[有沙入眼]是咁的，我嘅職業係幫想自殺嘅人寫遺書: 232.佢係唔愛你就係唔愛你

一路聽，我一路忍住唔好打冷震，不過就控制唔倒自己起雞皮

雖然肉麻，但阿dick諗翻都應該覺得sweet嘅

「追倒咪sweet，實際上都曾經sweet過嘅⋯⋯」

中學男仔咁樣追女仔，都幾似少女漫畫

好難想，一個食女無數嘅男人，曾經係咁純情





阿dick唯獨講緊初戀嘅時候，係用追，唔係話溝

中四嗰年，終於同班，阿糖就同左另一個中六男仔一齊

「嗰時我覺得，真心愛一個人，就係祝福佢幸福。」

阿dick繼續等

繼續送禮物，繼續無條件關心，又因為同班而本身係幾年網友，傾得埋，所以阿dick成日幫阿糖做心理輔導





最主要就係聽佢呻下男朋友呢樣唔好嗰樣唔好

直到中六，阿dick知道最後一年機會，阿糖又分左手，就下定決心表白

「⋯⋯咁⋯好啦⋯」

終於成功，等咁多年真係有用，誠意同真正嘅愛真係可以打動人

阿dick當時覺得自己係人生贏家





「但係原來，你幾愛一個人都好，佢係唔愛你就係唔愛你。」

拍左唔夠三個月拖，某日阿糖無翻學，阿dick想去探下佢，睇下咩事

「喺佢屋企樓下條街，佢同另一個男仔，喺我面前行過。」

仲要扮，見阿dick唔倒