《唔係啩！我間房幅牆有個窿》: Chapter 11
「拜拜，晚安。」「晚安。」Carmen跟我道別後，輕輕關上了門。
我回到家中並帶上了門後，緊握拳頭重重的喊了一聲﹕「YES！」
沒想到今天會和Carmen有一個突破性發展！而且也成功拿到她的facebook！正所謂好的開始就是成功的一半，看來我很快就可以將Carmen這座冰山劈開啊！
我帶著愉快的心情，吹著口哨洗澡。之後我就安然入睡，也忘記了跟水靈交代一下進度。
翌日一早醒來，就看見床尾有一張字條。
「喂大叔，你呢排好忙咩? 難得晚晚個窿都出現，但次次嗌你你都唔喺度嘅? 定係已經瞓咗覺啦? 喂我好多嘢想問你呀，你今晚得唔得閒呀? 我都唔知今晚會唔會落雨，但我會準時9點等你㗎，你咪瞓住呀！如果唔係唔教你溝女㗎！」
嘖！何用你來教！反正Carmen已經逃不出我的掌心了。
想是這麼想，但我也很有興趣知道她有甚麼問題要問我。那麼今晚就晚點睡吧。
出門的時候，也正好碰到Carmen出門。
「早晨呀！Carmen。」
她微笑回應﹕「早晨呀，Raymond。」
我急不及待的發動攻勢﹕「而家有時間一齊去食個早餐嗎? 」
Carmen略帶歉意道﹕「sorry呀，唔得呀......」
唉......怎麼又失敗了......昨晚不是好好的嗎? 還是我太急進了?
我失望之情浮於臉上﹕「噢......係呀...唔緊要啦，下次先啦。」
「不過其實我聽朝都ok嘅......」
ok......ok............甚麼? ！她竟然說ok? 我沒聽錯吧?
她可能看見我一臉呆相，用手拍一拍我手臂道﹕「有lift啦Raymond。」
「吓? ......哦...」我連忙跟著她走進升降機，然後戰戰兢兢的問﹕「你...你頭先話咩ok話? 」
Carmen微笑道﹕「我話聽朝可以同你食早餐呀，聽日都係呢個時間門口等啦，ok? 」
我忙不迭的點頭道﹕「okokok！聽朝呢個時間門口等！」
這時候升降機門正好打開，Carmen拉著她的行李箱離開﹕「我行先啦，拜拜。」
我呆看著她美麗的背影，痴痴的揮手﹕「拜拜......」
升降機的門徐徐關上。
Shit！我在幹甚麼? 她也是去地鐵站吧！我怎麼不跟著一起走?
我的手指「啪啪啪啪」的按著開門鍵，但升降機關了門後又升上了別的樓層，到我重新回到地面，Carmen已經不知所蹤了......
啷噹...啷啷噹......噹......
繩上的風鈴隨著繩子的震動而發出聲響。
我馬上拿起紙杯道﹕「喂，點呀死妹釘? 」
「嘩大叔搞咩呀你? 把聲咁風騷嘅? 」
這樣也給她聽出來? 這個小妮子真厲害！不過其實我也打算告訴她詳情，所以我道﹕「呵呵呵，心情唔錯咁啦~」
「唓！聽你把死人聲發哂姣咁，即係我條橋work啦！仲唔快啲多謝我? 」
老實說你只是叫我到安老院碰一下運氣罷了，這算是甚麼計策? 算了......總算是你提醒我安老院這件事，說要謝謝你也說得過去。
「係喇係喇，至醒係你啦，多謝你囉。」
「咁請我食飯啦。」
我面露難色﹕「點請呀大姐? 喺你個年代我又唔識你，你去搵以前嘅我請你食飯盞當你痴線啦。喺我個年代我同你都唔知未來嘅你喺邊，點搵你呀? 」說到這裏，我突然想到若果叫水靈找從前的我，告訴他之後會遇到甚麼困難，要怎樣怎樣解決的話，那我的人生不是平坦得多嗎? 但想深一層，我根本沒有認識水靈的記憶，而且若果讓從前的我知道未來的事，這樣會引發蝴蝶效應吧? 最後結果是好是壞，我都不能控制呢，還是別亂試的好。
「簡單啦，我哋約定喺未來見面咪得囉。」
