[有沙入眼]是咁的，我嘅職業係幫想自殺嘅人寫遺書: 196.全家福

或者係因為希仔件事令miki太傷心，所以佢足足一個禮拜無再搵我

仲好，耳根清靜

不過可能因為無左佢煩我有啲唔慣，我諗翻希仔自殺當日，我同miki喺車入面嘅對話

「你會覺得希仔嘅問題解決左，係因為你覺得無父母更加輕鬆。」

對受過性虐待同家暴嘅miki黎講，家庭只係地獄





所以佢好難理解希仔嘅心情

無家長嘅屋企，miki覺得舒適自由

而希仔就覺得空虛寂寞

「所以⋯⋯布甸仔先會帶張全家福比你？」聽講，miki傳達左我嘅說話之後，希仔就即刻喺相簿拎左張相出黎

希仔最想帶嘅野，就係嗰張全家福





相入面，有個女人抱住一個肥bb，個肥bb坐住喺女人大比

一個男人拎住匙更餵bb食粥，bb烏個頭埋去，打開左嘴

一家人都無望鏡頭，個bb係唔識望

而希仔爸爸媽媽，甜蜜嘅眼神，就只係望住自己個仔

曾經有過嘅幸福





如果佢父母記翻起曾經，塞滿自己雙眼嘅野，唔係錢，唔係工作

咁或者⋯⋯呢個世界無如果

「婆婆同我地影架，我最中意嘅相。」

「有幾中意？」

「仲中意過水箭龜！」對希仔而言，呢張爸爸媽媽餵佢食粥嘅相，就係佢最重要嘅寶物