[有沙入眼]是咁的，我嘅職業係幫想自殺嘅人寫遺書: 167.唔會好得翻

阿誠無證據證明班爛仔同阿發有關，雖然報左警，但係警方搵唔倒施暴嘅犯人

當然阿誠後來就知，係阿發個社團大佬從中作梗，令調查不了了之

阿發無受處分，阿誠嘅父母點追究都係無用

然後佢地屋企，開始受到人騷擾

比如半夜三更有人打電話去佢屋企，有人喺佢地屋企外面淋紅油





只要幻想下大時代入面嘅方展博一家點比人搞法，就可以知道阿誠一家受左咩騷擾

多番嘅騷擾下，最先忍唔住嘅，係阿誠媽媽

「算啦仔，我地唔夠人地鬥架，算啦。」

佢阿媽驚有一日，班黑社會嘅騷擾會升級

不過阿誠同佢老豆就主張抵抗到底





因為咁，佢父母開始成日嘈交

「個仔比人恰到上心口呀！算你條命呀算！」

一方支持，一方反對，晚晚都為同一個問題嘈交

「已經過左一個月，調查完全無進展，阿爸阿媽就日日嘈，搞到離婚咁滯。」

而阿誠想死嘅導火線，在於阿發嘅一句說話





「查查查煩唔煩呀你？拉左我又點？你隻手都唔會好得翻架啦！」