㗎啦！記住你啲反應要界乎冷淡與熱情之間呀，一時要唔理佢唔騷佢，一時要好主動好熱情咁搵佢。包保佢逃唔出你嘅手指罅，做硬你隻兵！」
「咩兵呀? 」
「觀音兵呀！Do you understand? 」想不到我要指點一個少女收兵，希望不會遭到天譴吧。
「un啦............係喎，前幾日我有去搵過阿靜，佢終於都話咗我知咩事啦。」
我急道﹕「係咩事呀? 」
「原來呢，上年暑假嘅時候，佢媽咪發現咗佢爸爸喺大陸包二奶，然後佢爸爸就拋妻棄女，丟低佢哋三母女。佢媽咪因為受咗咁大刺激，搞到要去睇精神科醫生，跟住連份工都無埋，好彩佢家姐已經出嚟做嘢，所以佢屋企暫時都仲頂得住。不過就因為咁變得咁唔開心囉。」
若果是因為這樣，小時候的她變得不開心也是很正常的，但畢竟這已經是十二年前的事了，現在的她還耿耿於懷嗎? 還有，她姊姊是怎樣過身的? 她又為甚麼對男人這麼冷淡? 是因為她爸爸嗎? 還是因為有別的事情?
不過死妹釘也沒法知道得更多，畢竟在她的年代Carmen的姐姐還健在，看來要靠我自己了。
「佢家姐出嚟做嘢喇? 咁咪大過佢好多? 」
「大佢十年。不過聽佢講雖然大佢好多，但佢家姐好錫佢，所以佢好鍾意佢家姐㗎。」
原來如此，難怪一提起她姊姊就馬上哭了。對了，有一件事我現在應該可以幫到小Carmen。
「喂死妹釘，有件事想你幫吓手。」
「呵，講嚟聽吓先啦，本姑娘心情好嘅話咪幫你囉。」
我的語氣認真起來﹕「我唔係同你玩呀，認真想你幫手。至多你幫我之後當我欠你一個人情，之後你叫我做咩都得啦。」
「嗯? 咁認真? 係咪真係做咩都得先? 」
「只要唔犯法，唔係叫我自殘就咩都得！嗱！只限一件事咋！」
「呢個交易都唔錯，不過你講咗要我幫你啲咩先啦！」
「我想你多啲搵小Carmen，多啲同佢傾偈，幫我開解吓佢，因為......」
「因為咩呀? 」
要說給她知道Carmen姊姊的事嗎? 但我只知道她將會離世，至於是何時和原因我現在也一頭霧水......唉，豁出去了！不說清楚我怕死妹釘會將事情搞砸了。
我深呼吸一口氣﹕「因為我知道Carmen家姐就嚟死。」
「吓? 咁大件事? 佢點死㗎? 幾時死㗎? 有無方法救到佢呀? 」
「唉......我都唔知，我剩係知道喺我嘅時空佢家姐已經唔喺度。而Carmen又未肯講出嚟，搞到佢而家鬱住鬱住......所以我想你幫我照顧一下小Carmen，我唔想佢呢個時候無埋最錫佢嘅家姐，我驚佢都會變到我呢邊個Carmen咁......」
「嗯......我明白啦，我會多啲搵佢㗎啦。」
我衷心道﹕「唔該哂你呀！仲有你千祈唔好同佢講佢家姐會有事，一來我唔想佢擔心佢家姐，二來我根本唔知佢家姐會發生咩事，想救都救唔到。」
「放心啦，我知點做喇......不過講真，睇唔出你個人都幾好喎。你明知道就算我幫到我呢邊嘅阿靜，你嗰邊嘅阿靜都唔會變得開心㗎。」
「唉...咁明知道有啲嘢會發生，雖然都係做唔到啲咩去阻止，但都想喺自己能力範圍之內做返少少嘢去補救，起碼件事會無咁壞先啦。而且我鍾意Carmen嘛，咁想保護細個嘅佢都好正常啫。」
「其實呢，你真係想幫到呢邊嘅阿靜，就應該要快啲問到佢家姐究竟發生咩事。只要佢家姐無死到嘅話，佢就唔會變到你嗰邊個阿靜咁啦。」
「嗯，我會努力㗎啦。」其實我很害怕應該發生的事沒有發生的話，蝴蝶效應會令未來變得更差，但為了幫Carmen，我也顧不了這麼多了。而且救了Ron好像也沒有甚麼副作用，死妹釘和他還是發展得好好的。希望救Carmen姊姊這件事也是一樣吧。
現在要做的，就是要知道她姊姊到底發生了甚麼事。