你討厭地盤佬嗎？: 你討厭地盤佬嗎？ 六

  昨晚一夜無眠，今天呵欠連連，早餐，坐車，走路，靠著半撐半合的眼皮苦苦堅持，最後趁工頭一不留意，躲進地盤的醫療室睡覺。

  「強叔叔......」有把女聲。

  「起身喇......」嗯。

  「睇下幾點，仲唔起身......」嗯？

  「再唔起身，就剪你架啦......」好熟悉的聲音......





  我睜開睡眼，只見一個模糊的身影坐在身旁，初步觀察是個白色校裙學生妹，抬頭再看被一撮長髮半掩的側面，豈不是詩音嗎？年輕少女貿然進來地盤不怕危險嗎？她又怎知我在蛇王？保安呢？傻的嗎？

  我撐起身來，搭著詩音的肩膀：「點解你喺度嘅？」剛睡醒的意識總是薄弱，要是平時，我定不敢搭著她的肩膀。

  然後她溫柔的臉孔微微一笑，竟吐出一句意想不到的：

  「仆你個街食咗春藥呀？」

  意想不到詩音的粗俗與我不遑多讓，我被這句粗口嚇得整個身子後退，倚在床側的牆壁，發怔地望著她。倏爾她的臉龐出現變化，首先姣好的笑容被打格仔，再化成個一個漩渦，然後皎白的校裙逐漸被塵埃染成灰色，繼而變成一條被水泥沾汙過的牛仔褲......怎麼這樣眼熟......





  再看向詩音的臉容，我不禁大叫：

  「我屌！」

  原來眼前並不是純情學生妹詩音，而是戴著安全帽的麻甩地盤佬阿新！說好的校裙呢？現在是條汗臭牛仔褲！那股清新脫俗的少女香呢？你卻給我煙味！我想看陳奕迅演唱會，你叫我去看林峯.JPG......

  「平時你好精神架，點解無端端入嚟偷懶？」阿新脫下安全帽。

  「屌，尋晚失眠無訓到......」我拍拍沉重的頭顱。





  「睇你個撚樣啱啱肯定發緊春夢......」阿新淫笑道。

  「癡線。」

  「出去啦，放飯喇。」

  此時電話震動，我拿出電話一看，竟是詩音的短訊：

  「我過泥搵你食飯？」

    我立時興奮得在床上彈了一彈，雖然詩音只是為了她的家長日才靠近我，但自欺欺人的感覺仍是很爽！自出娘胎從未試過被異性邀請共膳，皆因欠缺自信，性格內斂，不夠風趣，過份被動，簡稱太毒，所以就算有機會，我都是猶恐出醜退避三舍，結果成功轉職做魔法師。今天我依然是魔法師，卻是個拿劍的魔法師，WOOOOOOOOO！

  「我問你，你覺得一世人最好運嘅事係咩？」

  阿新認真地想了片晌，答道：「食到個唔係空心嘅新地筒。」頓了一頓，他繼道：「你呢？」





  「我呢......」我站起身來，背向阿新，望著窗外白雲一片。

  「就係俾學生妹約食飯！」說罷從褲袋找出阿新的煙盒扔給他，逃之夭夭去。