[有沙入眼]是咁的，我嘅職業係幫想自殺嘅人寫遺書: 287.睇戲

「不如我地睇完戲先食丫？」miki明明係問我，但係我都未答，已經比佢拉左去新寶戲院

「優獸大都會十分鐘之後有場呀！」佢開心到係咁拍我，然後就衝左去買飛

「一陣你要買炮谷我食。」miki拎住兩張學生飛翻黎

「你仲買學生飛？」

「我仲有帶學生證架。」佢喺銀包拎張浸大嘅學生證比我睇，我都係而家先知佢同我同校，以前讀bu嘅傳理





「仆你個街，過左期9世喇喎。」

miki自鳴得意咁奸笑：「我個樣個似學生，吹咩？」

唔睇個日期，又真係唔會估倒呢個矮得得嘅女仔已經廿五歲嘅

最後，我真係陪呢個煩膠妹睇戲，而個搣飛仔又真係無發現miki張學生證過左期

「炮谷呀買炮谷呀。」





「得喇得喇。」

拎住炮谷行到miki身邊，佢攞左一粒塞入我個口：「完成任務獎你食一粒。」

嗰粒炮谷，好鬼甜

「篤。」

我撥開miki隻手：「又做乜呀？」





「你又笑喇。」

「無笑。」

「你話無咪無，哈哈。」

我⋯⋯真係有笑咩？

「入場喇黑面神。」miki摟住我隻手，拉左我入去