「喺未來見面? 哦！......哈哈哈......呢個約會橫跨12年喎！我諗係有史以嚟最長嘅約會喎。」
「哈！係喎！咁你幾時得閒呀? 」
我想了想道﹕「嚟緊個禮拜六晚應該ok嘅。」
「咁就禮拜六晚啦，嗰晚係幾年幾月幾日? 約幾點? 喺邊度食? 」
「嗱。你搵個地方收好佢啦，要擺12年㗎。」我將日期時間地點都寫在一張小字條裏，然後傳給她。
「放心啦，我一定會收好佢喎，話哂有人請，雖然要等成12年先有得食。」她接過紙條後，我想起了一件事，打趣道﹕「喂我點認得12年後嘅你呀? 你應該都變咗做個大嬸啦！」
水靈佯怒道﹕「你就變大嬸！我肯定變得好靚！」
我揶揄她﹕「係喇係喇，唔知醜............咁你變得咁鬼靚我點認得你呀? 」
她嘲笑道﹕「我認得你個大叔樣咪得囉！懞丙！」
說的也是，我怎麼沒有想到呢? 不過我也怕她的記憶模糊了，還是多點確認的方法比較好。
「不如我哋搵多樣嘢確認身分啦，我驚過咗咁耐你會唔記得我個樣。」
「咁又係......咁不如到時我就問你係咪大叔，你就......」我馬上將她的話接下去﹕「我就問你係咪死妹釘！」
「無錯！哈哈......」她笑完後道﹕「喂你講吓你同Carmen發展成點? 聽你把聲好似得米咁。」
「好呀。」於是我就將這兩天和明早的事告訴了她。
「唓！咁咋? 同人傾多兩句，約到食早餐就咁開心，等我仲以為你咁快就得咗添！」她的語氣充滿了不屑。
我忿忿不平﹕「你比啲鼓勵得唔得呀? 話哂之前佢連嘢都唔同我講，而家進步咗好多啦！」
「係喇係喇......你真係好叻叻豬呀！咁得未呀? 」她的語氣充滿了嘲弄的意味。
嘖......不用這麼敷衍吧? 這個死妹釘真是......
她的聲音又傳過來﹕「喂唔好掛住講你啲嘢先，我有好多嘢想問呀。」
我懶洋洋道﹕「咩料呀? 關於個男仔㗎? 問啦姣婆。」
震天價的咆哮聲從紙杯傳來﹕「你就姣婆！」
媽的！差點震破我的耳膜了！這個臭八婆真是的......
我連忙認錯﹕「係係係......我先係姣婆......咁請問靚女你有咩想問呢? 」
她的聲音冷靜下來﹕「呢幾日其實都係同之前差唔多，都係問下佢書上面嘅嘢咁啦，咁有時我哋都會傾吓閒偈講吓笑咁嘅......」
「嗯，咪幾好囉，進展唔錯呀。」
「但...但係我同佢講過話淘大好危險，佢好似唔係好信咁，又話個病喺大陸傳啫，唔駛驚咁喎......」
「你話埋你表哥係政府醫療顧問佢都唔信呀? 」
「咁...咁佢又唔係唔信我......只不過覺得無咁大件事啫......」
我想了想，今天是三月九日，明天新聞就會報導沙田威爾斯親王醫院有醫護人員感染，那麼......
「今日咪3月9號嘅，你而家即刻打電話比佢，話佢知你表哥收到風，沙田威爾斯親王醫院有10幾個醫護人員感染症狀，聽日新聞就會報導。而且3月15號世衞就會將呢個傳染病命名做SARS，咁到時佢無可能唔信個病咁大鑊啦啩。」
「咁呀......」
「仲咁咩呀? 快啲嗱嗱聲打比佢啦，定係你想佢留喺屋企等被隔離? 到時就算佢無惹到個病都有幾個月見唔到佢喎。」
聽到我說會有好幾個月不能見到他，水靈馬上反應過來﹕「吓? ！咁我而家打比佢喇！」然後聽筒就靜下來了。
過了一會兒，我好像隱約聽到一些談話聲，我將耳朵貼著洞口想聽清楚一點，聲音卻戛然而止。我定神看一看牆壁，果然是因為洞口消失了。
是她那邊停雨了嗎?
不能馬上知道水靈和那個男生的後續發展，不禁有點失望。不過我倒不擔心那個男生會不相信她，反正明天他看新聞就會知道水靈說的是事實。
現在還是早點睡吧，明早約了Carmen吃早餐呢！